首爾4大二手市場
復古愛好者唔可以忽視嘅首爾4大二手市場！3張黑膠唱片只係需要₩5,000！？
Hello，大家好，我哋係由韓國人每日提供最新韓國旅行資訊嘅Creatrip。
唔知大家係咪鍾意復古風嘅呢？今日想同大家介紹四個首爾二手市場，保證大家可以用超平嘅價錢入手好多復古嘢！
首爾4大二手市場
1. 東廟跳蚤市場（ 동묘 벼룩시장）
- 地址：서울 종로구 숭인동 102-8
講到最大而且多人知嘅就係東廟二手市場，佢就喺東廟站3號出口附近，要去非常之方便。
除咗天氣惡劣嘅情況之外，市場幾乎每日都會開放，特別只要一到週末就會特別多人，唔好以為呢啲二手市場只係得老人家，好多年青人都會特登嚟呢度，甚至以前BIGBANG G-Dragon都有嚟拍攝取景。
呢度二手商品大多數都係復古裝，有時平到₩2,000起就可以執到平嘢！特別係喺晏晝5點之後，好多舖頭都會突然降價，所以如果遲啲去買到嘅嘢都會平啲！
如果想買啲質地好或者係有牌子，價錢可能偏貴，但就會比較新淨！有興趣嘅朋友都可以睇吓小編之前去過東廟跳蚤市場尋寶。
2. 首爾傳統跳蚤市場（서울 풍물시장）
- 地址：서울 동대문구 천호대로4길 21
- 營業時間：市場10:00 - 21:00、餐廳區10:00 - 20:00、逢星期二休息
首爾傳統跳蚤市場由入口，已經可以見到好多衫、飾物、書、黑膠唱片、玩具等，好多好特別嘅小物等住你去買。
除咗室外之外，呢度仲有一個超涼爽嘅室內市場，裡面有賣好多復古衫、家庭用品、樂器等，價錢相對會俾東廟跳蚤市場貴少少。另外之前韓綜《Runningman》同少女時代潤娥同Sunny都有嚟過㗎！
喺2樓仲有一個「青春一號街」，好多充滿韓國童年回憶嘅攤檔，甚至仲有好多影相打卡位，不妨之後嚟行街之餘，都留低少少回憶影返幅啦！
3. 廣藏市場二手商街（광장시장 수입구제상가）
- 地址：서울 종로구 창경궁로12길 11
- 營業時間：星期一至六10:00 - 19:00、星期日11:00 -19:00
如果你係鍾意歐美風格嘅復古裝，咁你就一定要嚟廣藏市場嘅二手商街。
呢度好多間舖頭都係由年青人開，所以貨品keep得都幾唔錯，而且好多都係專賣品牌，價錢會比上面兩個市場貴啲。
呢度仲會分哂男女裝，行嘅時候都方便啲，大家去到廣藏市場嘅時候，記得搵紅色牌寫住수입구제就係㗎啦！
4. 黃鶴洞跳蚤市場（황학동벼룩시장）
- 地址：서울 중구 황학동 161
- 營業時間：平日 10:00 – 19:00
黃鶴洞跳蚤市場有好多古董舖頭，專門出售一啲舊嘅配件或者機器，去嘅時候會發現好多舖頭會以₩5,000出售三張黑膠影片，真係相當之平！
雖然呢多冇衫賣，但係你會發覺好多好得意同有趣嘅電視機、磁帶等。
仲有嚟到記住一定要食返啲小食，一個都只係₩500！
以上4個二手市場，如果鍾意復古同古董風嘅你，之後嚟韓國不妨抽少少時間去睇吓啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
