2026首爾聖水洞購物攻略
韓國超人氣商圈聖水洞！有邊幾間鋪頭/品牌一定要行？
- 聖水洞係一個點樣嘅地區？
- 點解咁多人都會去聖水行街？
- 去聖水行街應該由邊度開始？
- 2026年聖水必去最新地標係邊度？
- 聖水洞韓系服飾品牌推薦
- 聖水洞香水&手信推薦
- 聖水洞韓系手袋&配飾推薦1
- 聖水洞美妝&護膚品牌推薦3
- 去聖水玩應該要點安排時間？1
- 聖水購物常見問題FAQ
Hello，大家好，我哋係由韓國人每日提供最新韓國旅行資訊嘅Creatrip。
首爾聖水洞係現時韓國最受歡迎嘅商圈之一，由老舊城區改造而成嘅呢個地方幾年之間就變成咗潮流之地，勁多韓國服裝同美妝品牌都有進駐！今日就等小編幫大家整理2026年最新聖水洞購物地圖，Save低佢下次plan行程嘅時候參考啦！
聖水必行店鋪懶人包
韓系服飾品牌 | musinsa standard musinsa store Ader Error Matin Kim emis DRP 柯達 LCDC Seoul |
香水&手信 | TAMBURINS LE LABO hetras. KINFOLK |
韓系手袋&配飾 | STAND OIL OSOI MARHEN.J fennec Blue Elephant Rockfish Weatherwear |
美妝&護膚品牌 | OLIVE YOUNG N dasique TIRTIR fwee AGIT Whipped House 愛茉莉聖水 |
2026最新購物地標 | HAUS NOWHERE SEOUL |
首爾聖水洞購物攻略
聖水洞係一個點樣嘅地區？
首爾聖水洞原本係工業區同舊工場聚集地，幾年之間就變成咗首爾最有代表性嘅潮流之地之一。由咖啡店、選物店、品牌旗艦店，到Pop-up Store同展覽空間都有，所以無論係本地後生仔女定外國遊客，都好鍾意嚟聖水感受韓國最新流行趨勢。相比明洞同弘大，聖水洞更有一種「一邊行街、一邊發掘品牌」嘅氣氛，特別適合想睇韓系時裝、美妝、香氛同生活風格品牌嘅人。
點解咁多人都會去聖水行街？
如果你本身去韓國shopping已經行過明洞、弘大或者蠶室，聖水洞俾人嘅感覺會明顯唔同。明洞比較偏向遊客區，弘大就比較年輕同有街頭感，而聖水洞最吸引嘅地方，反而係好多韓國本地人氣品牌都會喺呢度開旗艦店或者大型概念店，等你唔只係買到想要嘅商品，仲可以直接透過參觀店鋪，感受到品牌想呈現嘅風格。
尤其如果你平時鍾意韓國時裝、美妝、香氛或者設計感強嘅生活品牌，聖水洞真係幾值得預時間慢慢行。呢度唔係一個純粹「商場式」購物區，而係一條街一條街咁分散住唔同品牌店、選物店、cafe同Pop-up Store，所以大家可以好似冒險咁，慢慢行、慢慢發掘新店鋪！
💡小編小貼士：除咗可以一條條街咁行，大家亦都可以揀定一個類別，例如手袋、化妝/護膚品、時裝配飾等等，之後再bookmark定相關店鋪，盡情掃貨！小編會喺下面推薦5個類別嘅商店俾大家，大家記住參考啦！
去聖水行街應該由邊度開始？
聖水其實算係幾容易去嘅地方，搭地鐵就已經非常方便，而且落車之後大部分人氣店鋪都可以用步行方式行到，所以第一次去都唔洗擔心路線會好複雜。
首先如果你想去到聖水洞就直接開始行街，最常見嘅方法就係搭地鐵2號線去聖水站，然後由3號出口出。呢個出口一出嚟就可以去到主要購物區，對第一次去聖水、想順住人氣品牌店鋪一路行嘅人嚟講會最方便。如果你本身係由江南或者首爾南邊一帶出發，亦可以考慮喺首爾林站落車，再慢慢行去聖水主要購物區，大概10分鐘左右就到。
헤럴드경제
至於聖水最核心嘅購物區，主要集中喺「演武場路(연무장길)」同周邊幾條支路。簡單嚟講，只要由聖水站3號出口開始，一直順住大方向行，你就會慢慢去到最多人會去嘅品牌集中地。小編平時無論係自己去聖水行街，抑或係帶朋友去行，都會主要以下面呢條路線為主：
- 聖水站3號出口 → 直行到演武場路
- 行5-10分鐘去到第一區：OLIVE YOUNG N、Stand Oil、MARHEN.J、emis、Musinsa Standard
- 再行5分鐘就會到第二區：Tamburins、Dasique、fwee、TIRTIR、Dior Café
- 一路向首爾林方向慢慢行就會去到第三區：愛茉莉聖水、Torriden、WHIPPED House
其實成條主線由頭行到尾，如果你完全唔停低，可能20分鐘左右都可以行完；但現實通常都唔會真係咁快，因為你幾乎一定會一路行一路入店，睇產品、試嘢、影相、休息，所以預多啲時間會更加實際。
💡小編小貼士：好似上面所講，其實聖水購物區全部都可以徒步去到，所以完全冇必要搭的士，但建議大家要著舒服嘅鞋，如果唔係行咁耐可能好快就會開始攰！
2026年聖水必去最新地標係邊度？
HAUS NOWHERE SEOUL(하우스 노웨어 서울)
- 地址：서울 성동구 뚝섬로 433
- 前往方法：聖水站（성수역）3號出口
聖水呢個地方經常都會有潮牌進駐，亦都會舉辦好多Pop-up活動，所以每年都會變得好唔一樣。而講起2026年必去聖水地標，一定唔少得2025年9月開幕嘅「HAUS NOWHERE SEOUL」！
「HAUS NOWHERE SEOUL」唔係一般單純賣產品嘅門市，而係一個將品牌世界觀、空間設計同購物體驗結合埋一齊嘅複合式空間。成個地方由外觀到內部陳列都好有記憶點，行入去唔會只係覺得自己喺度買嘢，而且好多人都會專程嚟打卡同慢慢參觀。特別係上圖嗰隻臘腸狗，幾乎每個人都會同佢影相。
💡小編小貼士：每隔一段時間就會轉主題，最近嘅係巨型米奇老鼠！
喺呢棟品牌空間有太陽眼鏡品牌「GENTLE MONSTER」、香氛品牌「TAMBURIN」、甜品品牌「NUDAKE」、帽子品牌「ATiiSSU」同餐具品牌「NUFLAAT」進駐，由行街shopping到食甜品都可以喺度一次過搞掂。如果你鍾意香氛、美妝或者本身對韓國品牌空間設計有興趣，都值得將呢度排入行程。
比起一般旗艦店，呢度更著重整體氛圍同視覺呈現，所以就算未必一定有明確購物目標，單係入去感受下空間，都已經幾有聖水呢類潮流商圈嘅代表性。
聖水洞韓系服飾品牌推薦
1. musinsa standard聖水(무신사 스탠다드 성수)
- 地址：서울 성동구 연무장길 83
- 前往方法：聖水站（성수역）3號出口
有關注開韓國潮流嘅朋友們都一定有聽過「musinsa」呢個名，而家唔單止可以喺網上買到，聖水洞更加有間兩層樓高嘅「musinsa standard」旗艦店，大家可以行返夠本，買返幾件當季最流行嘅時裝！
「musinsa standard」係「musinsa」自家品牌，最大優勢唔係「最特別」，而係「最好買」。店內以中性色調、簡約剪裁同高實穿度單品為主，幾乎無論你平時着開咩風格，都比較容易搵到可以即刻帶走、返到香港都會繼續着嘅款。因為全部款式都好百搭，而且男裝、女裝、童裝都有，小編自己屋企都有幾件。
如果你想買返幾件夠「韓」、一年四季都可以著又百搭嘅衫褲，推薦大家一定要去行「musinsa standard」。
2. musinsa store聖水(무신사 스토어 성수)
- 地址：서울 성동구 성수이로 74
- 前往方法：聖水站（성수역）2號出口
「musinsa」喺聖水仲有一間分店，佢哋將以前好出名嘅大林倉庫Cafe改裝成「musinsa store」實體店。如果話「musinsa standard」比較適合想買簡約基本款，咁「musinsa store」俾人嘅感覺就更似一個可以一次過接觸韓國潮流品牌嘅空間，就好似將「musinsa」官網變成實體店咁。
呢度唔係單純賣某一條支線產品，而係更接近「而家韓國年輕人會留意緊咩牌子、咩風格」嘅集合地，所以如果你本身已經行過幾間單一品牌店，想再睇多啲唔同風格，「musinsa store」會更加適合你。尤其如果你未必有鎖定某一個牌子，但又想買到有韓系感、唔太容易撞款嘅服飾或者配件，去「musinsa store」行一轉通常會幾有收穫。
3. Ader Error聖水Space(아더 성수 스페이스)
- 地址：서울 성동구 성수이로 82
- 前往方法：聖水站（성수역）3號出口
「Ader Error」一直都係韓國年輕人之間話題度非常高嘅品牌，鍾意設計感、平時有留意韓國潮流品牌嘅朋友們可能都會聽過！呢個品牌之所以咁受歡迎，主要係因為佢唔係一般韓牌路線。表面睇落好似幾簡潔，但其實好多款喺剪裁、比例同細節位都做得幾特別。唔算好難carry但又明顯比一般日常品牌更有個性，所以特別受鍾意簡約之中又想有少少變化嘅人歡迎。
而聖水呢間分店更加唔只係賣衫咁簡單，唔單止有最新款式嘅服裝，仲有各種超有藝術氛圍嘅拍攝同展覽，成個空間感、陳列方式同品牌美學都做得好完整，好多人就算唔買嘢都會嚟影相打卡！就算你最後未必會買，都好值得入去感受下。
4. Matin Kim(마뗑킴)
- 地址：서울 성동구 아차산로5길 24-33
- 前往方法：聖水站（성수역）1號出口
相信唔需要小編多介紹啦！近年韓國本地同海外都好有人氣，日前更加進駐香港嘅「Matin Kim」喺聖水洞都有分店，雖然價錢唔平，不過品質同設計都一流，經典款T恤更加係韓國人最愛！
「Matin Kim」品牌風格偏向型格、年輕，同時又保留到韓系日常穿搭感，唔會太誇張。無論係帽、袋、上衣定基本款服飾，大家喺韓國都可以見到好多韓國年輕人會著。但如果你想買一件有韓國人氣品牌代表性、又唔會太難carry嘅單品，或者本身鍾意「Matin Kim」個風格嘅話，去實體店睇款同試感覺會比網上睇清楚好多。
💡小編小貼士：如果budget有限，建議先睇帽、袋或者最百搭嘅logo款，更加實用！
5. emis聖水旗艦店(이미스 플래그십 스토어 성수)
- 地址：서울 성동구 연무장길 29-17
- 前往方法：聖水站（성수역）4號出口
另一個好多香港朋友都知道嘅韓國時裝品牌「emis」都有喺聖水開旗艦店，呢度無論係衫、褲、帽款都係行韓系休閒日常穿搭風格，而且價錢唔算貴，比較容易入手！
店舖本身唔算大，但整理得幾好，試帽都方便。佢哋個鏡位都算擺得幾貼心，真係可以睇清楚戴上頭之後啱唔啱自己，唔似有啲店個鏡擺位好奇怪，試完都唔知自己戴成點。
特別係如果你平時鍾意戴Cap帽，真係好推薦你去emis行下。近排喺首爾都仲係會見到好多韓國人戴，搭地鐵、去cafe，定係行街都成日會撞到。emis嘅帽吸引人嘅地方就係設計夠簡單、帽型好睇，而且顏色選擇都好多。
小編自己上年買過一頂米色帽，每次只要冇洗頭就一定會帶佢出門口XD 戴咗一排、洗過好多次之後，顏色同帽型都冇乜點走樣！
6. DRP(드롭드롭드롭)
- 地址：서울 성동구 연무장길 100
- 前往方法：聖水站（성수역）3號出口
네이버
睇落好似文具鋪咁，但係其實「DRP」係一個潮流時裝品牌，位於聖水洞盡頭（比較近建大），門面非常顯眼。DRP嘅風格一睇就知唔係走低調路線，無論係色彩定設計感都比較鮮明，所以對鍾意有個性、小眾感強少少品牌嘅人會特別有吸引力。雖然門面睇落有少少似生活雜貨店，但其實入面除咗小物之外，服飾同家居感配件都幾有特色。
如果你本身唔係想買最穩陣basic款，而係想搵啲睇落更有玩味、更有記憶點嘅設計，「DRP」會比一般韓牌更有新鮮感。成間店俾人感覺幾鮮明，行起上嚟亦都唔會太悶。
💡小編小貼士：想買比較特別、唔係周圍都見到嘅配件嘅話，推薦可以去行吓！
7. 柯達聖水直營店(코닥 성수직영점)
- 地址：서울 성동구 연무장7길 3-1
- 前往方法：聖水站（성수역）4號出口
「柯達（Kodak）」呢個brand相信大家都有聽過，佢哋最大特色就係將復古攝影品牌形象變成一種比較年輕、休閒嘅潮流風格，所以整體感覺會有少少美式、少少Y2K，又唔會太難carry。帽、T恤、外套之類都係比較容易入手嘅單品，睇落亦都幾有辨識度。
네이버
如果你平時鍾意casual啲、帶少少復古感嘅穿搭，呢間應該幾啱你行。比起一啲太前衛或者太設計師路線嘅品牌，柯達更偏向輕鬆但有型，對旅客嚟講接受度都算高。而聖水呢間分店比起進駐百貨公司嘅分店更大，款式亦都更齊全。
💡小編小貼士：位於聖水最出名嘅薯仔排骨湯餐廳對面，如果大家會安排去食排骨湯，可以順便去行下！
8. LCDC Seoul
- 地址：서울 성동구 연무장17길 10
- 前往方法：聖水站（성수역）3號出口
네이버
「LCDC」係法文「LE CONTE DES CONTES」嘅縮寫，有「故事中的故事」嘅意思，呢度唔係一般單純賣衫嘅鋪頭，更似一個將選物、空間設計、Cafe同生活風格結合埋一齊嘅複合文化空間。
如果你唔一定只係想去行街shopping買嘢，而係都想順便感受下聖水洞嗰種潮流同生活感混合嘅氣氛，好推薦大家嚟「LCDC」行。比起目標明確咁掃貨，呢度更適合慢慢睇、慢慢行。
聖水洞香水&手信推薦
1. TAMBURINS聖水旗艦店(탬버린즈 성수 플래그십스토어)
- 地址：서울 성동구 연무장5길 8
- 營業時間：11:00-21:00
- 前往方法：聖水站（성수역）4號出口
由Jennie代言嘅「TAMBURINS」係韓國人氣太陽眼鏡品牌「Gentle Monster」旗下嘅香氛品牌！而聖水旗艦店更加係好多旅客都會專登去嘅熱門地點。比起單純買香水，更多人嚟呢度其實係想感受品牌空間同產品展示方式，成間店由包裝、陳列到氣氛都好有記憶點。
產品方面，護手霜、香水同洗手液一直都好受歡迎，而且香氣比較中性但又夠獨特。無論自己用定買嚟做手信都好啱。「TAMBURINS」喺好多地方都有分店，亦都有進駐百貨公司，不過聖水洞旗艦店規模夠大，而且小編之前去發現貨都好齊，仲可以去影相打卡，係唔少朋友們去聖水都一定會入去行嘅鋪頭。
💡小編小貼士：比起香水，建議先由護手霜或者酒精搓手液入手，送禮同自用都比較方便！
2. LE LABO聖水店(르 라보 성수점)
