點樣可以0蚊玩轉韓國？
韓國慳錢旅行小Tips！點可以用0蚊玩轉12個首爾打卡景點？
Hello，大家好，我哋係由韓國人每日提供最新韓國旅行資訊嘅Creatrip。
香港人鍾意放假嘅時候去旅行，如果大家之後有計劃嚟韓國，又唔想使太多錢，今日呢個$0體驗行程，保證大家滿意，而且仲可以留低唔少美好回憶！
點樣可以0蚊玩轉韓國？
1. 去奧林匹克公園睇粉紅波波草同硫華菊花田
喺韓國有唔同大小公園，大家可能對漢江公園同天空公園會比較熟悉，今次小編想推薦大家去奧林匹克公園，呢度係免費入場。附近有博物館、體育場、歷史遺跡，同一大片草地，嚟到呢度都可以好放鬆。
好多韓國人都鍾意嚟呢度散步或者露營，如果係喺9月底/10月初去，仲可以同粉紅波波草一齊打卡影相。
另外呢度仲出名硫華菊花田，同孤獨的樹，好多Kpop偶像演唱會都喺體育館舉行。
奧林匹克公園（올림픽공원）
- 地址：서울특별시 송파구 올림픽로 424
- 開放時間：每日 05:00 – 22:00（廣場區至24:00）
- 停車場： 每日 06:00 -22:00
2. 去天空公園影芒草
一到10月尾至11月頭，就係睇芒草嘅日子，去到天空公園就一定可以影到靚相！呢個公園位於世界盃公園最高嘅區域，喺嗰度同時可以欣賞到首爾壯麗景色。
以前呢度係一個垃圾堆填區，經過重新開發，先可以望到咁靚嘅芒草，特別係日落時候去，影嘅相幅幅都係人生照！
提提大家：可以揀由世界盃競技場站1號出口行大約6分鐘去，或者搭電車，單程費用₩2,000、來回₩3,000。
天空公園（하늘공원）
- 地址：서울 마포구 하늘공원로 95
- 開放時間：每日 05:00 – 22:00（每個月開放時間都會變）
3. 去參觀韓國傳統宮殿
去韓國又點可以唔去啲傳統宮殿行吓？如果唔想使錢，可以揀去慶熙宮，呢度可以免費入場。
史蹟第271號嘅慶熙宮又稱為西門內宮闕（西闕）。慶熙宮一直作為王族私宅，直到光海君8年(1616年)，傳聞西門內宮闕位置具有王氣，為咗壓制王氣，另建離宮，命名為敬德宮，不過由於仁祖反正（朝臣擁戴新君主即位）後光海君被廢，英祖36年（1760年）時，將敬德宮改名為慶熙宮。
資料來源：visitkorea
慶熙宮（경희궁）
- 地址：서울특별시 종로구 새문안로 45
- 開放時間：09:00 -18:00（逢星期一及1月1號休息）
4. 去韓屋村打卡
除咗去傳統宮殿行之外，仲可以行韓國嘅韓屋村，呢啲地方都係免費俾大家嚟參觀同打卡影相，不過因為仲有當地人喺度住緊，大家去嘅時候要安靜啲。
喺首爾大家可以去北村韓屋村，而去全州，咁就一定要去全州韓屋村！嗰度有735間古老韓屋，兩個地方都可以影到超多靚相！
北村韓屋村 （북촌한옥마을）
- 地址：서울 종로구 계동길 37
全州韓屋村（전주 한옥마을）
- 地址： 전북 전주시 완산구 기린대로 99
5. 去壁畫村打卡
大家去到任何一個城市，都會發現有有一個美麗彩繪壁畫村，呢啲村莊都係免費入場，喺唔同插畫面前影相，留低一個美好回憶。喺首爾最出名就有梨花洞壁畫村，不過之前就有居民投訴因為太嘈，唔太鍾意，所以如果大家之後去，都要記得保持秩序，唔太大聲叫。
釜山就有兩個壁畫村，大家最熟悉嘅應該就係甘川洞文化村，呢度會將啲屋油上唔同顏色，村落每個角落都隱藏咗唔少驚喜。
釜山「白險灘文化村」有韓國版「聖托里尼島」之稱！近海邊，每個位都可以成為打卡位！
梨花洞壁畫村（이화마을）
- 地址：서울 종로구 이화장길 70-11
