江原道秋天景點總整理
韓國人私藏江原道秋天景點大公開！想影靚相、親近大自然全部都可以做到！
Hello，大家好，我哋係由韓國人每日提供最新旅行資訊嘅Creatrip。
唔知大家飛韓國，都鍾意揀咩季節去呢？今日小編想同大家介紹秋天必去嘅江原道景點！好多都係韓國人私藏，今日小編為大家逐一公開，之後影靚相話咁易！
江原道秋天景點「春川」
1. 九峰山觀景台咖啡街（구봉산 전망대 카페거리）
- 地址：강원도 춘천시 동면 순환대로 1154-113
- 小Tips：搭ITX青春號喺春川站落車，再搭的士坐大約20分鐘。
九峰山高441米，由九座山峰連綿而成，可以望到春川市景及江景，係一個親近大自然嘅好地方。
雖然呢度叫做九峰山觀景台咖啡街，不過其實係冇一個地標叫做觀景台，只係呢度聚集咗好多間餐廳，坐喺度邊嘆咖啡邊望春川風景，真係好寫意。
如果係秋天嚟到嘅話，仲可以望到被紅葉包圍嘅美景。
江原道秋天景點「江陵」
1. 許筠與許蘭雪紀念公園（허균허난설헌기념공원）
- 地址：강원 강릉시 난설헌로193번길 1-29
- 營業時間：09:00 - 18:00
許筠許蘭雪軒紀念公園係紀念許筠同許蘭雪軒兄妹嘅地方，呢對兄妹係宣揚政治同社會改革精神嘅偉人。公園內有許蘭雪軒故居、紀念館、銅像、詩碑等，故居後方種有茂盛松樹林，適合一家人嚟放鬆同玩，比起江陵其他觀光景點，呢度人潮比較少，可以慢慢行。
紀念公園每年春天、秋天都會舉行蘭雪軒文化節等活動，係江陵市出名嘅地方之一，附近有好多唔錯餐廳同Cafe，好適合嚟休息。
江原道秋天景點「原州」
1. 艮峴觀光地（간현관광지）
- 地址：강원 원주시 지정면 소금산길 12
想要去「原州小金山懸索吊橋」，就一定會經過「艮峴觀光地」，係蟾江同三山川江水匯合嘅地方。
呢度被山圍住，每行一步都會感受到大自然嘅芬芳。
繼續往原州小金山懸索吊橋方向行嘅話，可以見到鐵路自行車軌道，近年嚟原州政府致力於觀光發展，纜車園區預計喺出年就會完工，想時相信一定會吸引唔少人。
沿途行嘅時候，大家會見到入面有好多唔少可愛藝術品，喺度打返張卡都幾唔錯。
2. Museum San（뮤지엄SAN）
- 地址： 강원도 원주시 지정면 오크밸리 2길 260
- 營業時間：博物館本館10:00 - 18:00、James Turrell館10:30 - 17:30、冥想館10:25 - 17:05
原州嘅「Museum San」將大自然作為藝術教室，隱藏喺山中，外部以混凝土建造而成，係一個以「極簡風」作為主題嘅建築。
大家入到去次後就會見到呢個紅色經典標誌建築，佢係Museum San嘅「水上花園」，係一個寧靜空間，博物館主體建築經由水倒映，彷彿漂浮喺水面上。
雖然呢度一年四季都可以望到唔同景色，而且都係好靚，不過當中小編最推薦大家係秋天去！
3. 小金山懸索吊橋（소금산출렁다리）
- 地點：강원 원주시 지정면 소금산길 14
- 營業時間：09:00 - 17:00
- 價格：₩3,000
「原州小金山懸索吊橋」全長200米，係全韓國最長嘅吊橋，喺橋上可以觀覽蟾江、原州市同京畿道嘅美景，係好多遊客嚟到都鍾意嘅地方。
同時之前韓劇《雖然是精神病但沒關係》都有嚟取景，當時金秀賢同徐睿知嚟度呢到約會，兩個人仲坐咗喺長櫈到自拍。
