Hello，大家好，我哋係由韓國人每日提供最新韓國旅行資訊嘅Creatrip。
成日聽人講江原道好多嘢玩？咁到底每個地區都有咩唔同體驗活動？今日小編整理咗原州、平昌同束草3個地區，如果之後有計劃去呢幾個地方旅行嘅朋友，都可以參考吓！
江原道「原州」體驗活動
1. Museum San（뮤지엄SAN）
- 地址： 강원도 원주시 지정면 오크밸리 2길 260
- 營業時間：10:00 ~ 18:00（逢星期一休館）
原州「Museum San」隱藏喺山中，將大自然作為藝術教室，係一個以「極簡風」作為主題建築。
「Museum San」有四種門票價，價錢如下：
門票種類 | 成人 | 小學生、中學生 | 學齡前 （未返學嘅小朋友） |
一般門票（기본권） 野外花園+紙博物館+美術館 | ₩19,000 | ₩11,000 | 免費 |
冥想券（명상권） 野外花園+紙博物館+美術館+冥想館 （約2個鐘） | ₩32,000 | ₩22,000 | 禁止進入 |
James Turrell券（제임스터렐권） 野外花園+紙博物館+美術館+James Turrell館 | ₩35,000 | ₩25,000 | 15:00場次免費 |
全館通行券（통합권） 野外花園+紙博物館+美術館+冥想館+James Turrell館 | ₩40,000 | ₩28,000 | 冥想館：禁止進入 James Turrell館：15:00場次免費 |
園區主要分成野外花園、紙博物館、美術館、James Turrell館、冥想館等5個區，大家可以根據個人喜好，再去揀想去邊個區。
買完門票之後，呢度係需要分批入場，工作人員會幫大家安排時間，如果錯過就冇辦法入場，大家要留意！
TWITTER：BTS_TWT
呢度有一個水上花園，出名鍾意藝術、去美術館嘅BTS隊長RM之前都嚟過打卡！係A.R.M.Y嘅你，之後都會唔會想嚟影返幾幅相呢？
因為呢度風景好，唔少電視、韓劇、廣告都有嚟過取景！之後嚟嘅大家可以睇吓有冇印象邊套韓劇嚟過取景！
2. 原州鐵道自行車（원주 레일바이크）
- 地址：강원도 원주시 지정면 간현로 163 원주레일파크
- 營業時間：3月至11月 09:30 - 18:00、11月中 - 2月尾 10:10 - 15:40
- 價錢：2人座₩38,000、4人座₩48,000
原州鐵道自行車係利用廢墟嘅舊艮峴站到舊判垈站中間約7公里長往返鐵路，喺售票處可以見到仲有保留「艮峴站」舊嘅模樣。
要體驗自行車之前，需要先搭大約20分鐘嘅「風景列車」，之後再踩大約40分鐘鐵路自行車返去，來回路程需要大約1個鐘20分鐘。
自行車分成2人同4人座，大家可以邊踩邊欣賞沿途美景，路程中仲會有攝影機影住大家，不過提提大家，踩嘅時候要同前、後車保持十米距離，以保安全。
回程坡度輕緩，踩嘅時候唔會覺得好辛苦，浴途仲可以見到小金山懸索吊橋。
雖然沿路上冇太特別嘅裝飾，不過可以親親大自然，睇到好多原州嘅另一面，都係一個唔錯嘅體驗！
3. Haslla Art World（하슬라아트월드）
- 地址：강원 강릉시 강동면 율곡로 1441
- 營業時間：09:00 - 18:00
- 票價：[導覽入場券（因疫情影響暫停發售）]成人₩19,000、青少年₩17,000、小童₩15,000；[自由入場券] 成人₩15,000、青少年₩13,000、小童：₩11,000
- 小Tips：喺正東津站搭112或113號巴士喺Haslla Art World（하슬라 아트월드）站落車即可，大約一個鐘一班車，建議大家先喺車站確認好出發時間。
「Haslla Art World」藝術公園佔地7萬5千坪，名稱源自於新羅時代江陵地區別名。利用大自然環境將館內空間分為「松園」、「時間廣場」、「農田庭園」、「海洋庭園」、「樂之庭園」等。
戶外展示各式各樣藝術作品、美術館內更設有自然生態體驗館，係全家大細出遊好去處。館內仲設有餐廳、Cafe及住宿，參觀時間大約1個半小時到2小時左右，但小編認為有時間嘅話，不妨喺園區嘅Cafe欣賞海景再走。
藝術館內仲提供好多俾小朋友互動體驗活動，大人同小朋友嚟到都會好開心。
園區內展出多國內外畫家作品，每個畫作、裝置藝術都令人讚嘆。裡面嘅木偶展覽，彷彿令人再次回到童年時期，雕塑作品令人非常敬佩各位藝術大師嘅靈感。
江原道「平昌」體驗活動
1. 龍平度假村 Dragon Plaza（평창 용평 리조트 드래곤 프라자）
- 地址：강원도 평창군 대관령면 올림픽로 715
- 營業時間：發旺山纜車（발왕산 케이블카）09:00 - 17:00 [斜坡滑車暫停營運]
