江原道（春川/江陵）3日2夜行程推介
江原道春川/江陵三日兩夜行程推介！點玩先唔會浪費一分一秒？跟住小編行程啦！
Hello，大家好，我哋係由韓國人每日提供最新旅行資訊嘅Creatrip。
嚟首爾旅行，大家會唔會抽少少時間去江原道附近玩呢？距離首爾只係需要一至兩個車程，但就同首爾有唔同嘅魅力，大家可能會因為唔熟或者唔識路而唔去，不過大家唔使擔心！今次小編會教大家點樣坐交通工具玩轉春川同江陵，三日兩夜行程只要跟住小編就OK！
春川交通方式
點由首爾去春川？
由首爾去春川嘅方法有好多，可以揀市外巴士、火車等，而小編今次想同大家介紹嘅係搭「ITX青春號」，只需要搭一個鐘就到，不過可惜佢唔係每一站都停，最安全嘅就係喺龍山站（용산역），或者清涼里站（청량리역）上車，因為呢兩個站每架車都會停（根據2021年1月5號KORAIL官網資訊）。
*提提大家，搭呢一㗎ITX青春號嘅時候，需要出示QR Code入閘。*
2021春川自由行總整理
1. 九峰山觀景台咖啡街（구봉산 전망대 카페거리）
- 地址：강원도 춘천시 동면 순환대로 1154-113
- 小Tips：搭ITX青春號喺春川站落車，再搭的士去大約20分鐘。
九峰山由九座山峰連綿而成，高441米，可以望到春川市景及江景，係一個親近大自然好地方。「九峰山觀景台咖啡街」距離春川市區大約二十分鐘車程，由於附近冇巴士站，所以小編會建議大家搭的士去，費用大約係₩11,000（HKD 77）。呢度聚集咗好好多打卡靚Cafe，坐喺度邊嘆咖啡邊望春川風景，真係好寫意。
隨住行經山腰道路喺1990年代開通後，唔少鋪頭都選擇喺呢度開Cafe或餐廳等，形成而家大家所見到嘅「九峰山觀景台咖啡街」。
如果大家係喺平日九點去到，基本上唔會見到有好多人，甚至有啲舖頭都仲未開，所以建議大家最好喺黃昏時候去，望住個夕陽休息一下。
呢度每一間Cafe為咗吸引更多人去，都會裝修得好特別，小編有特登入去A TWOSOME PLACE同聖托里尼餐廳，不過因為時間尚早唔多人，小編可以自己一個獨享九峰山風景。
2. 馬鈴薯田咖啡廳（카페 감자밭）
- 地址：강원 춘천시 신북읍 신샘밭로 674
- 營業時間：10:00至20:30
- 小Tips：由春川站換乘中心（춘천역환승센트）搭11或12號巴士去上泉初等學校站（상천초등학교）落車，對面就係啦。
馬鈴薯咖啡廳以賣獨特「薯仔口味麵包」而出名，除咗麵包之外，佢仲有賣薯仔公仔嘅其他周邊。
除咗有MT膠紙、帆布袋、文具等，仲有符合田園主題風推出咗百潔布。
薯仔麵包主要分為原味、芝士同咖哩口味，每一款都係₩3,300（大約HKD 25）、或者一盒十個₩29,700（大約HKD 198），無論係食物外表定係包裝上，都可以睇得出老闆好用心去設計。
薯仔麵包原味（춘천 감자빵）₩3,300、薯仔鮮奶咖啡（감자라떼）₩6,000
原味薯仔麵包外皮比麻糬再煙韌啲，入面有好香奶油味。薯仔鮮奶咖啡口感好特別，但記得飲之前要攪勻，如果唔係就會飲到薯仔粒。
老闆仲有喺出面花園種咗向日葵同雞冠花等，大家食完仲可以喺度打卡。
3. 昭陽江Sky Walk（소양강스카이워크）
- 地址：강원도 춘천시 영서로 2663
- 營業時間：3至10月10:00 - 21:00、11至2月10:00 - 18:00
- 費用：₩2,000
昭陽江Sky Walk係建於衣岩湖（의암호）上嘅湖水觀光設施，喺2016年7月正式開放。全長174米，其中有156米係由強化玻璃鋪製而成，係韓國國內最長玻璃橋。爲咗避免玻璃步道出現刮痕，現場會提供鞋套俾大家著完再入場，著高踭鞋嘅話需要先換拖鞋再入去。而家春川市為咗推廣觀光，買昭陽江Sky Walk門票即送₩2,000折價券，可以喺春川明洞辣炒雞一條街或者春川蕎麥冷麵等餐廳用。
行到盡頭會見到「鱖魚像（쏘가리상）」，佢定時會有噴泉show，好多人都會喺度打卡，小編去嘅當日天氣超好，蔚藍天空配上清澈湖面，企喺度吹吹風真係好爽！聽講日落之後去，天空步道兩邊會有五顏六色燈光，所以同日頭去會係兩種唔同feel。
小編亦想喺度同大家講解昭陽江嘅故事，《昭陽江少女》係講述一位1953年喺江原道春川出世，名叫尹基順少女嘅歌。18歲嘅佢想成為一位歌手，但因為爸爸腳傷，身為大女嘅佢要搭京春線去首爾賺錢，養年幼七個兄弟姊妹長大。
基順喺首爾歌謠同志會下打雜、學唱歌，有一日呢啲作家要由昭陽江返去嘅時候，突然颳起風同落雨，佢哋興致高昂將基順故事寫成一首歌，俾當時只有18歲嘅金泰熙（本名金英玉）演唱，全韓國嘅人都知道呢首歌。
2004年，春川市喺昭陽二橋附近建立歌曲碑（上圖）嚟發揚光大，歌詞主角尹基順2006年返到春川，終於結束漂泊異地36年嘅生活。
4. 春川明洞辣炒雞排街（명동 닭갈비골목）
- 地址：강원도 춘천시 명동길 9
- 小Tips：喺春川站換乘中心（춘천역환승센트）搭300、11、12、12-S號巴士，喺昭陽路郵局站（소양로우체국）落車，行大約五分鐘。
講到春川一定要食嘅又點少得辣炒雞排？春川辣炒雞排係源自於1960年代，當時大家用雞肉代替豬肉去醃製，加椰菜、洋蔥、蕃薯等各種蔬菜喺鐵板上炒，因為價錢平又好味，好多人都鍾意食。
1970至1980年代開始，春川明洞街後巷開咗一間又一間嘅辣炒雞排餐廳，變成而家大家見到嘅辣炒雞排街，小編係平日大約晏晝兩點多左右到，加上受到疫情影響，街上唔多人，見到好多鋪頭都閂哂門，同之前超旺甚至有時仲要排隊嘅春川相比，隱約感受到老闆有幾辛苦。
5. 有味辣炒雞排（유미닭갈비）
- 地址：강원도 춘천시 금강로62번길 12
- 營業時間：10:00 - 23:00、每個月第二個星期三休息
有啲韓國餐廳一次需要叫兩人份以上，所以有時一個人想喺韓國食飯都有啲難，而辣炒雞排好多時就係需要叫兩人份以上，所以小編喺網上搵咗啲資料，見到一間掛住「模範餐廳」標誌嘅50年辣炒雞排店，聽講老闆人超好，小編就去一探究竟。
問咗老闆娘之後，佢哋有提供一人份嘅辣炒雞排，所以之後一個人去旅行嘅朋友都唔需要太擔心！除咗辣炒雞排之外，仲有炒雞內臟、蕎麥冷麵等料理，鋪頭內部好闊落，位都多。
一般辣炒雞排基本盤係雞肉、大蔥、椰菜、年糕同蕃薯，如果鍾意芝士、烏冬、炒飯等可以另外加。不過呢一日老闆娘多送小編年糕、紫蘇葉同汽水，所以望落去超大份。
辣炒雞排（닭갈비）300g₩12,000
職員會幫手將雞排炒好，完全唔使自己落手去炒，啱啱好熟嘅雞肉超鮮嫩，配上鋪頭獨門辣醬真係好好味，年糕口感都算煙韌，配辣雞一齊食入可以降低油膩感。
怕油膩嘅朋友可以包住生菜或醃蘿蔔泡菜一齊食，可以順便解辣。另外小編喺上面講到買昭陽江Sky Walk門票，會得到折價券，大家就可以喺呢個時候用啦！
6. 育林嶺 (육림고개)
- 地址：강원도 춘천시 춘천로151번길 21-2