甘川洞文化村（감천문화마을）
- 地址：부산 사하구 감내2로 203
白險灘文化村（흰여울문화마을）
- 地址：부산 영도구 영선동4가 1044-6
6. 去盤浦大橋睇月光彩虹噴泉
月光彩虹噴泉設置於盤浦大橋570m區間兩側，裝咗有380個噴嘴， 呢度有壯觀水上音樂表演，嚟韓國一定唔可以錯過！睇完表演，仲可以喺漢江度野餐。
盤浦大橋月光彩虹噴泉（반포대교 달빛무지개분수）
- 地址：서울특별시 서초구 신반포로11길 40
- 開放時間：4月至6月、9月至10： 12:00/19:30（每次15分鐘）、 20:00/20:30/21:00 (每次20分鐘) 、7月至8月: 12:00/19:30（每次15分鐘）、20:00/20:30/21:00/ 21:30（每次20分鐘）噴泉表演可能因落雨或強風而有機會取消，或因節能等因素中斷或更改時間
7. 行山睇紅葉
韓國一到秋天（10月尾、11月頭），就係影紅葉最佳時機！ 韓國人為咗睇到最靚嘅紅葉，都會行山去影靚相。
如果去首爾想近近地行山，可以試挑戰吓北漢山國家公園，嗰度嘅紅葉好靚！
漢山國家公園（북한산국립공원）
- 地址：서울특별시 성북구 보국문로 262
8. 喺南山塔面前打卡
N首爾塔係首爾象徵，好多人嚟到韓國都會想去一次，如果你係Creatrip會員，買門票更加可以享有半價優惠！
不過今次小編係想同大家介紹南山白凡廣場，只要行幾步樓梯，就可以同N首爾塔打卡影相！
再往上行會見到一片草地，好多人都會喺度野餐，另外企喺度仲可以影到超靚日落！
南山公園 （남산공원）
南山白凡廣場出入口（백범광장 출입구）
- 地址：서울 중구 남창동 205-4
9. 參觀曹溪寺同奉恩寺
曹溪寺同奉恩寺係韓國兩大佛教中心，歷史悠久，兩座寺廟都位於首爾市中心，去嘅時候好方便。
寺廟建築好靚，大家可以嚟呢度打卡、祈禱同參觀。
曹溪寺（조계사）
- 地址：서울특별시 종로구 우정국로 55
奉恩寺（봉은사）
- 地址：서울특별시 강남구 봉은사로 531
10. 參觀明洞聖堂
明洞聖堂位於首爾市中心，因為規模大同有西洋古典美建築，吸引唔少遊客到訪，呢座教堂超近南山谷韓屋村、N首爾塔同南大門市場等其他旅遊景點，交通方便。
明洞聖堂（명동성당）
- 地址：서울특별시 중구 명동길 74
11. 喺首爾林影櫻花相
韓國每個季節都有唔同景色可以影，一到春天就一定要同櫻花影相，3月底至4月初，正係櫻花盛開嘅時候，雖然好多地方都可以影到靚相，但首爾林好值得大家去一轉！
公園好大，呢度有一條好靚嘅櫻花徑，嚟到一定可以影返張人生照！
首爾林（서울숲）
- 地址：서울특별시 성동구 뚝섬로 273
- 開放時間：00:00 - 24:00
12. 參觀韓國總統府
Korea Tourism Organization
青瓦台係韓國總統辦公室，總統每日都會喺度工作同生活，呢個地方喺首爾，大家可以免費入去參觀！青瓦台以傳統韓國風格建造，如果想去參觀，至少要提前3個星期喺網上註冊，成功申請會透過Email通知，兩人以上只需一個人做代表申請，但需填寫同行人嘅資料。一個團體唔可以超過10個人，同時必須確認護照係有效，註冊信息必須同護照上信息一致。未滿20歲需由成年人陪同。
唔知以上12個景點，大家之前有冇去過呢？如果冇都可以save底，之後嚟韓國再去打卡，留底一個美好回憶！
如果有更多想知嘅內容，都可以隨時留言或者dm話俾我哋知：）
Instagram：creatrip.hk