龍平度假村總共有16項休閒活動俾大家玩，當中小編只係試咗最受歡迎嘅兩項（斜坡滑車＋發旺山纜車）。
喺體驗活動開始前30分鐘喺售票處買飛，不過如果大家可以用NAVER預訂，會比現場買平得多，不過就算喺網上訂，大家都要記得換實門票，用手機show係唔得㗎！
斜坡滑車（마운틴 코스터）介紹
呢個係佢哋最受歡迎嘅體驗活動，就算要排隊超過一個鐘都有唔少人願意等，每2-30分鐘就有50個人可以體驗。
成人₩15,000 / 小童₩12,000
就到自己嘅時候，只要跟着工作人員指示就可以，最高時速可以達到40公里/小時，快速下坡只係需要3分鐘，相當刺激！
發旺山纜車（발왕산 케이블카）介紹
成人來回₩25,000、單程₩21,000 / 小童來回₩21,000、單程₩17,000
玩完斜坡滑車之後，之後小編上咗2樓去體驗發旺山纜車，因為係舊年8月先開，望落去仲係好新淨！
發旺山纜車總長7.4km，海拔1458m，係韓國最長嘅纜車，因為纜車長，單程都可以坐足足18分鐘！大家可以喺沿途欣賞平昌美景。
搭完纜車去到山頂之後，隔離有一個lift可以搭上去，上去會有一個天空步道。
地下喺由破透明玻璃面造成，行嘅時候相當刺激，唔知大家又敢唔敢挑戰呢？
唔單止天空步道，呢度仲有好多打卡位！大家千祈唔好錯過啦！
2. 大關嶺羊群牧場（대관령 양떼 목장）
- 地址：강원도 평창군 대관령면 횡계리 14-42
- 營業時間：09:00 - 17:00（售票截止時間為16:00，因大雪、大雨、閃電等天氣惡劣情況下，可能會冇辦法入場。）
- 入場費：成人₩7,000、小童₩5,000
如果大家鍾意同小動物互動，可以嚟到大關嶺羊群牧場，喺停車場入口入去，會有好多小食賣，大家買完之後可以餵俾羊食。
大家喺售票處拎完門票之後，千祈唔好直接揼，因為喺體驗過程之中會用到。
一直沿住步行路行大約10分鐘，就會到達海拔920米山頂，喺度大家可以用買咗嘅小食餵羊。
提提大家，5月至10月可能因為會成日落雨或者霧太多，為咗羊嘅健康會唔開放。
而一開始同大家講唔好將門票揼咗，係因為大家之後可以喺度換一兜乾草，用佢哋可以餵羊。
只要拎住乾草，啲羊就會靠近你，大家可以放心，呢度嘅羊都好乖，可以咁近距離同佢哋互動，望住佢哋食得咁開心，小編都好開心。
餵完乾草之後，出嚟就會有一個洗手嘅地方，不過呢度冇番梘，如果想洗得乾淨啲就要去洗手間。
江原道「束草」體驗活動
1. 束草市立博物館（속초시립박물관）
- 地址：강원도 속초시 신흥2길 16
- 營業時間：3月至10月 09:00 - 18:00、11月至2月 09:00 - 17:00
- 入場費：成人₩2,000、青少年/軍人 ₩1,500、小童₩700
呢個博物館係複製咗1978年被拆除嘅舊束草，博物館主要分咗渤海歷史中心、博物館主體建築同戶外民俗村三部分。
喺呢度大家可以了解更多君王歷史，之前韓劇《大祚榮》都有講述相關故事，有興趣嘅朋友都可以睇吓。
另外大家可以喺度見到以前韓國人係點樣生活。
喺博物館大樓搭Lift上5樓，大家可以以去到一個展望台，欣賞束草市博物館美景！想遠離市區，安靜咁渡過一日，呢度都係一個唔錯嘅選擇。
江原道「襄陽」體驗活動
1. 洛山寺（낙산지）
- 地址：강원 양양군 강현면 낙산사로 100
- 營業時間：每日 06:00 - 18:30（最後入場時間 17:30）
- 入場費：成人₩4,000、小童₩1,000
洛山寺風景如畫，係好多遊客必去景點之一。
如果大家嚟到，想慢慢行大約整個行程需要1個鐘。
江原道「橫城」體驗活動
1. 威利希利渡假村（웰리힐리파크）
- 地址：강원 횡성군 둔내면 고원로 451
威利希利渡假村係一個綜合景點，對於想玩得開心又唔想周圍去嘅人嚟講，就真係最適合不過！呢度可以滑雪、打哥爾夫球、行山、焗桑拿、唱K等。
纜車
開放時間：09:00~ （根據滑雪場開放時間彈性調整）
價錢（住客）：成人₩10,000、小童（3-12歲）₩8,000
搭呢架纜車可以去到公園嘅山頂，可以望到渡假村全景。
同時呢度仲係一個好靚嘅小花園，可以影到好多靚相！
Luge
開放時間：10:00 - 17:00
價格：₩14,000以上
當想落返去嘅時候大家可以揀坐呢架車，邊欣賞公園全景，邊享受坐車快感，相當之有趣！價格會取決於玩幾多次同埋係以咩身份（會員/過夜遊客/訪客），每人₩14,000起。
唔知以上各地區嘅體驗活動，大家又會對邊個最有興趣呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
