Hello，大家好，我哋係由韓國人每日提供最新韓國旅行資訊嘅Creatrip。
上次同大家介紹完江原道唔同地方嘅美食之外，稱得上為「咖啡之國」嘅韓國，小編當然都有整理埋唔同地方嘅Cafe，如果大家去旅行都係鍾意以休息同嘆咖啡為主，咁你就唔可以錯過啦！
江原道「春川」咖啡廳
1. 馬鈴薯田咖啡廳（카페 감자밭）
- 地址：강원 춘천시 신북읍 신샘밭로 674
- 營業時間：每日 10:00 - 19:00
- 小Tips：喺春川站換乘中心（춘천역환승센트）搭11或12號巴士到尚川國小站（상천초등학교）落車，對面就係啦！
馬鈴薯咖啡廳Cafe入面有賣好多薯仔麵包，主要分為原味、芝士同咖哩口味，食物嘅外觀同埋包裝都可以睇得出佢哋花咗好多心機，好似整成真嘅薯仔咁。
薯仔麵包原味（춘천 감자빵）₩3,300、薯仔鮮奶咖啡（감자라떼）₩6,000
原味薯仔麵包外皮比麻糬再煙韌啲，入面有好香奶油味。薯仔鮮奶咖啡口感好特別，但記得飲之前要攪勻，如果唔係就會飲到薯仔粒。
老闆仲有喺出面花園種咗向日葵同雞冠花等，大家食完仲可以喺度打卡。
江原道「江陵」咖啡廳
1. Terarosa Coffee 鏡浦湖水店（테라로사 경포호수점）
- 地址：강원 강릉시 난설헌로 145
- 營業時間：每日 09:00 - 21:00、Last Order 20:30
Terarosa Coffee係韓國連鎖Cafe，喺首爾、楊平、釜山都有分店，不過講到總部同工廠就係喺江陵市。
佢每一間分店裝修都有唔同主題，不過唯一不變嘅就係，幾乎每一間分店牆上都有唔少外國設計書用嚟做裝飾，大家可以直接拎嚟睇，喺呢段時間大家都可以好放鬆。
HOUSE TEA（하우스 티）₩7,000
HOUSE TEA會根據當造季節水果去變，今次小編去到嘅時候就係「蘋果+紅菜頭」，飲嘅時候甜甜地，朝早飲返杯即刻精神哂！
新鮮檸檬蛋糕（프레쉬 레몬 케이크）₩3,800
呢到嘅檸檬蛋糕可以食到檸檬粒，口感夠綿密，味道唔會太甜或太酸，食落好清爽，唯一美中不足嘅係外皮有啲乾。
2. 346 Coffee Story （346 커피스토리）
- 地址：강원 강릉시 창해로 348
- 營業時間：每日 08:30 - 23:30
位於江陵江門海邊（강문해변）附近嘅「346 Coffee Story 」係一間有4層樓高嘅Cafe，因為每一層樓都可以望到海景，所以好受遊客歡迎。
鋪頭入面有好多飲品、鹹食、蛋糕、餅乾等，大家睇啱之後可以坐低慢慢食。
黑糖奶茶（흑당 밀크티 ）₩5,500
小編揀咗呢到Best Menu「黑糖奶茶」，大家飲之前記得要先攪勻，黑糖唔會太甜同太膩，味道啱啱好。
3. 木廊咖啡（툇마루커피）
- 地址：강원 강릉시 난설헌로 232 카페 툇마루
- 營業時間：11:00 - 19:00（Last Order 18:00，如果太多訂單可能會提早閂門）、逢星期二休息
呢間「木廊咖啡」係江陵數一數二嘅人氣Cafe，只要一到假期可能就要排一個鐘以上嘅隊！
就算小編係平日黃昏時候去，都大約等咗20分鐘！雖然呢度裝修唔算話好奢華，飲品選擇亦唔算多，但因為有獨特嘅「芝麻鮮奶咖啡」，令到好多人嚟到都一定要試。
木廊咖啡（툇마루커피）₩5,500、栗子蕃薯瑪德蓮（밤고구마마들렌）₩3,800
因為呢度嘅飲品全部都係即叫即整，所以落完單之後要等20分鐘左右，招牌木廊咖啡係喺鮮奶咖啡中間加咗一層黑芝麻，令口感變得豐富、香甜，難怪每個韓國人嚟到都必飲！而栗子蕃薯瑪德蓮亦都好特別，上面有米通，裏面包住麻糬，最後喺上層加塊酥脆蕃薯片，雖然整體有啲乾，但同咖啡一齊飲就好夾。
4. 江陵Stay Interview（강릉 스테이인터뷰）
- 地址：：강원 강릉시 강동면 율곡로 1458
- 營業時間：每日 10:00 - 19:00
- 網站：撳我預約住宿
呢間「江陵Stay Interview」正正位於正東津Haslla Art World藝術村對面，佢除咗係一間Cafe之外仲有一間民宿，簡約裝修設計，同時亦親近大自然，2018年仲獲得江原道建築文化賞！
室內以南洋風同落地玻璃窗為主題，雖然呢度位算多，但只要一到假期就一位難求，民宿至少要提前三個星期喺官網預約，週末嘅房基本上都好快被訂走。
Cafe每一個角落都可以望到大海，室外嘅座位就置身喺大自然之中，望住咁靚嘅海景，吹住海風，係咪諗吓都覺得好寫意呢？
士多啤梨鮮奶（딸기라떼）₩8,000
呢度嘅飲品樽有特別設計過，上面仲貼咗一張日出同大海嘅貼紙，飲完仲可以將個樽帶走當為紀念。職員會另外俾一杯冰大家，可以同小編一樣先將士多啤梨鮮奶搖勻，之後再倒入杯度。淡淡的牛奶香令到鮮奶唔會飲落太酸或者太甜，同時仲可以食到士多啤梨粒，好推薦大家之後都嚟試。
江原道「原州」咖啡廳
1. ROTONDA（카페 로톤다）
- 地址：강원 원주시 지정면 조엄로 56-3 1층
- 營業時間：星期一至星期五11:00 - 21:30、週末11:00 - 22:00
近幾年原州開咗好多間大型Cafe，其中「咖啡 ROTONDA」就係位於西原州火車站附近，要去嘅話都好方便。
室內有落地玻璃，當有太陽射入嚟嘅時候真係好舒服，中間紅磚牆超有質感；室外仲有大片草地同沙灘櫈，想攤喺度休息都唔係問題。
ROTONDA鮮奶咖啡（로톤다라떼）₩7,000 / 樹莓蛋糕（라즈베리 케익）₩6,500
ROTONDA鮮奶咖啡係呢度最有特色嘅招牌飲品，鮮奶咖啡配上層嘅cream，飲嘅時候一啲都唔覺得苦，超滑易入口。而樹莓蛋糕上面嘅忌廉芝士入口即融，中間嘅樹莓雖然有少少酸，但同蛋糕嘅甜啱啱好中和到。
想短暫忘記煩惱，同時又想搵個靜靜地嘅Cafe坐下，下次去原州不妨就去呢間啦！
江原道「鐵原」咖啡廳
1. 銀河水咖啡廳（은하수 카페）
- 地址：강원도 철원군 동송읍 한탄강길 112
- 營業時間：11:00 - 22:00（Last Order 21:00）
位於鐵原漢灘江園區入口嘅「銀河水咖啡廳」，總共分咗兩層，相當闊落，一樓室外座位區可以觀賞到銀河橋美景，二樓就可以欣賞到銀河橋及附近田野風光，非常寫意。
呢度有賣各種咖啡、果汁等飲品之外，蛋糕、餅乾都睇到人花多眼亂，不過當中最想同大家介紹嘅係「Kiss Ring」系列麵包。有芝士、大蒜和藍莓三種口味，適合三至四人一齊share嚟食。
藍莓鮮奶（블루베리 라떼）₩6,000、Kiss Ring藍莓麵包（Kiss Ring 블루베리빵）₩8,900
藍莓鮮奶係佢哋新推出，超大杯，每一啖都飲到藍莓粒，不過牛奶味道有啲淡，攪勻之後有啲似係飲緊藍莓水？小編個人唔太推，如果有下次會想揀第二款，但如果係麵包，咁就一定會再買！Kiss Ring藍莓麵包入面有超多藍莓醬同果粒，麵包外層仲搽咗一層甜甜地嘅醬，口感更加分，難怪幾乎每一檯都有叫！
江原道「東海」咖啡廳
1. 田谷咖啡廳（논골카페）
地址：강원도 동해시 논골1길 24 다동
營業時間：每日 10:00 - 21:00
沿住東海墨湖燈塔村田谷一街行大約10至15分鐘，上到頂會見到一間好有feel嘅Cafe。
呢度檯與檯之間相當之闊落，同朋友傾偈嘅時候都會感到有自己嘅空間，如果坐窗邊位，仲可以望到海景添！
唔好睇佢呢度咁有feel又望到海景，喺飲品方面價錢一定會好貴，同大家諗到嘅相反，一杯美式咖啡只係需要₩3,000，其他飲品價錢都係差唔多。
粉紅檸檬梳打₩3,000、藍色檸檬梳打₩3,000可能係由底下到頂，上到嚟都會出汗，呢個時候當然要叫返杯涼浸浸嘅梳打！
想搵間Cafe望到海景，又可以搵個地方放鬆吓，之後去東海就唔好錯過啦！
江原道「束草」咖啡廳
1. 七星造船所（칠성조선소）
地址：강원도 속초시 중앙로46번길 45
營業時間：每日 11:00-20:00（Last Order 19:30）
呢間Cafe由船廠改建而成，只係睇外牆有冇覺得有啲復古味呢？
只係睇外觀可能會覺得佢冇乜特別，但入到去大家就會發現呢度除咗係一間Cafe之外，仲有好多書俾大家睇。
坐喺2樓仲可以望到青草湖景色。
呢度有好多款唔同口味嘅鬆餅同，口痕嘅話可以買返過嚟試。
最後小編叫咗佢哋嘅朱古力鬆餅（₩5,000）同鮮奶咖啡（₩5,500）。鬆餅入面有好多朱古力粒，鍾意食甜嘢嘅你，一定會鍾意！
飲完咖啡食完甜品，大家可以欣賞下佢哋室內嘅空間，入面擺咗唔少書，大家都可以拎本嚟睇吓。
江原道「橫城」咖啡廳
1. Lake Road 133（호수길133）
地址：강원 횡성군 우천면 전재호수길 133
營業時間：每日 10:00-20:00（花園開放到20:30）
橫城呢個地方係出名韓牛，大家嚟到會發現有好多由屋改造而成嘅Cafe，而且藏身喺大自然之中。
嚟到呢度只要叫一杯飲品，大家就可以望到瀑布同小溪。
小編叫咗凍美式咖啡（₩7,500）、凍鮮奶咖啡（₩8,500）、牛角包窩夫（₩7,500），雖然價錢係偏貴咗啲，但可以喺咁靚嘅環境底下嘆咖啡，都係好值得。
望住呢個景真係覺得好療癒，天氣好嘅時候可以坐喺溪邊附近飲咖啡，聽住流水聲，Lake Road 133絕對值得去！
韓國真係有好多間Cafe，之後去江原道旅行，會去以上景點，不妨都可以參考吓，希望大家都會鍾意啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