另外之前韓綜《無限挑戰》都有嚟過，大家又敢唔敢挑戰呢條吊橋呢？
4. Anbandegi（안반데기）
- 地址：강원도 강릉시 왕산면 대기리 2214-187
- 時間：冇限制，不過推薦大家可以喺日出30分鐘至1個鐘前入場。
Anbandegi海拔高1100米，係一個高原村落，呢度安裝咗好多部風力發電機，同時係大白菜嘅田地，因為呢度有咁獨特嘅風景，呢度出名睇日出 （不過因為大白菜8月底係收割期，所以最好喺8月底之前去打卡。）
如果想去Anbandegi，可以揸車去到入口，不過如果去到展望台就一定要行路上去，因為都有啲高同斜，行上去可能會有少少辛苦。
當日小編出發之前有喺網上search過，太陽會喺6:15升起，不過當日雲太多，最後20分先會見到完整嘅太陽。如果大家之後要去睇日出，一定要search好時間，同埋喺日出前5分鐘就好到達。
望住呢個咁靚嘅景，真係好正！我推薦大家之後一定要嚟行吓！
江原道秋天景點「鐵原」
1. 孤石亭（고석정）
- 地址：강원 철원군 동송읍 태봉로 1825
- 入場費：免費
鐵原八景必去之一嘅「孤石亭」，喺漢灘江峽谷內，因為有特殊地形景色，喺地質方面具有重要嘅研究價值。
擁有鬼斧神工嘅大自然景觀，吸引唔少韓劇都有嚟過取景，就好似有《鯊魚》、《那年冬天風在吹》、《醫道》、《朝鮮射手》等。
喺鐵原孤石亭園區內仲可以搭船環遊江水，近望大自然塑造出嚟嘅奇岩怪石，係一個非常難得嘅體驗。
2. 孤石亭花田（고석정꽃밭）
- 地址：강원 철원군 동송읍 장흥리 10-2
- 營業時間：10:00 - 17:00
從舊年秋天開始，「孤石亭花田」就變成一個超有人氣嘅地方，因為呢度佈滿住五顏六色嘅鮮花，大家嚟到都係為咗影靚相！
除咗同啲花一齊打卡之外，場入面仲設計咗傳統韓屋、唔同藝術品等，同時仲會播Kpop增添氣氛。
鐵原嘅代表卡通人物之一係「鶴」，聽講會用「鶴」作為郡嘅代表性吉祥物，係因為「鶴」係世界上珍稀鳥類同有天然紀念物嘅意義，純潔性＋稀有性嘅象徵，嚟度千祈唔好唔記得喺度影返張相啊！
藍天白雲配上咁靚嘅花田，係唔係睇到相都覺得好靚呢！不過要提提大家：鐵原花田唔係日日都有，佢哋係根據季節開放，所以之後有興趣去呢度打卡嘅朋友，一定要check清楚先好出發！
3. 鐵原漢灘江銀河橋（철원한탄강 은하수교）
- 地址：강원 철원군 동송읍 장흥리 725-12
- 營業時間：09:00 - 17:00、逢星期二休息
漢灘江銀河橋總長180米、寬3米，同時可以容納2,311人，係一條唔對稱嘅吊橋。
韓國好多天空步道都鍾意用玻璃做設計，行中間相當刺激，夜晚仲會亮燈，朝早同夜晚去完全係唔同feel！
行完天橋，過到對面岸上坡之後可以見到有一個超大告示牌，上面係講到預計喺2022年會創建展望台園區，相信如果下年真係開，將會成為一個新嘅熱門景點。
由展望台望落去嘅景色都好唔錯，非常之壯觀，秋天去嘅話仲可以被紅葉包圍。
江原道秋天景點「東海」
1. 武陵溪谷（무릉계곡）
- 地址：강원도 동해시 삼화로 538
- 營業時間：09:00 - 18:00（3月至6月）、06:00 - 20:00（7月至8月）、08:00 - 17:00（11月至2月）