- 地址：서울 성동구 연무장길 57
- 前往方法：聖水站（성수역）3號出口
鍾意香水嘅人對「LE LABO」應該都唔會太陌生，佢係一個喺美國創立嘅小眾精品香水品牌，行精品香氛路線，感覺比較低調但有夠有質感，而且唔同城市更加會有限定款式。
聖水店吸引人嘅地方，除咗可以試香之外，仲有一種好適合慢慢揀、慢慢感受香氣嘅節奏，同商圈入面其他比較熱鬧嘅店幾唔同。雖然唔係平價路線，不過如果想買一份比較有儀式感嘅禮物，或者想揀返支比普通手信更有記憶點嘅香水，小編推薦大家可以去「LE LABO」。
💡小編小貼士：去鋪頭買仲可以寫上自己個名或者鍾意嘅句子，令支香水變得獨一無二！
3. hetras.(헤트라스)
- 地址：서울 성동구 연무장길 68
- 前往方法：聖水站（성수역）3號出口
hetras. 係一個韓國香氛品牌，由香水、擴香、護手霜、洗手液到沐浴露都有，最大優點係香味統一感做得好，同一款香味可以喺唔同地方用到，而且包裝簡潔有質感，一拎上手就唔會有平價雜貨嘅感覺。而佢哋2025年喺聖水開咗間有成4層嘅實體店，無論係平日定weekend都好多人去，推薦大家可以去現場試聞香味。
通常香港朋友們都會買「hetras.」嘅hand cream做手信，一來單價唔高，二來比較容易送人，唔需要考慮太多尺寸、使用習慣等問題。而且價錢唔貴但香味夠高級，小編同事都有一支，真係每次聞到都會知道係嗰位同事用緊XD如果大家想買夠實用得嚟，包裝簡約有質感嘅韓國手信，非常推薦大家去「hetras.」！
💡小編小貼士：如果你唔知對方平時鍾意咩香味，比起直接買香水，會建議先送hand cream，可以俾對方先試下個香味之餘接受度通常會比較高；另外液體類產品要留意行李安排，如果你準備手提上機，記得先確認容量限制！
4. KINFOLK聖水旗艦店(킨포크 성수 플래그십 스토어)
- 地址：서울 성동구 연무장길 33
- 前往方法：聖水站（성수역）4號出口
「KINFOLK」喺聖水洞就有兩間分店，而比較大嘅呢間旗艦店就喺聖水洞主街，非常顯眼。呢個品牌嘅香水俾人一種比較偏向生活風格同香氛感並重嘅感覺。而且因為唔會好嘈或者好亂，空間感亦都做得唔錯，所以即使唔一定有明確購物目標，行起上嚟都幾舒服。
네이버
小編私心覺得呢度香水非常唔錯，香氛蠟燭都好好聞。如果你本身鍾意香氛、蠟燭或者呢種比較偏生活選物感嘅品牌，「KINFOLK」會係一間幾值得入去感受下氣氛嘅地方。整體價位唔算平，但作為送禮或者買返件提升生活感嘅小物，仍然有吸引力。
你可能會有興趣👇🏻
聖水洞韓系手袋&配飾推薦
1. STAND OIL(스탠드오일)
- 地址：서울 성동구 연무장11길 19
- 前往方法：聖水站（성수역）3號出口
講到近年韓國人氣手袋品牌，STAND OIL幾乎一定會出現喺名單入面，大家喺韓國街頭都一定會見到幾個韓妹孭住。佢最大吸引力係設計簡潔、容易配搭，而且唔少款都係日常返工、出街都可以用，唔會太誇張，但又有韓系感。小編自己都收過人地送嘅STAND OIL手袋做禮物，平時會孭住返工！
如果你今次去聖水想買返個手袋，STAND OIL會係幾穩陣嘅選擇。對第一次接觸韓系手袋品牌嘅人嚟講，佢嘅款通常比較容易駕馭，唔會太易買完返去發現好難襯衫，而且呢度有多款size同設計嘅皮手袋，選擇更多。
2. OSOI(오소이)
- 地址：서울 성동구 성수일로6길 7
- 前往方法：聖水站（성수역）4號出口
「OSOI」係近年好多韓國女生都會留意嘅手袋品牌之一，唔少人都係因為韓星或者穿搭照片開始留意到呢個牌子。呢個品牌嘅袋比一般手袋更有設計感，但又未去到太難carry。袋款線條同袋型辨識度都幾高，所以好適合想買一個睇落唔平凡、但日常又用到嘅袋嘅人。
相比「STAND OIL」嗰種偏穩陣百搭路線，「OSOI」會更適合想買完返香港拎出街孭都唔會同人撞袋嘅朋友們。各種經典顏色設計例如黑白、啡色或者係色彩鮮艷嘅款都有。而聖水洞分店仲有服裝同外套，好多韓星都有同款衫！
💡小編小貼士：如果你平時着衫比較簡潔，「OSOI」嘅手袋反而更容易做造型重點，揀一個輪廓感強少少嘅款會更加搶眼！
3. MARHEN.J聖水旗艦店(마르헨제이 성수 플래그십 스토어)
- 地址：서울 성동구 연무장5길 4
- 前往方法：聖水站（성수역）4號出口
聖水洞「MARHEN.J」店面最吸引人嘅一定係店門隔離呢個超巨型紅色手袋！「MARHEN.J」係好多韓星都會私底下用嘅牌子，每個weekend呢度都會超多人！
「MARHEN.J」係唔少旅客都認識嘅韓國手袋品牌，款式通常偏向日常、女生比較容易接受嗰種路線。如果你想搵嘅係一個唔會太難襯、又有啲韓牌人氣感嘅袋款，「MARHEN.J」其實幾啱你！
