海雲台「尾浦末家」介紹
想邊望海景邊食海鮮？海雲台「尾浦末家」一次過滿足到你！
Hello，大家好，我哋係由韓國人每日提供最新韓國旅行資訊嘅Creatrip。
去釜山又點可以唔食海鮮呢？不過咁多間餐廳，小編發現有一間專食燒貝類，而且相當出名，除咗可以邊食新鮮海鮮之外，仲可以以俯瞰大海！
海雲台「尾浦末家（미포끝집）」介紹
- 地址：부산 해운대구 달맞이길62번길 77
- 營業時間：11:30 - 01:00（Last Order 23:30）
- 小Tips：由中洞站7號出口行25分鐘 / 搭7分鐘的士去（大約₩3,400）/ 由海雲台行過去20分鐘
行到尾浦港嘅盡頭，大家會見到一間3層高嘅餐廳，呢度就係尾浦末家啦！有分室外同室內座位區。
為咗可以睇到更靚嘅海景，小編決定坐2樓嘅窗邊位，如果係平時高峰時段去幾乎係冇得坐，不過好彩當日小編係平日夜晚之前去，所以先可以有咁多位揀。
平時喺海雲台同廣安里可能人多會好逼，不過尾浦港就好闊落，大家可以靜靜地喺度欣賞釜山海景，同時仲可以遠距離望到廣安大橋。
如果坐喺度食海鮮，再望住個咁靚嘅大海，係唔係覺得好有feel呢？
Menu | 價錢 |
燒貝類（細）2人份 | ₩60,000 |
燒貝類（中）3-4人份 | ₩80,000 |
海鮮公仔麵 | ₩8,000 |
額外加點 | 價錢 |
芝士 | ₩4,000 |
Menu有好多款可以揀，除咗有呢度必食嘅燒貝類之外，仲有生魚片、燒鰻魚等，雖然小編每款都想試，但因為小編只係兩個人去，最後決定要燒貝類（조개구이）細份。
呢度嘅小菜俾得相當多，有沙律、醃洋蔥、拌麵、蠶蛹、海帶湯等，同時仲會附上一兜牛油同洋蔥，當佢哋熟咗再同蜆一齊食會更加好味。
雖然只係細份，但份量都好多，小編而家就教大家點樣燒先係最好味啦！
因為個火夠大，只要將扇貝同蜆放喺爐上10秒就會熟，如果燒太耐就會變得好硬唔好食。
當呢啲扇貝同蜆熟嘅時候，好容易就可以將佢哋同殼分開，將佢哋拎出嚟，之後放落個兜同牛油洋蔥一齊燒。
之後再點少少辣醬一齊食，就更加惹味！
嚟到韓國好多料理都會加芝士，食海鮮嘅時候又點可以唔加呢？加咗味道會更加濃郁同好味！
因為食太多牛油會覺得太膩，最後小編仲加多咗個海鮮公仔麵，裏面都放咗好多海鮮，有章魚、蟹、蝦等。
如果大家都鍾意邊睇海景邊食海鮮，小編真心覺得呢個唔錯，價錢亦都唔算貴，不妨去試吓啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk