Hello，大家好，我哋係由韓國人每日提供最新韓國旅行資訊嘅Creatrip。
相信唔少女性如果懷孕，應該最心急嘅事就係想知BB嘅性別係咩，香港最快可能3～4星期都知。但係喺韓國，曾經有30幾年醫院都唔會喺32個星期之前透露BB性別，到底係咩原因呢？
點解韓國醫生唔會透露嬰兒性別？
1. 衛生法規定
根據研究，BB由第14個星期開始，基本已經係發育完成，係可以知道性別，但喺韓國就曾經對呢件事好嚴格。
韓國衛生法第20條規定：「32星期前係禁止透露嬰兒性別。」 違法嘅醫生將被處以2年以下有期徒刑或1000萬韓幣以下罰款，並吊銷行醫執照，最長會吊銷1年。因為呢個原因，所以韓國大醫院，醫生都唔敢直接透露。
但係2024年2月嘅時候韓國憲法法院判定上面呢條規定違法憲法，即時失效！所以而家喺韓國都可以提早知道嬰兒性別啦！
2. 為防止流產
之前有啲夫婦如果知道BB性別之後，未必係佢哋想要會選擇墮胎，根據韓國衛生及社會事務研究所嘅數據，韓國有95%墮胎BB係都未夠12星期。當初衛生法嘅規定可以話係為咗防止BB性別受到歧視而訂立嘅法例。
另外大家都知韓國社會面臨嚴重人口老化問題，而韓國出生率係世界上最低，所以預防墮胎對韓國社會嚟講都非常重要。
3. 防止性別失衡
由於重男輕女而導致性別失衡嘅問題喺好多國家發生，當中韓國絕對係其一。當性別失衡變得嚴重，就會引發好多社會問題。如果夫婦早就知道BB性別，就會有機會選擇要唔要，所以禁止過早公開都係一個解決嘅好辦法。
韓國醫生會用咩方式講BB性別？
雖然法律係規定唔可以講，但事實上醫生都好了解夫婦嘅心理，希望俾啲足夠時間佢哋買嬰兒用品，有啲地方嘅醫生喺16星期會有少少暗示，睇超聲波見到BB狀況良好，可以區分性別嘅時候，醫生往往都會比喻咁講：
1. 假設係男仔
우리 애기는 파란색 좋아한다：BB鍾意藍色
우리 애기는 아빠랑 닮았네：BB同啊爸好似喎
다리 사이에 뭐가 튀어나오네：腳之間好似有咩突出嚟喎
=> 如果有講到以上嘅暗示，好可能BB性別就係男仔。
2. 假設係女仔
우리 애기는 핑크색 좋아한다：BB鍾意粉紅色
우리 애기는 엄마랑 닮았네：BB同啊媽好似喎
다리 사이에 뭐가 안 보이네：腳之間唔見有啲咩喎
=> 如果有講到以上嘅暗示，好可能BB性別就係女仔。
大家對於呢個規定被廢除又有咩睇法呢？歡迎留言話俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