4. fennec(페넥)
- 地址：서울 성동구 연무장3길 8
- 前往方法：聖水站（성수역）4號出口
fennec喺韓國都係一個必去掃貨嘅平價配件品牌，尤其如果你本身唔一定想買大件商品，只係想睇啲卡套、銀包仔、之類嘅小物，呢間鋪頭你應該會行得好開心！好多韓妹都會用呢度嘅卡套，顏色選擇多，風格亦都偏實用。
比起一啲主打大袋或者服飾嘅品牌，fennec吸引力在於輕巧、方便攜帶，而且價位相對冇咁有壓力。如果你想買返樣有帶有韓風、又真係用得到嘅小物，呢度會係幾穩陣嘅選擇。
5. Blue Elephant聖水旗艦店(블루엘리펀트 성수 플래그십스토어)
- 地址：서울 성동구 연무장길 13 2F
- 前往方法：聖水站（성수역）4號出口
「Blue Elephant」成日俾人叫做平價版Gentle Monster，原因就係設計感夠強，但價格相對冇咁高，大部分太陽眼鏡同鏡框都只係₩50,000(50000)左右！對想喺韓國買副有型太陽眼鏡或者眼鏡框嘅人嚟講幾有吸引力。成個品牌路線偏時尚、俐落，唔會太保守。
如果你平時好少專登買眼鏡，但又想喺聖水睇啲比較有韓國潮流感嘅配件，Blue Elephant其實幾值得順路入去試下。小編之前同屋企人去行「Blue Elephant」，本身以為款式全部都會太潮好難日常戴，一開始冇打算買俾自己，但因為價錢真係平過預期，而且好多款都夠日常得嚟唔會太平凡，所以最後都
💡小編小貼士：如果喺「Blue Elephant」買咗眼鏡框想配返度數，推薦大家可以去附近嘅「OPTIC LIFE」眼鏡鋪，呢度配眼鏡可以當日取貨，而且價錢都唔貴，大家仲可以透過Creatrip購買7折優惠券，慳多筆！
[스팟] 韓系眼鏡7折優惠 | OPTIC LIFE（聖水店）
6. Rockfish Weatherwear(락피쉬웨더웨어)
- 地址：서울 성동구 연무장길 40
- 前往方法：聖水站（성수역）4號出口
Rockfish Weatherwear係近年好多韓國同香港女仔都會留意嘅鞋履同生活風格品牌，最出名嘅就係帶少少英倫感、又容易融入日常穿搭嘅設計。無論係芭蕾舞鞋、Mary Jane款、雨鞋定休閒鞋款，整體感覺偏實用+少女感，所以特別受鍾意韓系乾淨穿搭嘅人歡迎。
比起一啲純粹追求潮流感嘅品牌，Rockfish Weatherwear更吸引人嘅地方係款式通常唔算太誇張，而且幾容易襯衫，返到香港之後都仲會繼續着到。如果你本身想喺聖水搵一啲唔會太難carry、但又有韓國人氣品牌感覺嘅鞋款或者配件，呢間都幾值得入去睇下。
聖水洞美妝&護膚品牌推薦
1. OLIVE YOUNG N 聖水(올리브영N 성수)
- 地址：서울 성동구 연무장7길 13
- 前往方法：聖水站（성수역）4號出口
「Olive Young N聖水」喺2024年11月開幕，佔地超過4,600平方米，總共有成5層樓咁高，集齊各種韓國人氣護膚品、化妝品、保健食品、生活用品，甚至係KPOP相關產品都有，叫佢做「K-Beauty百貨公司」都不為過！而且地理位置夠方便，係最近後生仔女去聖水洞都一定會去行嘅地方。
另外聖水旗艦店比較特別嘅係有好多可以親身體驗嘅K-Beauty服務，產品試用、膚質診斷、健康測試、男士修眉、化妝體驗同教學等等全部都可以喺同一間鋪頭度做到。目前多數體驗都只會開放walk-in，唔洗擔心因為冇韓國電話號碼而預約唔到嘅呢個問題，只要現場排隊就得！
💡小編小貼士：如果你時間有限，建議你可以先去OLIVE YOUNG N了解近期人氣產品，如果覺得好用、想睇更多特定品牌產品，先再品牌旗艦店行，如果唔係去到旗艦店發現冇嘢好買就好似會曬咗時間咁！
2. dasique聖水旗艦店(데이지크 성수 플래그십스토어)
- 地址：서울 성동구 연무장5길 6
- 前往方法：聖水站（성수역）4號出口
「dasique」係近年喺韓國同海外都好受歡迎嘅彩妝品牌之一，風格一直都偏向精緻、柔和，同時帶少女感，所以特別受鍾意淡妝、自然系妝容嘅人歡迎。聖水旗艦店本身就唔只係一間普通彩妝店，成個空間由外觀、陳列到產品展示都做得幾細緻，而且呢度會隨住季節變化同節日，改變鋪頭裝修，每次嚟都可以體驗到唔同嘅氣氛！
比起喺連鎖美妝店只係簡單睇到幾款人氣產品，去到「dasique」聖水旗艦店會更容易一次過睇到品牌完整系列，包括眼影、胭脂、唇妝等，同時可以更直接比較唔同色號實物效果。如果你本身鍾意包裝靚、色調柔和、影相又好睇嘅韓系彩妝品牌，推薦大家可以去行下！
