Hello，大家好，我哋係由韓國人每日提供最新韓國旅行資訊嘅Creatrip。
相信如果大家有喺異鄉生活過，最掛住除咗係熟悉嘅地方、屋企人同朋友之外，家鄉食物更加係唔少得。喺韓國可能想食中式、西式、泰式等好易搵得到，不過話要食到香港菜式真係少之又少。不過而家喺韓國嘅香港朋友唔使愁！因為喺弘大就有一間100%正宗香港味嘅「香港大排檔」！
弘大「香港大排檔」資訊
- 地址：서울 마포구 양화로23길 10-8, 2F
- 營業時間：星期二至六11:00 - 21:00 （Break Time 15:00 - 17:00） 、星期日15:00 - 21:00 、逢星期一休息
弘大「香港大排檔」優惠
- 下載優惠券，埋單嘅時候即享九折優惠（只限平日）。
- Lunch Menu都可以享有九折優惠（只限平日）。
- 如果用coupon嘅時候，有任何疑問都可以send email到help@creatrip.com。
弘大「香港大排檔」推薦理由
- 喺韓國可以食到香港料理嘅真係少之又少，如果大家之後嚟韓國食唔慣韓國嘢，都可以去香港大排檔解決。
- 色香味俱全，味道同香港平時食開嘅大排檔味道幾乎係一樣，嚟呢度好有家鄉嘅感覺。
- 唔單只係留學生至愛，每次去都有唔少韓國人喺嗰度打卡，大家都係有讚冇彈！
弘大「香港大排檔」注意事項
- 因為係即叫即整，所以需要等一段時間。
- 優惠券只限平日及堂食使用，外賣一律冇優惠。
弘大「香港大排檔」介紹
由弘大入口站3號出口望右邊，會見到一條小巷，大大個招牌寫住香港，好容易搵得到。
上到2樓之後，會見到超大「香港大排檔」招牌，望左邊牆仲會見到好多熟悉嘅香港地方。
望住呢個牆嘅油畫，真係特別有香港feel。
餐廳內部都好闊落，同時每一個角落都有同香港有關嘅招牌或配件，望住佢哋特別有親切感。
「香港大排檔」有分午市同晚市，以上嘅係午市Menu，由11:00-15:00提供。不過因為呢度長期太旺，可能會提早賣晒。
晚市Menu選擇都多，由17:00 - 21:00提供， 好多都係平時喺香港大排檔夜晚會食嘅菜式。
最後小編叫咗鮮茄焗豬扒飯（午時限定）、白切雞（午市同晚市都供應）、招牌西多士（午時限定） 、一杯凍檸茶同一杯紅豆冰。
鮮茄焗豬扒飯 （돼지고기토마토그라탕）₩16,000
講到鮮茄焗豬扒飯，第一時間應該會諗起大快活，「香港大排檔」完美地將佢個味道重現，喺韓國都可以食到！佢哋醃豬扒用咗秘製配方，好香好脆，同個汁好夾！
鮮茄焗豬扒飯只有午市提供，所以大家如果想食到，一定要早啲去，如果唔係就會好快賣晒。
薑蔥霸王雞 半隻（홍콩식닭찜 반마리 ）₩19,000
喺韓國可能成日都會食到炸雞、一隻雞、燉雞等，但食到白切雞嘅地方真係唔多。老闆為咗迎合香港人+韓國人口味，整嘅時候雞會啱啱好熟（因為韓國人見到血會以為係生唔敢食）。
雞嘅每一個部位都超嫩滑，點埋薑蔥一齊食，完全係香港風味。
招牌西多士（프렌치 토스트）₩5,500
西多士雖然睇落簡單，但要點先整得唔燶真係好考師傅功夫。喺韓國小編都係第一次食到味道完全同香港一模一樣嘅西多士！
中間仲搽咗層粒粒花生醬，真係令人超懷念。
最後再點糖漿食呢個組合完全冇得輸！不過只有午市提供，大家想食記住一定要早啲去啦！
紅豆冰（팥빙수 음료）₩6,800
呢度嘅紅豆冰好有以前懷舊茶餐廳飲嘅感覺，味道調得啱啱好，如果大家之後嚟都可以嗌佢嘅雞髀配薯條，更加有香港茶餐廳嘅感覺。
凍檸茶（아이스 레몬티）₩4,800
雖然韓國都有啲舖頭有賣雞蛋仔配檸檬茶，不過要講都有茶餐廳味道嘅檸檬茶真係只有「香港大排檔」先做得到！紅茶味好濃，再篤埋檸檬一齊飲，真係令人好回味。
走嘅時候仲會見到有一個招牌寫住「多謝幫襯」，留喺韓國太耐想食香港菜式，或者之後嚟韓國食唔慣韓國嘢，都可以嚟「香港大排檔」，保證大家一定會滿意！
弘大「香港大排檔」菜單
菜單 | 價格 |
| ₩16,000 |
| ₩19,000 |
| ₩5,500 |
| ₩6,800 |
| ₩4,800 |
點先可以享有弘大「香港大排檔」優惠？
現場消費Click下面網址下載Creatrip專屬優惠券，出示畀店員睇即可享有獨家優惠。
以上係弘大：香港大排檔嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