育林嶺算係春川比較新嘅景點，連接已停業嘅育林劇場同春川中央市場山坡路，喺80、90年代係春川主要商圈，不過隨住時間嘅流逝，加上新市區開發，育林嶺日漸沒落。2015年，春川市推動馬格利村特化街專案，將老舊住宅改造懷舊Cafe、手作工坊、異國餐館等，令成個商圈再次復甦。原有嘅改衫鋪、麻油鋪、辣椒鋪等仍駐守喺原位，同年輕人鍾意嘅文青商店交錯喺商圈，意外地形成一種復古又新潮嘅育林嶺獨特風景。
主道路盡頭有1967年開業嘅「育林劇場」，由1960年代到2000年代，即管經歷多次經濟危機，育林劇場仍屹立不倒為春川民眾提供精彩電影。然而因為敵唔過複合式劇場蓬勃發展，最終喺2006年11月1嘅結業，而家只剩底個招牌。
商圈路上不時可以見到好多壁畫或者藝術品，令育林嶺喺保有老鋪嘅同時，添加年輕氣息，為商圈注入新活力。
7. 孝子洞壁畫村（효자동 동화마을）
- 地址：강원춘천시효자동541-6
「孝子洞壁畫村」面積大，總共分咗三個區域。聽講呢個巷內曾經居住過一位名叫潘希彥（반희언）嘅孝子，自從得知母親有重病後，佢就無微不至咁照顧，但母親病情一直冇好轉。有一日潘希彥面前出現一位山神，山神叫潘希彥去大龍山上拎3個屍體中間嘅頭顱（野山參）煮湯俾母親飲，佢聽完山神指示後，母親病情確實好轉。佢甚至會喺嚴冷冬天摘士多啤梨俾母親，佢嘅孝心令周圍居民都好感動，甚至傳到成個村都知，最後傳到皇宮，被潘希彥孝心深深感動嘅王喺村口建立孝子門，潘希彥嘅美談直到面家都一直流傳緊。
由路口入去第一條巷會見到以朝鮮時代背景壁畫為主，其中會見到呢間平壤蕎麥麵，韓國網民都一致好評，小編原本都想去，可惜固定星期一休息，如果大家之後會去食，記住話俾小編知食後感。
跟住過一條大馬路直行後，右手邊會見到上面呢幅圖，沿住呢張圖行入小巷，會見到描繪住韓國80年代漫畫房、路邊爆谷、文具鋪等壁畫，彷彿搭咗時光機返去韓國80年代舊時光。
雖然壁畫村內冇瞭望台，但因為座落喺山坡上，所以都可以隱約見到遠處山群同密集嘅住屋。
往下坡行會見到呢一帶嘅壁畫顏色比較鮮豔同新穎。因為壁畫區大，所以大家可以食完飯之後，用一、兩個鐘時間喺度散步，或者影吓相。
Lego Land（레고랜드 코리아）
- 地址：강원 춘천시 하중도길 128
- 營業時間：星期一至四：10:00 - 18:00、星期五至日（營業時間可能會有變動，請喺預約時睇清楚。）
- 入場門票價：成人￦50,000 - 60,000、小童 ￦40,000 - 50,000（會因日期唔同價）
最後一個要介紹嘅係即將喺2022年5月5號、韓國兒童節開幕嘅春川「Lego Land」，呢度將會係全世界第十個獲得授權嘅Lego Land，真係未出發都已經令人超興奮！
LEGOLAND除咗酒店之外總共分咗八個區域：BRICK STREET、BRICKTOPIA、LEGO CASTLE、LEGO NINJAGO WORLD、MINILAND、PIRATE SHORES同LEGO CITY。一開始小編以為唔算好大，點知慢慢行原來超多嘢睇，基本上可以用一日時間留喺度！
江陵交通方式
點由春川去江陵？
跟住小編想帶大家由春川出發去江陵，最方便又快嘅方式就係搭市外巴士，大約2個鐘50分鐘，票價係₩15,700（大約HKD 110），一日總共有十三班車由春川出發，開車時間如下：06:20、08:00、08:30、09:30、10:30、12:20、13:00、14:05、15:15、16:30、17:00、17:40、18:30，俾大家參考。