💡小編小貼士：呢度仲會有埋旗下香氛品牌「After Blow」嘅產品，呢個牌子嘅香水喺Olive Young排名好高，推薦大家可以順便去試聞！
3. TIRTIR聖水旗艦店(티르티르 성수 플래그십 스토어)
- 地址：서울 성동구 연무장5길 7
- 前往方法：聖水站（성수역）4號出口
去過聖水就一定會見過呢棟鮮紅色超搶眼嘅鋪頭，佢其實係出名賣高質底妝嘅美妝品牌「TIRTIR」嘅聖水旗艦店！「TIRTIR」會咁受韓國同海外顧客歡迎，除咗因為底妝產品貼服感高、光澤妝效夠靚，更加係因為色號夠多，幾乎每種膚色都可以搵到啱用嘅粉底！
去到聖水旗艦店大家可以完整咁睇到品牌主打系列，尤其底妝呢類產品，如果只靠網上評價或者包裝判斷，有時未必真係揀到最適合自己嗰款，所以可以去到現場親身睇下同試質地同色號。
4. fwee AGIT聖水(퓌 아지트 성수)
- 地址：서울 성동구 성수이로7가길 10
- 前往方法：聖水站（성수역）4號出口
fwee而家真係可以話係最紅嘅K-beauty品牌之一，尤其係rebranding之後，話題度明顯更高！佢哋嘅柔霧布丁唇頰兩用霜喺全球都爆紅，小編自己都買咗3個色號。因為質地夠creamy，又好容易推開，可以同時用喺嘴唇同胭脂位，畫出嚟嗰種柔霧、暈染感好自然，可以做到咬唇妝效果。
聖水店雖然地方唔算大，但整體設計做得幾靚，亦都幾有品牌感。最方便嘅係店內大部分產品都可以直接試上手，對想慢慢比較色號嘅人嚟講夠方便。而且仲會不定期舉辦活動，去玩仲可以免費得到各種贈品，鍾意呢個牌子嘅你一定唔可以錯過。
5. Rom&nd(롬앤 핑크오피스)
- 地址：서울 성동구 연무장길 88
- 前往方法：聖水站（성수역）3號出口
講到韓國平價彩妝品牌，一定唔少得「Rom&nd」！今次佢哋正式進駐聖水，唔單止可以一次過試晒全線產品，仲有好多旗艦店限定款同限定色，另外仲設有唔少體驗環節，真係好值得去行下。之前網上超多人討論嘅綠色同黑色唇彩就係喺呢度推出！
6. Whipped House(휩드 하우스 성수)
- 地址：서울 성동구 성수이로20길 16
- 前往方法：聖水站（성수역）3號出口
「Whipped」呢個主打純素配方嘅護膚潔面品牌多年蟬聯Olive Young潔面產品銷售No.1，最出名嘅產品係純素奶油潔面乳。小編自己每日都用緊，質地好似忌廉咁，搽上臉敷1分鐘再洗乾淨，皮膚唔會有繃緊或者被抽乾水分嘅感覺，而且每款都有種天然香味。
佢哋喺聖水嘅showroom「Whipped House」亦都裝修得好cute。成個空間用咗好多粉彩色系元素，加上帶少少麵包店感覺嘅裝飾，同埋擺到好似甜品咁嘅產品展示，所以行入去會有種又夢幻又療癒嘅感覺。
最特別嘅係「Whipped」仲有提供潔面乳DIY工作坊，可以進行皮膚診斷同時親手整返甕最啱自己膚質嘅洗面產品返屋企用。過程就好似整甜品咁不斷發打，整到好似忌廉質地咁之後就可以唧入樽同裝飾。
而家佢哋仲同最近聖水人氣拍攝Studio「Eyes'u Studio」合作推出咗拍攝體驗套餐，整完潔面乳之後可以進行專業拍攝，攝影師仲會直接喺現場幫你修圖同沖曬最終成品。小編之前同朋友去咗體驗，我哋兩個都超滿意最終成果，到而家都仲有用呢張相做profile picXD
呢個體驗只可以透過Creatrip平台預約，每到旺季就好容易full booking，大家記住要提早預約啦！
[스팟] WHIPPED HOUSE聖水 | 潔面乳DIY工作坊&拍攝體驗
7. Torriden Connect(토리든 커넥트 성수)
- 地址：서울 성동구 성수이로7가길 17
- 前往方法：聖水站（성수역）3號出口
如果你本身好鍾意買同試護膚品，「Torriden」應該會幾啱你行。呢個牌子主打保濕同舒緩護膚，特別適合敏感肌，而佢哋嘅旗艦店一共有四層，可以慢慢睇唔同產品系列，同時更完整了解品牌主打方向。鋪頭入面仲有AI分析機器，幫客人診斷皮膚狀況，推薦最適合嘅產品俾你！
品牌比較多人買嘅人氣產品包括精華、Cream同最近好多人都會不斷回購嘅家用軟膜套裝。小編自己全年都會用 Dive In Serum，因為佢係少數用落唔會刺激皮膚、又唔會有黏笠感嘅精華。有時店內仲會有特別優惠，例如送sample或者套裝折扣！
💡小編小貼士：有時店內仲會有特別優惠，例如送sample或者套裝折扣！
如果平時對護膚有興趣，或者想令皮膚睇落更靚，推薦大家可以順便去埋附近嘅醫美診所，再進一步護膚、令皮膚更健康無瑕！
[스팟] SERENE CLINIC（聖水）
8. 愛茉莉聖水(아모레 성수)
- 地址：서울 성동구 아차산로11길 7
- 前往方法：聖水站（성수역）2號出口
「愛茉莉聖水(Amore Seongsu）」係一個集合多個「愛茉莉太平洋」旗下品牌嘅大型美妝空間，入面可以一次過睇到 Innisfree、HERA、Mamonde、AESTURA、Laneige、Sulwhasoo等人氣品牌。除咗可以買到旗下品牌商品，呢度仲會不定時舉辦展覽同Pop-up，係一個兼具文青氣息同韓國美妝嘅地方。
店鋪空間好大，分類都做得幾清楚，而且大部分產品都有 tester 可以慢慢試。如果你唔只係想買嘢，仲想有多少少體驗感，呢度亦可以預約免費化妝課程，或者即場製作專屬自己色調嘅粉底同唇彩，對鍾意美妝嘅人嚟講相信會非常吸引。
小編自己其實比起「愛茉莉聖水」會比較多去OLIVE YOUNG，因為呢間鋪頭位置比較入，而且OLIVE YOUNG會有更多其他產品。不過如果我想買HERA或者AESTURA等旗下品牌嘅指定產品，小編就會專程去。
💡小編小貼士：去之前事先透過 Amore Pacific app登記，有機會拎到免費sample，店內有時亦會做特別優惠活動！
去聖水玩應該要點安排時間？
上面小編介紹咗咁多間鋪頭，講真冇可能一日之內行曬。所以與其勉強自己乜都睇、行到下晝3點已經攰到冇力，不如換個方式，搵日喺聖水一邊行街、一邊食好西，同時安排埋各種人氣美容體驗啦！
如果第一次去聖水，或者真係唔知點安排時間好，不妨可以直接跟住以下小編推薦行程去玩，唔會太趕、有得買、有得影相，食完晚飯都仲有力繼續玩！
09:30 | Ki Bakery(키베이커리)
- 地址：서울 성동구 성수일로 13-1
- 前往方法：
- 首爾林站（서울숲역）1號出口
- 纛島站（뚝섬역）5號出口
「Ki Bakery」係聖水一間幾受本地人歡迎嘅麵包店，早排因為出現喺《GOING SEVENTEEN》入面而人氣再升。佢哋最出名嘅有芝士撻、紅豆包，仲有即場唧朱古力餡嘅千層酥卷，小編之前食過覺得呢三款麵包同甜品味道都唔錯！
其實因為聖水大部分鋪頭都會11點左右先開門，所以如果你去聖水單純只想要行街，其實無必要咁早出嚟食早餐。不過如果你想行街同時去做其他韓國美容體驗，就建議大家可以早少少出門口，喺「Ki Bakery」嘆返個靚早餐（當然如果你本身係SEVENTEEN Fans就梗係要去朝聖啦！）
11:00 | FUSS(퍼스)
- 地址：서울 성동구 성덕정3길 9
- 前往方法：首爾林站（서울숲역）2號出口
之後就可以正式開始你嘅韓式變身行程，去聖水人氣髮型屋體驗韓國美髮！小編上次就去咗連韓國KOL、偶像同藝人都會定期幫襯嘅「FUSS」剪返個而家韓國好流行嘅Layered Cut層次剪髮型，順便體驗埋呢度嘅頭皮SPA。
整體感覺非常舒服，做完之後會覺得頭髮更加輕盈，頭皮都會更放鬆同清爽。而且因為剪完頭髮同做完頭皮SPA之後髮型師都會幫你set頭，所以大家可以用一個靚靚髮型喺聖水行街，中途要去影相都會更上鏡！
13:30 | Silbiok(실비옥)
- 地點：서울 성동구 아차산로 126 B1F
- 前往方法：聖水站（성수역）3號出口
午餐可以去呢間牛肉海帶湯專門店，連aespa嘅Karina同Giselle都曾經去過！佢哋主打湯底夠濃、牛肉夠嫩，食到咁上下仲可以加飯煮粥，成餐會幾舒服。雖然由主要購物區行過去大概都要10分鐘左右，但如果你本身係K-pop fans，或者想食一餐比較有暖胃又夠韓國嘅午餐，真心推薦！
15:00 | 演武場路購物行程
食飽之後就可以去行街！好似頭先所講大部分鋪頭都集中喺演武場路，如果本身有想行嘅鋪頭，建議可以先bookmark定，到時候會比較容易搵。如果想一次過買齊化妝品、手袋、時裝、香水等等，可以參考小編以下推薦嘅鋪頭：
- OLIVE YOUNG N（30-40分鐘）：化妝品、護膚品、保健食品等
- Stand Oil（15-20分鐘）：手袋、配飾
- Musinsa Standard（20-30分鐘）：韓系基本款時裝
- Tamburins、fwee（每間15分鐘）：香水、人氣彩妝
19:30 | 崔家蘑菇火鍋刀削麵(최가네샤브버섯칼국수)
- 地點：서울 성동구 서울숲6길 12
- 前往方法：纛島站（뚝섬역）8號出口
BLACKPINK Jennie、RIIZE Sungchan都曾經去過嘅呢間餐廳主打辣味韓式火鍋，配料有高級新鮮牛肉同多種蘑菇，牛肉會喺落單後即刻現切，夠新鮮。而且食完之後仲可以加刀削麵同炒飯，為今日畫上一個完美句號！
💡小編小貼士：如果唔想現場等位，建議大家可以透過Creatrip提前預約，參加評論優惠活動仲會免費送一份水芹菜，記住唔好錯過！
[스팟] 崔家蘑菇火鍋刀削麵（聖水直營店）
聖水購物常見問題FAQ
Q1. 喺聖水 shopping 需唔需要識韓文？
A：唔需要！聖水大部分人氣店舖，例如 OLIVE YOUNG、musinsa，仲有 TAMBURINS、dasique 呢類旗艦店，通常都會有基本英文標示，店員亦多數可以用簡單英文溝通。價錢一般都標示得幾清楚，信用卡機亦普遍支援海外信用卡。至於一啲比較細嘅選物精品店就未必一定有識英文嘅店員，但其實通常都唔會有咩大問題。
Q2. 去聖水行街買嘢要預幾多錢？
A：其實真係好睇你今次去聖水想買咩類型嘅嘢，大家可以參考以下主要店鋪平均價錢，再根據自己預算揀去邊度行（下列價錢為2026年更新，實際請參考現場價格）！
- Musinsa Standard：基本款 ₩20,000起
- OLIVE YOUNG：₩5,000-35,000
- Fennec：卡套類 ₩30,000-40,000
- emis：Cap帽 ₩35,000-45,000
- Matin Kim： ₩80,000-500,000+
- OSOI： ₩180,000-450,000
- TAMBURINS：₩25,000-75,000
Q3. 去行街嘅話聖水同明洞有咩分別？
A：明洞遊客比較多，整體會熱鬧同擠迫，但有點在於比較方便、集中，適合想一次過買齊主流品牌、退稅同掃貨嘅人；聖水就更偏向以本地人氣品牌、獨立品牌、旗艦店同Pop-up Store為主，而且好多鋪頭都會裝修到好似展覽咁，除咗買嘢仲可以影相打卡。
[블로그] 韓國Pop-up Store攻略
Q4. 喺聖水買嘢可唔可以退稅？
A：可以，不過要睇店舖有冇貼出Tax Free標示，好似OLIVE YOUNG N等店鋪仲可以做現場退稅。如果有貼Tax Free標示，埋單嘅時候出示護照，職員就會俾張退稅單你，離開韓國當日，去機場退稅櫃台出示退稅單、收據同護照就得。
Q5. 聖水星期幾去會比較冇咁多人？
A：如果想避開最多人嘅時段，通常建議揀平日星期一至四 去，尤其係 中午前後到下午早段會相對舒服啲。去到星期五下晝、weekend 同韓國公眾假期，聖水人流通常會明顯多好多，熱門旗艦店、Cafe同Pop-up Store都可能要排隊。如果你想行得輕鬆啲、影相冇咁多人，建議盡量避開週末下晝。
Q6. 去聖水行街需唔需要搭的士去唔同鋪頭？
A：聖水主要購物區唔算太大，由頭行到尾大概15-20分鐘 左右，所以一般情況下冇咩必要搭的士。而且聖水好多位置本身都係小巷同窄路，人多嘅時候車都唔算好入，有時甚至會塞到幾乎郁唔到。
Q7. 如果我唔係特別鍾意shopping，仲值唔值得去聖水？
A：小編認為值得，不過都要睇你本身對邊類行程有興趣。就算唔係去shopping，聖水都仲有好多人氣Cafe、藝術/展覽空間可以去，首爾林都喺附近，大家可以去散步同野餐。另外聖水附近都有唔少證件相/形象照拍攝Studio同一日工作坊，大家可以順便去體驗埋！
Q8. 聖水啱唔啱男仔去shopping？
A：其實小編身邊唔少男仔朋友鍾意去聖水行街，例如上述介紹嘅Musinsa Standard本身就有男裝區，基本款、街頭風格款、波鞋呢類都幾齊，仲有New Balance、Ader Error等潮牌都有好多男裝款式。另外OLIVE YOUNG N入面仲有專為男士而設嘅區域同體驗，相信男士們都可以行得開心！
Q9. 喺聖水行街買太多嘢應該點拎比較方便？
A：大部分店鋪其實都唔會提供正式行李寄放服務，不過可以用比較靈活嘅方法處理。小編自己通常會先去 OLIVE YOUNG或者 Musinsa Standard呢類會提供大型購物袋嘅鋪頭行先，然後將買咗嘅嘢集中放埋一袋，一次過拎住繼續行就會方便好多。
Q10. 聖水邊間最適合買手信？
A：小編會推薦去TAMBURINS、hetras. 同 OLIVE YOUNG N。TAMBURINS護手霜、搓手液、香氛產品包裝靚；而hetras.護手霜同香氛類產品價錢相對冇咁高，男女都會鍾意；去OLIVE YOUNG N就可以一次過買齊面膜、護膚品、零食同保健品，比較方便。
以上係小編幫大家整理嘅2026聖水洞購物攻略，快啲準備定子彈嚟大買特買啦！
更多聖水必做體驗&必睇資訊
[블로그] 2025首爾聖水美食總整理
[블로그] 2026首爾聖水洞11間人氣髮型屋推薦
[스팟] ✨Creatrip獨家✨ Sihyunhada（聖水旗艦店）
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
