Hello，大家好，我哋係由韓國人每日提供最新韓國旅行資訊嘅Creatrip。
韓劇風魔全球，之前小編喺IG舉辦咗一個「大家嘅人生韓劇係？」問答，收集咗各位嘅答案，今日就等我哋一齊睇吓唔同地區嘅Followers最鍾意睇嘅韓劇係邊套啦！
Creatrip各地區Followers票選人生韓劇結果
台灣
TOP 1： 《機智醫生生活》
得票率：10.38%
《機智醫生生活》總共分咗兩季播出，係一部以醫院做背景，講述醫生、護士同患者之間，圍繞住生命進行拼死奮鬥嘅溫馨故事。
TOP 2：《請回答1988》
得票率：7.67%
《請回答》分咗3個系列，包括《請回答1988》、《請回答1994》、《請回答1997》，每一次推出都扣起唔少韓國人嘅童年回憶。
當中《請回答1988》系列最受歡迎，講述喺1988年，5個家庭住喺首爾市道峰區雙門洞嘅故事，當中有親情、友情同愛情，劇情令到唔少人都好有同感。
TOP 3：《我的大叔》
得票率： 6.88%
《我的大叔》係一套講述3位男士同1位女士，因為過住沉重生活負擔而互相觀察同治癒對方嘅故事，當中有好多經典語錄，令到生活中有痛苦嘅人，透過呢套劇一齊成長，另外呢套作品亦令到IU演技得到認可。
日本
TOP 1：《鬼怪－孤單又燦爛的神》
得票率： 13.9%
《鬼怪－孤單又燦爛的神》當時一播出，成為一時熱話，由孔劉、李棟旭、金高銀、劉寅娜主演，擁有不死之身嘅「鬼怪」，胸口插咗一把劍，希望可以搵到一位幫佢拔劍嘅新娘。原本唔知咩係「愛」嘅鬼怪，因為陰差陽錯遇到自稱係「鬼怪新娘」嘅少女產生感情又浪漫嘅故事。
TOP 2： 《機智醫生生活》
得票率： 8.6%
《機智醫生生活》同樣係日本都係大熱！每一季嘅OST都由劇中演員演唱，令人聽出耳油，可以話係呢系列成功嘅另一個亮點！
TOP 3：《太陽的後裔》
得票率： 7.7%
講述軍人同醫生喺陌生同極端環境中相愛嘅故事，當時宋仲基同宋慧喬嘅互動睇到人心心眼，好多人都希望佢哋可以成為一對長長久久喺埋一齊，可惜最後佢哋喺現實中離咗婚。當時收視率相當高，最高有38.8%。
泰國
TOP 1：《請回答1988》
得票率： 7.51%
《請回答1988》喺泰國得到第一位！原聲帶裡面其中一首歌真係當時1988年韓國流行嘅歌，聽講劇組為咗搵拍攝地點同搵道具落咗唔少功夫，希望觀眾可以感受到當時氣氛。
TOP 2： 《月之戀人－步步驚心：麗》
得票率：5.63%
《月之戀人－步步驚心：麗》係根據中國原創小說翻拍同名電視劇《步步驚心》改編，講述生活喺21世紀嘅女子靈魂穿越到高麗王朝附身喺少女解樹身上，同四皇子之間嘅浪漫愛情故事，以及高麗宮廷火熱嘅王權競爭。
TOP 3： 《回到18歲》
得票率：5.16%
《回到18歲》係一套講述一對婚姻破裂邊緣嘅中年夫婦，準備要離婚嘅時候，丈夫突然變返去18歲嘅時候，重新開始第二次人生。
香港
TOP1：《鬼怪－孤單又燦爛的神》
得票率：17.6%
同日本一樣，《鬼怪－孤單又燦爛的神》喺香港都係排第一！出自金銀淑作家手絕無失手！令人好好奇佢下一套又會寫緊咩作品呢？
TOP 2：《太陽的後裔》
得票率： 9.8%
《太陽的後裔》喺2016年播出，播出後獲得多個獎項添！
TOP 3： 《德魯納酒店》、《請回答1988》
得票率： 5.8%
喺香港TOP3有兩套，分別係《德魯納酒店》、《請回答1988》。
《德魯納酒店》講述負責經營酒店嘅精英具燦星（呂珍九飾），因為影響命運嘅往事而成為「德魯納酒店」人類經理，佢同高傲得嚟又靚嘅社長張滿月（李知恩飾）一齊經營酒店嘅故事。 另外《請回答1988》果然人氣相當高，一樣都有上榜！
越南
TOP 1：《鬼怪－孤單又燦爛的神》、《太陽的後裔》
得票率：25%
呢兩套都係出自於金銀淑作家作品，因為反應太好，之後仲出埋小說版本！如果係呢兩套戲嘅fans都可以睇吓有冇分別！
TOP 2： 《黑道律師文森佐》、《山茶花開時》、《金秘書為何那樣》、《Kill It》
得票率：12.5%
《黑道律師文森佐》 係講述因組織內部糾紛而由義大利逃到韓國嘅黑手黨顧問文森佐·卡薩諾，喺遇上律師後，兩人以黑道方式實現正義嘅故事。
《山茶花開時》喺一套農村浪漫故事，當時人氣相當高，當時出演嘅拍攝地好多人都跟住打卡。
《金秘書為何那樣》由朴敘俊、朴敏英主演，講述一個超自戀副會長同一個全力支持佢秘書之間嘅愛情故事。
《Kill It》係一套悲慘嘅韓劇，邊睇會令人流超多眼淚。
歐美（Global）
TOP 1：《鬼怪－孤單又燦爛的神》
得票率：8.22%
《鬼怪－孤單又燦爛的神》人氣一啲都唔可以講笑，喺4個地區都有上榜！
TOP 2：《女神降臨》
得票率：6.96%
《女神降臨》原本只係Webtoon，因為反應好被翻拍電視劇，女神任朱靜私底下係一個素顏醜女，鍾意睇驚悚漫畫同聽重金屬音樂，同平時完全唔同嘅性格反差萌好可愛！再加上佢同2位男主角嘅愛情故事好激烈，當時大家係修豪派定係書竣派呢？
TOP 3：《月之戀人－步步驚心：麗》
得票率：5.06%
唔單止有IU同李準基拍，仲有姜河那、洪宗玄、EXO伯賢、金志洙、南柱赫、尹善宇得型男一齊拍！
以上係各地區Followers投票選出嘅「人生韓劇」，唔知大家嘅人生韓劇又會係咩呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