當然，有想由首爾出發嘅朋友，除咗可以搭巴士之外，亦可以揀搭KTX（撳我），巴士嘅話可以喺TxBus、BusTago等車票網站買。
2021江陵自由行總整理
8. 江陵鏡浦海水浴場（강릉경포해수욕장）
- 地址：강원도 강릉시 창해로 514
- 小Tips：喺江陵站往鏡浦方向搭202-1、202-2號巴士，喺「鏡浦海邊」站落車，車程大約需20分鐘。
鏡浦海水浴場長1.8公里，係韓國東海岸最大海水浴場，擁有1.44平方公里面積嘅白色沙灘，風吹住岸邊林立嘅松木，為寧靜海面增添一啲生動感。
鏡浦海水浴場水深大約1至2米、坡度和緩，白淨沙灘同湛藍景色，係韓國人每年夏天必朝聖嘅避暑勝地。沙灘上仲有一啲可愛標誌或者櫈，吸引人喺度打卡。
鏡浦海水浴場設置嘅舞臺會舉辦夏夜藝術節，為江陵增添藝文氣息，沿住海岸步道散步或坐喺沙灘上休息，真係好療癒。
9. 江陵鏡浦湖水公園（강릉경포호수공원）
- 地址：강원 강릉시 초당동 459-28
- 小Tips：由鏡浦海水浴場行大約15分鐘穿過商店街就會到
由鏡浦海水浴場往鏡浦天空灣酒店（上圖白色建築物）方向行，就會抵達鏡浦湖水公園。鏡浦湖因為好似鏡一樣清澈而命名，係冬季候鳥遷徙地之一。鏡浦湖中嘅岩石島（又稱鳥岩）上修建嘅亭中，聽講係掛住宋時烈題寫嘅「鳥岩」牌匾。
望完大海嚟到湖水公園，心情都會跟住一齊變得平靜，雖然湖邊環繞住馬路，但唔會有好嘈嘅車聲，湖面上可以見到建築同天空倒映，不禁讚嘆大自然嘅美。
朝早嘅鏡浦湖，有好多熱愛運動嘅人會沿著公園慢跑或者踩單車。
10. 許筠與許蘭雪紀念公園（허균허난설헌기념공원）
- 地址：강원 강릉시 난설헌로193번길 1-29
- 營業時間：09:00 - 18:00
許筠許蘭雪軒紀念公園係紀念許筠同許蘭雪軒兄妹嘅地方，呢對兄妹係宣揚政治同社會改革精神嘅偉人。 當日因為疫情關係，好多室內展區並未開放，鍾意韓式庭園、韓屋嘅人，可以嚟呢度散吓步，感受一下傳統韓國木。
公園內有許蘭雪軒故居、紀念館、銅像、詩碑等，故居後方種有茂盛松樹林，適合一家人嚟放鬆同玩，比起江陵其他觀光景點，呢度人潮比較少，可以慢慢行。
紀念公園每年春天、秋天都會舉行蘭雪軒文化節等活動，雖然對外國遊客嚟講唔係成日會聽到嘅地方，但喺江陵市相當出名，附近有好多唔錯餐廳同Cafe，好適合嚟休息。
11. 草堂豆腐村 童話花園（초당순두부마을 동화가든）
- 地址：강원 강릉시 초당순두부길77번길 15
- 營業時間：07:00 - 19:00（元祖海鮮嫩豆腐販售時間08:30 - 19:00）、Break Time 16:00- 17:00，、星期三休息
- 小Tips：由鏡浦海邊站（경포해변역）搭202號巴士去江門海邊入口站（강문해변입구역）落車，行大約10鐘就到。
如果講到江陵必食美食，絕對係海鮮嫩豆腐！當中「童話花園」係最出名同最好食！由朝早7點開始營業，小編當日係平日11點左右到，已經係拎緊179號碼牌，當時號碼只叫到120號左右....相當多人嚟食。
排隊人潮多到餐廳開咗兩間都係唔夠位，甚至喺對面開咗一間Cafe俾客人等候用，好多人喺等嘅期間買豆腐雪糕嚟食。
大約等咗一個鐘左右，終於輪到小編啦！呢度Menu好簡單，主要就係原祖海鮮嫩豆腐、安松子大醬湯、草豆腐、辣味嫩豆腐、塊豆腐等。呢度必點一定係原祖海鮮嫩豆腐，如果怕辣嘅朋友，可以揀草豆腐。
