狎鷗亭「Nudake Dosan Cafe」介紹
跟住Treasure足跡去打卡，近期韓國大熱就係呢度！cafe＋shopping一次過！
Hello，大家好，我哋係由韓國人每日提供最新韓國旅行資訊嘅Creatrip。
如果有睇韓綜《Treasure Map》ep51集，會發現Treasure去咗一間cafe，小編最後發現原來呢一間係近期大熱，唔少韓國人都會專登去食，同時仲可以喺嗰度shopping，就連之前iKON Bobby同粲右都去過添！
狎鷗亭「Nudake Dosan Cafe」介紹
- 地址：서울 강남구 압구정로46길 50 하우스 도산 B1
- 營業時間：11:00 - 21:00
- 小Tips：由狎鷗亭羅德奧站5號出口行大約10分鐘
如果講到韓國眼鏡品牌，一定唔可以唔提Gentle Monster，除咗多明星會戴之外，唔少遊客嚟到都會去買。今次小編去呢一間Nudake Dosan Cafe，樓上有埋Gentle Monster嘅眼鏡睇，想成為時尚達人，咁就唔好錯過啦！
一入到去就會俾呢到嘅藝術品吸引，非常之獨特。
之前iKON Bobby仲坐咗喺入面樓梯度影相，大家都可以學佢擺個有型pose一齊跟住打卡！
一樓有準備幾張枱同櫈，可以俾大家行到攰嘅時候坐吓。
呢度唔單只係一間Cafe，仲係可以俾大家shopping嘅地方，一舉兩得！
因為小編去之前，見到網上好多人話太遲去就會好快賣晒，所以專登喺佢開舖冇幾耐嘅時候去，點知都係好多人…喺排緊隊嘅時候，小編仲見到好多人買外賣走。
雖然好多人等，但都相對好快入到，工作人員會先俾一張落單嘅表格大家，入到去之後拎支鉛筆，就可以Mark低想食咩。以上呢啲卡片大家拎嚟做紀念。
呢度有好多唔同款式嘅甜品，大家又記唔記得Treasure之前嚟，係食咗邊一款呢？
呢度每一款甜品都好吸引，而且望落去都好似藝術品咁。
早前有段時間好流行食呢度嘅迷你牛角包，雖然細細粒，但真係好多人買，只要遲少少嚟就會賣哂。
提提大家，呢度有啲甜品可能仲未正式發售，就好似上面用冰封住嘅香蕉？真係好好奇佢係咩味道。
睇完想食咩甜品之後就可以排隊，飲品方面大家可以參考櫃檯前面嘅iPad，有啲會有圖，睇啱再落單。
呢度都算幾多位而且夠闊落，唔想坐室內，可以揀坐室外。
望住呢張枱大家有冇覺得好熟悉呢？
就係之前Treasure嚟拍韓綜嘅時候坐過！之後大家嚟可以坐返鍾意嘅成員坐過嘅位去打卡。
等咗一陣，小編叫嘅甜品同飲品都出咗嚟啦！
Peak（細份） ₩25,000
一上到枱，比起話覺得佢係甜品，更加覺得似係藝術品，之前Treasure成員就係食呢個。佢入面有好多綠茶醬，牛角包外脆內軟，同綠茶醬一齊食好夾，小編覺得三個人食啱啱好，唔會太膩。
提提大家：如果係堂食，職員講過就算食唔晒，都好難再幫大家打包。
Nu Traffle ₩9,000
呢杯係佢哋嘅招牌飲品Nu Traffle，上面放咗一粒細嘅牛角包，雖然真係好細粒但真係好好味！上面層cream好有黑松露嘅味道，咖啡偏苦，飲之前最好將佢哋攪勻。
Dutch Black ₩9,000
咖啡同黑芝麻嘅結合，以黑芝麻鮮奶做底，當冰融化後就會慢慢有咖啡味，好特別。
Blooming Berry ₩6,500（約HKD45.5）
如果唔鍾意飲咖啡，可以試吓呢杯Blooming Berry，唔會太甜，同甜品一齊食好夾。
食之前當然要影返張！小編當時係坐志焄嘅位。
食完之後可以慢慢再行上去，M層係收銀處，同時仲可以望到啲藝術品。
呢度就好似一個小型嘅展覽館咁，每一個角落都好好影，走開型格路線嘅你，一定唔可以錯過！
每一層樓都會放有一個Tamburins消毒搓手液，聞起嚟都幾香。
繼續上2樓，就會見到Gentle Monster嘅眼鏡區，呢度有唔少款式，設計簡單得嚟都幾型㗎！
如果大家唔知買咩款式好，可以睇吓iKON粲右同Bobby戴嘅款式，同偶像同款話咁易！
3樓係專賣太陽眼鏡，怕曬嘅你，係時候要入返一副啦！
因為款式真係太多，一個唔小心可能就會行好耐。
小編試戴咁同炡禹同款，實物真係好靚，大家之後都一定要嚟試吓！
每位成員都有試戴唔同款式，大家可以再睇吓搵唔搵到同款。
呢度都係其中一個打卡位，記住要喺度影返幅相。
最後一層主要係賣Tamburins嘅產品。
呢個品牌出咗好多唔同嘅hand cream、洗手液、香薰等。
就好似粲右，佢最鍾意嘅洗手液係7號。
如果睇啱想送俾朋友做手信，呢度仲有禮物套裝。
喺同一層，呢度仲有一個天台，可以望到好靚嘅首爾景色之外，仲可以喺度打返張卡。
某一個角落就會擺咗唔少藝術品，但提提大家千祈唔好掂。
除咗可以去Cafe之外，仲可以shopping，想跟帖韓國最新潮流，咁呢度你就唔可以錯過啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk