江原道住宿總整理
去旅行就係為咗休息走更長嘅路！江原道住宿總整理！
Hello，大家好，我哋係由韓國人每日提供最新韓國旅行資訊嘅Creatrip。
去旅行就係為咗休息走更長嘅路，除咗要吃喝玩樂之外，當然住宿方面都係要考慮嘅因素，今日小編幫大家整理咁江原道幾個地區嘅住宿，希望可以幫到大家啦！
江原道「平昌」住宿
1. 龍平滑雪渡假村（모나파크 용평 리조트）
- 地址：강원도 평창군 대관령면 올림픽로 715
- 價格：Tower Condo ₩88,000 / 一晚
- 官網：撳我
龍平度假村係2018年平昌奧運會期間舉辦高山滑雪賽事超大型度假村。 喺度除咗可以滑雪之外，仲可以焗桑拿、打高爾夫球、去水上樂園、坐纜車等各種休閒活動。
Tower Condo / 1晚（4人） ₩88,000
小編住嘅係可以容納4個人嘅房，雖然冇好似酒店咁高級，但係就好乾淨。
廚房有雪櫃、電磁爐、洗碗盆、電飯煲、微波爐、基本煮食工具同水壺，喺度煮飯好方便，另外浴室有埋毛巾、風筒、洗頭水同沐浴露（一支兩用）同番梘，不過牙膏同牙刷就要自備。
渡假村入面有好多間便利店同埋其他商店，基本日用品，或者簡單嘅零食呢度都可以方便買到。
呢度仲有纜車去發旺山，甚至仲有好多休閒設施等住大家體驗，相信大家嚟到一定會覺得滿意。
江原道「橫城」住宿
1. 威利希利渡假村（웰리힐리）
- 地址：강원도 횡성군 둔내면 고원로 451
- 價格：Standard A ₩70,000起 / 一晚
- 官網：撳我
橫城其實同啱啱介紹嘅平昌住宿差唔多，威利希利渡假村係一個綜合景點，有好多活動可以喺度一次過體驗。
雖然房入面唔算有啲咩特別，不過都算係乾淨，價錢嚟講都算OK！小編揀咗住Standard A，空間夠大，可以瞓到兩至三個人。
呢度仲有一個廚房，大家可以買橫城特產「韓牛」喺度燒。
提提大家：呢度冇提供牙刷、牙膏、洗頭水同沐浴露，大家都要自己帶去，或者去便利店買。
對於想玩得開心又唔想周圍去嘅人嚟講，就真係最適合不過！呢度可以坐纜車、滑雪、喺公園散步、打哥爾夫球等。
江原道「束草」住宿
1. 樂天度假村（속초 롯데리조트）
- 地址：강원 속초시 대포항길 186
- 價格：Deluxe Double約₩200,000 / 一晚
- 官網：撳我
唔知大家之前有冇睇韓劇《男朋友》呢？當中劇中出現嘅「童話飯店」就係位於束草嘅「樂天度假村」！
束草樂天度假村距離市中心只係4公里，酒店入面有392間客房，全部都可以望到東海岸，酒店大廳有一個超大落地玻璃窗，望住藍天白雲，再加埋有陽光射入嚟，俾人一種好舒服嘅感覺。
度假村設有無邊際泳池、水上活動樂園同健身室，適合情侶、一大家細嚟嘅度假天堂，地下一樓有便利店、cafe同幾間連鎖餐廳等，就算突然肚餓，都唔使怕冇嘢食。
入到房，大家就會見到有一張大床，同時有一個小露台俾大家望海景，廁所入面有浴缸，辛苦完一日想浸浴都可以！如果大家嚟到，一定可以放鬆身心，而且唔會後悔！
江原道「襄陽」住宿
1. 納山海灘酒店（낙산비치 양양）
- 地址：강원도 양양군 강현면 전진리 3-2
- 價格：Standard Double (Rear side) ₩93,000/一晚
- 官網：撳我
「納山海灘飯店」除咗靠近襄陽著名景點「洛山寺」之外，距離海灘只係110米距離，附近交通、設施方便，係好多人嚟到會想住嘅首選。
酒店內有游泳池、三溫暖、健身室等設施。
呢度有提供兩種住宿類型，一款係大家都知嘅床鋪型，另一種係韓式暖炕房，有興趣嘅朋友可以試吓。
江原道「江陵」住宿
1. 鏡浦天空灣飯店（스카이베이호텔경포）
- 地址：강원도 강릉시 강문동 258-4
- 價格：Deluxe Lake View Double ₩128,700/ 一晚
- 官網：撳我
喺江陵鏡浦湖隔離嘅「天空灣飯店」，只睇外觀設計就已經引人注目。
「天空灣飯店」有提供健身室、三溫暖等設施之外，最令大家會想入住嘅原因，就係呢度有無邊際嘅游泳池，如果大家早起身嘅話，可以游個早泳，睇埋日出，成件事超浪漫！
「天空灣飯店」每一個房睇到嘅風景都唔太一樣，如果住前面可以欣賞到鏡浦海邊，而住後面就可以望到鏡浦湖，咁獨特嘅景色，都只有呢度可以睇到！
即使係平日都有唔少人嚟到捧場，而且仲有好多好評，之前韓劇《柔美的細胞小將》都係喺度取景！劇中柔美同具雄因為入住透明浴室尷尬故事，就係呢到發生。
提提大家：因為酒店主力支持環保，所以唔會提供拖鞋、牙刷牙膏、刮鬍刀等用品，大家出發前要先準備好。
江原道「春川」住宿
1. THE JACKSON9s HOTEL （잭슨9s 호텔）
- 地址：강원 춘천시 근화동 265-1
- 價格：STANDARD TWIN ₩95,000 / 一晚
- 官網：撳我
「The Jackson9s Hotel」距離春川站唔會好遠，距離市中心近、交通方便，而且內部裝修仲係好新淨，如去之後去春川可以考慮入住呢間。
喺二樓休息室設有遊戲區，裡面有桌球室、乒乓球室、按摩椅、跳舞機等器材可以使用，相信無論係大人定細路都會玩得好開心。喺其他樓層仲設有會議室、宴會廳、三溫暖同健身房等活動空間。
小編入住嘅雙床房雖然空間冇話好大，但最緊要係夠乾淨！
外面仲有一個小露台，黃昏嘅時候可以睇到日落，以及其他春川市景。
今次整理好幾個唔同地區嘅酒店，希望可以幫到大家啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