原祖海鮮嫩豆腐（원조짬순순두부）₩10,000
雖然真係有啲辣，但如果大家有機會嚟到江陵，一定要試吓！豆腐好滑同濃味，海鮮湯仲加咗胡椒令到更香，當中仲加咗蔬菜一齊煮，令湯變更甜，不過唯一可惜係海鮮份量唔算太多。
12. SOON TOFU GELATO（순두부젤라또）
- 地址：강원 강릉시 초당순두부길 95-5
- 營業時間：10:00 - 19:30
食完之後順住大馬路往江門海邊方向行唔使5分鐘，就會見到「SOON TOFU GELATO」豆腐雪糕專門店。有豆腐、年糕、黑芝麻、咖啡、紫薯、綠茶、鹽焦糖、Nutella杏仁朱古力、青蘋果、濟州島柑橘、野莓口味等可以揀。
小編最後揀咗豆腐口味，有點似食緊豆腐花雪糕嘅感覺，甜而不膩，不過要講一個缺點，可能就係太細，食一個根本唔夠。 除咗豆腐口味之外，小編見到好多人會揀抹茶同黑芝麻口味，感覺都係人氣口味，大家之後都可以試吓！
13. 烏竹軒（오죽헌）
- 地址：강원도 강릉시 율곡로3139번길 24
- 營業時間：售票時間09:00 - 17:00，參觀時間09:00 - 18:00
- 票價：成人₩3,000、青少年及軍人₩2,000、小童₩1,000
去過江陵嘅人應該都有聽聞過烏竹軒，烏竹軒因為屋周圍種植深色竹子而得名，係朝鮮時代大學者栗谷李珥同母親申師任堂故居，亦係江陵地區最具代表性古蹟。建於朝鮮時代早期烏竹軒，係韓國住宅中歷史最悠久嘅木製建築，亦因為建築史上重要性，喺1963年被指定爲寶物第165號。
如果大家有仔細睇到上面第一張相，就會發現李珥同母親申師任堂分別係韓幣₩5,000同₩50,000紙鈔上嘅人物，李珥係李元秀同申師任堂第三個仔，係一位知名儒學家，因為對國政及教育頗有貢獻，被世人敬佩。
申師任堂係朝鮮中期女性書畫家、作家、儒學者同詩人，係朝鮮歷史上良妻賢母典範。園區仲有之前李英愛同韓劇《申師任堂》劇組一齊嚟拍攝時留底嘅手印。
除咗室外園區可以參觀之外，烏竹軒仲有好多市內展區可以了解當時歷史文化。
14. 江陵中央市場（강릉 중앙시장）
- 地址：강원도 강릉시 금성로 21
- 營業時間：08:30 - 21:00
通常想食最地道同平嘅美食，去中央市場一定唔會有錯！江陵中央市場好大，主要分為傳統市場同地下水產市場，分類區別鮮明，所以想搵啲咩都好易搵到。
地下一樓係水產市場、一樓係一般菜市場，賣服飾、乾魚貨、各式蔬菜、日用品等、二樓係餐廳、Cafe等用餐區，而三樓就係市場辦公室。
其實市場模樣都大同小異，不如就跟住小編睇吓市場有咩好食啦！
15. 江陵手作魚糕麵包（강릉 수제 어묵고로케）
- 地址：강원 강릉시 금성로13번길 8
- 營業時間：08:30 - 21:00
位在中央市場嘅「江陵手作魚糕麵包」係當地人氣小食之一，曾經吸引各間電視台嚟報導，因為有特色加上價錢平，唔單止受遊客歡迎，當地人都好鍾意買嚟食。
佢哋有賣蕃薯、紅豆、芝士、辣椒等口味魚糕麵包，均一價₩2,500（約HKD 17.5），一次買五個嘅話係₩12,000（約HKD 84）。另外仲有賣江陵咖啡麵包，大家都可以買嚟試吓。
芝士魚糕麵包（치즈 어묵고로케）₩2,500
小編叫咗鋪頭入面人氣口味之一嘅「芝士口味」，老闆仲特別建議要叮40秒，有拉絲會更好味！加入魚糕炸成麵包外皮大家有冇食過呢？酥脆口感入面仲有扎實魚糕粒，內餡包住香濃芝士，真係超好味，大家嚟到一定要試！
16. 江陵酥脆工廠（강릉 바삭공장）
- 地址：강원 강릉시 금성로13번길 9-2
- 營業時間：11:00 - 19:00、星期六10:00 - 20:00、星期日10:00 - 19:00
江陵中央市場出名嘅食物仲有「魷魚血腸」（雖然束草中央市場嘅魷魚血腸都好出名），周圍都見到有鋪頭賣，小編最後搵咗一間最多人排隊嘅嚟試。
呢家鋪頭專門賣炸物，除咗賣魷魚血腸之外，仲有賣炸蝦、炸紅蟹腳、炸蔬菜等，如果唔想外賣，可以坐喺鋪頭入面慢慢食。
魷魚血腸（오징어순대）₩13,000
不過小編因為要趕車，所以決定要外賣。因為外型似血腸而被稱為「魷魚血腸」，但其實係將紅蘿蔔、洋蔥、冬粉等蔬菜塞入魷魚之後煮熟切片，當客人落單之後，會喺上面淋上蛋液，擺喺鐵板上煎成金黃色就可以食。
因為放咗好多種材料，口感好豐富，魷魚彈牙又充滿鮮味，點少少鼓油食會更好味！如果唔敢食一般血腸嘅朋友，可以試吓呢款魷魚血腸，味道完全唔一樣。雖然價錢有少少貴，但佢份量超多，一個人食真係會超飽。
17. 江陵月花街（강릉월화거리）
- 地址：강원 강릉시 경강로 2111
行完市場之後，小編意外發現充滿文青又有藝術氣息嘅「江陵月花街」。「江陵月花街」係將江原道江陵市中心南大川上橫穿鐵道改造而成，廢棄鐵路區間大約喺2017年成為江陵新景點。政府拆除原有鐵路，唔單止解決南大川地區東西隔斷問題，仲提供公共休憩空間。月花街由休閒公園到江南洞復興村兩公里長鐵路用地，打造出五個主題空間，喺中央市場食完之後可以嚟呢度行吓街。
附近有好多文青小店，大家可以喺度買啲紀念品，或者搵間Cafe坐底休息。
「月花街」新興休憩空間，為傳統市場增添年輕氣息，除咗受到年輕一輩喜愛之外，同時令長者有多一個新嘅散步路線。
18. 江陵Running Man體驗館（런닝맨체험관 강릉점）
- 地址：강원 강릉시 창해로 307 2F
- 營業時間：10:00 - 18:00（最後入場17:00）
- 費用：
₩16,000→ ₩13,500
如果如果本身係Running Man fans嘅話就一定要去呢個《Running Man體驗館》啦！因為佢喺室內，所以無論幾時去都玩得超開心，如果高分仲可以入名人榜，你又會唔會想挑戰呢？
正東津交通方式
由江陵點去正東津？
跟住小編三日兩夜自由行將會帶大家去到最後一站「正東津」。雖然江陵去正東津可以搭一般市區巴士，但因為唔太符合經濟效益，所以小編直接推薦大家搭火車「Nuriro號」。由江陵出車往正東津火車一日有八班：06:26、07:38、08:36、10:40、14:10、16:25、18:29、20:36，大約二十分鐘車程，沿途仲可以睇到沿海岸風景，建議大家可以事先喺Korail網站預約。
2022正東津自由行總整理
19. 正東津日出（정동진해변 일출）
- 地址：강원도 강릉시 강동면 정동역길 17
- 小Tips：一出正東津火車站就可以望到日出，越往Sun Cruise郵輪酒店方向嘅日出越靚。
正東津係韓國觀賞日出勝地，但大家又知唔知呢個名係點嚟呢？「正東津站」係全韓國距離海邊最近火車站，因位於景福宮光化門正東邊而得名，嚟到呢度嘅人都會被咁靚嘅東海景深深感動。車站內充滿純樸可愛小鎮風情，仲會標示每日日出時間，除咗可以選擇喺正東津過夜之外，仲有好多人會由首爾搭夜班火車嚟到睇，既熱血又浪漫。
因為火車時間關係，小編選擇前一日抵達正東津，當日日出時間大約係朝早06:05，小編大概05:40由附近酒店出發到正東津海邊，可惜天空不造美，雲層太厚，只可以隱隱約約望到少少。
正東津站曾經因為附近煤礦坑密集而繁榮，但隨住政府政策改變，正東津變為人口唔到2千人嘅小小漁村，甚至一度成為幾乎冇列車停靠嘅小站。直到1995年由崔民秀、高賢廷、李政宰等人主演嘅韓劇《沙漏》播出後，漸漸廣為人知。而家更加成為日出觀光勝地，而圖中大型沙漏一年先會轉動一次，年尾嘅時候好多人會嚟呢到觀賞新年第一道曙光。
20. 正東津日出食堂（정동진 일출식당）
- 地址：강원 강릉시 강동면 정동1길 7
- 營業時間：06:00 - 21:00、週末06:00 - 22:00
睇完日出再散個步，大家應該都會開始肚餓，正東津站附近有好多餐廳大約喺朝早6點就會開門，今日小編要帶大家去嘅係好多韓國人都會去嘅「日出食堂」，呢度出名烤黃太魚同嫩豆腐。
座位都多，有分坐地式或座椅式，亦有小包廂提供俾團體客人。
烤黃太魚（황태구이）₩12,000
阿珠媽相當親切，仲話唔夠食可以去自助吧拎伴菜，一上到檯可以聞到超濃炭烤味，烤黃太魚料理小編都係第一次食，黃太魚肉質本身偏乾，外皮酥脆，加上好似辣炒年糕辣醬，口感好特別，唔會太腥，鍾意海鮮嘅朋友可以試吓。
落單嘅時候仲會附上一碗豆腐，鹹鹹嘅湯底加上手製豆腐，食第一啖可能會有啲唔慣，但因為豆腐超香，令人忍唔住食完一啖再一啖，如果覺得太淡，可以加鼓油，係一種地道食法。
21. Haslla Art World（하슬라 아트월드）
- 地址：강원 강릉시 강동면 율곡로 1441
- 營業時間：09:00 - 18:00 年終無休
- 票價：導覽入場券（提供作品解說服務，而家因受疫情影響暫停發售）：成人₩16,000、孩童₩15,000；自由入場券：成人：₩12,000、孩童：₩11,000
- 小Tips：喺正東津站搭112或113號巴士喺Haslla Art World（하슬라 아트월드）站落車，車次大約一個鐘一班，建議大家先喺車站確認好出發時間。
最後一站小編要帶大家去到「Haslla Art World」，呢個藝術公園佔地7萬5千坪，名稱源自於新羅時代江陵地區別名。利用大自然環境將館內空間分為「松園」、「時間廣場」、「農田庭園」、「海洋庭園」、「樂之庭園」等。
戶外展示各式各樣藝術作品、美術館內更設有自然生態體驗館，係全家大細出遊好去處，館內仲設有餐廳、Cafe及住宿，參觀時間大約1個半小時到2小時左右，但小編認為有時間嘅話，不妨喺園區嘅Cafe欣賞海景再走。
美術館內嘅餐廳直接面向大海，藝術館內仲提供好多俾小朋友互動體驗活動，大人同小朋友嚟到都會好開心。
園區內展出多國內外畫家作品，每個畫作、裝置藝術都令人讚嘆，裡面嘅木偶展覽，彷彿令人再次回到童年時期，雕塑作品令人非常敬佩各位藝術大師嘅靈感。
露天展區可以望到一望無盡嘅大海，有微風吹過，加上望住呢個景，真係令人唔捨得離開。如果大家有機會去江陵，千祈唔好錯過呢個複合式藝術園區，絕對值得你用少少時間嚟參觀各式各樣藝術作品、感受大自然帶來嘅平靜。
今次小編用咗三日兩夜帶大家去玩春川同江陵，唔知呢知行程大家又滿唔滿意呢？之後會唔會都想抽少少時間去江原道玩呢？希望大家會鍾意啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