- 入場費：成人 ₩2,000、 青少年₩1,500、小童₩700
武陵溪谷位於三陟嘅頭陀山，總長4公里，相傳因為曾經呢度有神仙喺度住過，所以更被稱為「武陵道院」。
呢度總共分咗四條路線，今次小編選擇行第二條，可以望到雙瀑布同龍湫瀑布，成個過程來回大約係需要2個鐘至2個半鐘。
由山谷入口開始行40分鐘之後，就會見到第一個雙瀑布。
之後由雙瀑布行上去大約5分鐘，就會見到龍湫瀑布，原本佢係出名流水流得快，不過可惜小編去到當日流嘅水唔多。如果大家之後去，建議可以喺落完雨第二日之後去，咁樣望到嘅瀑布景會更加靚。
喺龍湫瀑布對面，大家可以望到呢個景，因為佢形狀特別，好多人都會喺度許願，之後仲會行好運添！
江原道秋天景點「平昌」
1. 大關嶺羊群牧場（대관령 양떼 목장）
- 地址：강원도 평창군 대관령면 횡계리 14-42
- 營業時間： 09:00 - 17:00（1月至2月、11月至12月）、 09:00 - 17:30（3月、10月）、 09:00 - 18:00（4月、9月）、 09:00 - 18:30（5月至8月） （售票截止時間係閉館前1個鐘，因大雪、大雨、閃電等天氣惡劣情況下，可能會冇辦法入場。）
- 入場費：成人₩6,000、小童₩4,000
如果大家鍾意同小動物互動，可以嚟到大關嶺羊群牧場，由停車場到售票處只係需要行3分鐘，大家喺售票處拎完門票之後，千祈唔好直接揼，因為喺體驗過程之中會用到。
唔少人都鍾意喺秋天去打卡，不過可惜小編去到嘅時候落雨，而且霧太多唔太睇得好清楚。
不過如果秋天天氣好，大家睇到嘅景就會同上圖差唔多，每個季節都有唔同嘅景色，當然如果想睇到紅葉梗係秋天去啦！
一直沿住步行路行大約10分鐘，就會到達海拔920米山頂，喺度大家可以用買咗嘅小食餵羊。提提大家，5月至10月可能因為會成日落雨或者霧太多，為咗羊嘅健康會唔開放。
而一開始同大家講唔好將門票揼咗，係因為大家之後可以喺度換一兜乾草，用佢哋可以餵羊。
只要拎住乾草，啲羊就會靠近你，大家可以放心，呢度嘅羊都好乖，可以咁近距離同佢哋互動，望住佢哋食得咁開心，小編都好開心。整個體驗過程大約係40分鐘至1個鐘左右，大家可以邊睇散步睇景邊同羊互動。
喺入口同出口大家都會見到有唔少鋪頭，呢度仲有賣羊形狀嘅麵包，當中有紅豆、忌廉同豌豆3種口味，可以買嚟試吓。
江原道秋天景點「橫城」
1. 橫城湖水路（횡성호수길）
- 地址：강원 횡성군 갑천면 구방리 산164
- 營業時間：09:00-18:00
- 入場費：₩2,000
- 小Tips：由橫城火車站揸車去大約20分鐘
呢個人工湖步道全長31.5公里，有6條唔同嘅步道，小編揀咗第5條路線，好多人嚟到都會揀呢條，因為佢係咁多條之中最可以睇到獨特景色！
無論邊一個季節去，都值得到止一遊，但如果係秋天去，一定會更加愛上呢度！
The News24
每張門票係2,000韓幣，買完之後可以用喺橫城附屬餐廳同其他景點，門票可以等同現金券使用。
一講到秋天，韓國人都鍾意去江原道以上景點打卡！之後有機會嚟韓國，大家秋天又有冇諗住去邊到玩呢？歡迎留言話俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk