瑞草「KAMONG」介紹
被評為首爾必食窩夫店之一嘅「KAMONG」!原來係EXO KAI家姐經營!?
Hello,大家好,我哋係由韓國人每日提供最新韓國旅行資訊嘅Creatrip。
首爾周圍都係Cafe,不過如果想搵一間無論係氣氛、飲品同甜品,都好嘅話,好多人都會答KAMONG(카몽),佢哋最出名係食窩夫!不過有另一個嘅賣點就係,呢間Cafe係EXO KAI家姐經營,之後有計劃去韓國嘅EXO-L就唔可以錯過啦!
瑞草「KAMONG」介紹
地址:서울 서초구 서초대로42길 17
營業時間:平日08:30 - 21:30、週末11:00 - 21:30(每個月第一個星期六休息)
小Tips:由瑞草站1號出口行大約3分鐘。
如果係Kpop Fans應該都有聽過「KAMONG」呢間Cafe,因為係由EXO KAI家姐去經營。舖頭名會改為KAMONG係用咗「KAI+MONG(夢)」,佢哋舖頭嘅口號係「Dream With You」。
由瑞草站(서초역)1號出口行大約3分鐘就會到,門口仲有幾張檯同櫈俾大家坐,天氣好嘅時候,可以吹吓風嘆杯咖啡。
雖然舖頭入面唔算好大,但佢哋嘅座位排得井井有條,因為疫情期間,每一張檯嘅中間仲會有一塊透明版隔住,相當貼心。
呢度嘅Menu用咗iMac展示(相當高級),有中文同英文,甚至有啲仲有相,落單完全唔會有任何問題。平時2點前去仲有優惠,當日小編去嘅時候係做緊買美式咖啡買一送一,果汁減到4,000韓幣。
去到櫃檯,一定要同呢一塊鏡打個卡,證明自己嚟到KAI家姐開嘅Cafe。如果想po IG又唔知打咩,可以跟住塊鏡上面有嘅hashtag打卡。
舖頭主要以黑白為主,簡約得嚟亦都好舒服。除咗有主打嘅飲品同甜品之外,呢度仲有賣好多健康飲品,例如人蔘Shake、蜂蜜飲品等。
舖頭仲有出售自己烘焙嘅咖啡豆,如果大家飲完覺得唔錯,都可以直接喺度買。
唔想飲咖啡可以飲果汁,大大杯,而且望落好新鮮!
小編當日去嘅時候,好好彩見到KAI嘅家姐,即使係戴住口罩,都覺得佢好可愛同親切。最重要嘅係…..佢幫小編落單而且仲會直接幫我哋整飲品同甜品,諗返起都開心!
可唔可以算得上係合照呢....
落完單之後大家就會收到呢一個震動器,當震動嘅時候拎去櫃檯就OK。
等咗一陣小編叫嘅甜品同飲品都到啦!
Chocolate Fondue Waffle ₩13,500
呢間Cafe出名係食窩夫,被HYPEBEAST列為首爾6間必食窩夫其中一間,所以去到一定要試!
一上到檯,已經可以聞到好香朱古力味。
朱古力本身好甜,窩夫上面仲有配雲呢拿雪糕、cream、香蕉同堅果,將佢哋全部撈埋一齊食,唔會覺得膩。只要食過,都會明白點解佢會被列為首爾必食窩夫之一!
呢度有一個貼心位係會先整窩夫再整飲品,所以飲嘅時候唔會覺得飲品已經有變味。
Strawberry Kamongccino ₩6,000
Strawberry Kamongccino喺呢度嘅主打飲品之一,係士多啤梨奶昔,唔會太過甜,好好味。
Green Grape Smoothie ₩6,000
喺其他地方好難會搵到呢款飲品,佢同窩夫一齊食好夾,唔會太甜。
食完之後大家可以將個盤拎去呢一度還,同時仲有水提供。
KAMONG相當受歡迎,尤其係日頭,我哋坐咗一陣已經好快坐滿人。想嚟朝聖嘅EXO-L記得mark低佢啦!
如果有更多想知嘅內容,都可以隨時留言或者dm話俾我哋知:)
Instagram:creatrip.hk