大邱一日遊推介
由凌晨玩到夜晚嘅大邱一日遊推介！唔怕攰嘅你會唔會想挑戰一下呢？
Hello，大家好，我哋係由韓國人每日提供最新韓國旅行資訊嘅Creatrip。
有時去旅行為咗想玩盡啲，係唔係都試過搭凌晨機呢？但如果凌晨去到好多時舖頭都未開，到底點先可以玩得盡興？如果大家之後有計劃去大邱，呢一次嘅由凌晨玩到夜晚行程，大家一定要save底啦！
大邱一日遊推介
1. 대구국제공항
地址： 대구 동구 공항로 221
大家嚟到大邱第一步，當然目的地喺機場啦！
上圖係大家嚟到大邱機場出嚟嘅位，雖然而家因為疫情關係，冇得再飛國際線，不過相信之後疫情穩定，大家都打晒針，應該唔使等好耐可以飛到？
大邱國際機場距離大邱市中心唔遠，即使係凌晨到，都可以揀搭巴士或者的士去下一個地方。
2. 汗蒸幕（찜질방）
因為搭凌晨機，相信大家都會好攰，建議大家可以去汗蒸幕休息一陣，跟住再去瘋狂玩同購物。
汗蒸幕 | Green Villa（그린빌 사우나） | 宮殿Lavender（궁전라벤더） | 盛源NEXUS（성원넥서스） |
| 內部照片 |  |  |  |
| 地址 | 대구 중구 남산2동 665 |
| 대구 수성구 만촌동 화랑로 46 |
| 營業時間 | 24小時 | 24小時 | 24小時 |
| 價格 | 大人：₩11,000 7歲以下：₩5,000 | 大人：₩13,000 7歲以下：₩8,000 | 大人：₩9,000 7歲以下：₩5,000 |
| 특징 |
|
|
|
3. 大邱 迎日公園（대구 해맞이공원）
地址： 대구 동구 효목동 212-2
如果唔想去韓汗幕休息嘅朋友，想直接去玩，第一站想推薦大家去大邱近日公園。由機場出嚟去巴士站搭1號巴士，坐20分鐘左右就會到，喺峨洋橋站1號出口（아양교역 1번출구 정류장）落車，行一少段路就會到。或者大家亦都可以揀搭的士，大約10分鐘內就會到。
迎日公園出名係睇日出，喺度可以見到帶有代表性嘅琴湖江同八公山。每年大邱人都會嚟到睇日出或者喺度許願。
呢度有好多條步行到俾大家揀，例如有得睇瀑布或者日出橋，不過好可惜小編佢嘅當日落緊雨，同埋睇落有啲濛。
4. 國一牛骨湯（국일따로국밥）
地址：대구 중구 국채보상로 571
營業時間：00:00 - 24:00 年終無休
係咪都覺得開始有少少口痕呢？第二站小編推薦大家去位於中央路大賢Primall大邱3號出口（或中央路站4號出口）附近嘅「國一牛骨湯」。
「따로국밥」（分離湯飯）係大邱傳統美食之一，聽講佢係將牛肉湯飯（소고기국밥）＋辣牛肉湯（육개장）＋ 牛血湯（선짓국）3種撈勻一齊煮嘅湯，平時好多湯飯都會湯同飯一齊上，但呢度因為分開所以先叫做따로국밥。
呢間餐廳已經有75年歷史，佢係大邱咁多間湯飯之中最出名，由入口已經可以見到有唔少名人同電視節目嚟採訪過，由少女時代潤娥到Psy等，係唔係即刻覺得更加信得過呢？
雖然小編已經好早去到，但一樣都超多人嚟食早餐。
呢到Menu好簡單，有特別特分離湯飯（특따로국밥）₩9,000、分離湯飯（따로국밥） ₩8,000、分離湯麵（따로국수）。如果想要飯、牛血、麵可以另外再加。 當中小編揀咗最基本嘅分離湯飯（따로국밥）。
分離湯飯（따로국밥） ₩8,000
落完單唔使2分鐘，小編叫嘅湯飯已經出咗嚟啦！因為韓國大多數嘅湯飯餐廳，都會用一日以上時間去熬煮大量湯，希望令到味道更濃郁，所以上菜嘅速度都好快。
配埋辣蘿蔔、泡菜同蔥一齊食會更加好味！雖然望落去好似紅卜卜，但唔算好辣，小朋友都可以食得到。
長時間熬煮嘅湯底，加上煮得耐變軟嘅大蔥同蘿蔔，對於平時唔鍾意食蔬菜嘅小編嚟講，都忍唔住要不斷食。
分離湯飯仲有一個精華係入面有牛血，食落好似食緊啫喱咁，喺大邱、慶北等地區先會成日食到，不過都唔係人人會鍾意，如果唔想食可以提前同職員講唔好加。
建議大家食嘅時候可以加埋韭菜，會更加好味！
5. Lucid Cafe （카페 루시드）
地址：대구 중구 동성로4길 94
營業時間：每日 12:00 - 21:30（新年、中秋休息）
食完飯又點可以唔去飲杯咖啡？小編極力推薦呢一間Lucid Cafe，由國一牛骨湯行過去10分鐘左右就會到。
呢度最出名嘅就係布甸刨冰（푸딩빙수），不過佢哋嘅曲奇同麵包麵一樣受歡迎。
最後小編叫咗呢到嘅化表布甸刨冰（ 푸딩빙수）、鹹焦糖瑪德蓮蛋糕（솔티드 캬라멜 마들렌）同Sunrise Popping（선라이즈 팝핑）。內部空間都較大，而且佢哋提供嘅櫈都好舒服，想搵個地方休息呢度就最好不過。
布甸刨冰（푸딩빙수） ₩17,000
係咪睇相已經覺得好吸引咩！上面淋咗吉士醬同焦糖，中間仲有一個超大嘅布甸。
只要食一啖已經會覺得精神晒！真係冇諗過布甸同刨冰係可以咁夾！
鹹焦糖瑪德蓮蛋糕（솔티드 캬라멜 마들렌） ₩3,000
另外呢一個鹹焦糖瑪德蓮蛋糕，因為加咗少少嘅鹽，識落甜甜地又鹹鹹地，好特別。
Sunrise Popping（선라이즈팝핑） ₩7,000
Lucid Cafe有好多飲品望落去都好靚，最後小編揀咗Sunrise Popping，佢最底係椰青，上層係新鮮嘅水果沙冰，炎炎夏日飲番杯最正！
6. Habbi （해삐）
地址：대구 중구 동성로2길 35 1층
營業時間：每日 12:00 - 22:00 年終無休
食完飯飲完咖啡係唔係叉好哂電，可以開始瘋狂shopping呢？小編想同大家介紹東城路附近嘅一間Habbi精品店。
一入去就會見到好多可愛公仔同各式各樣文具，每一款都好吸睛。
最近韓國都慢慢多咗呢啲精品店，如果大家有睇啱，都可以喺度買當做手信亦都OK！
甚至呢度仲有BTS嘅模型！係A.R.M.Y會唔會都想買返個呢？
7. 東城路SPARK（동성로태왕스파크）
地址：대구광역시 중구 공평동 61 4F
營業時間：12:00 - 22:00 年終無休
有冇認過喺大邱嘅市中心竟然有一個小型遊樂場？今日小編就帶大家睇吓冇啲咩啦！
呢度就係小編要同大家介紹嘅地方SPARK LAND！喺東城路SPARK 上6-9樓就到，樓下有好多餐廳、Cafe、服飾店，玩完之後都可以繼續去Shopping。
無論係大人定小朋友嚟到都可以玩得超開心！呢度大大嘅摩天輪緊係大邱嘅地標，好多人都會喺度打卡！
呢度入場費係免費，不過如果想玩遊戲就要另外俾錢，小編最後買咗一張Big2券（₩9,000），可以揀2種遊戲去玩。
第一個小編先揀嘅當然就係坐摩天輪啦！
小編去嘅當日天氣有啲濕熱，原本怕搭摩天輪內部好焗，但好彩車廂入面有冷氣，可以舒舒服服咁欣賞大邱風景。
可以喺咁高嘅地方望哂成個大邱東城路小巷，真係好正。
第二個小編決定玩嘅就係呢個DISKO！佢會不斷左右轉之後再升高，有點似玩緊海盜船咁，相當刺激！
因為佢係喺摩天輪嘅另一邊，所以當大家玩DISKO佢升起嗰一刻，大家可以望到大邱市另一邊風景。
除咗小編體驗完嘅呢兩個遊戲之外，呢度仲有跳樓機、咖啡杯等，雖然規模唔算大，但都可以玩得好開心！
8. HAPPY VILLAINS（해피빌런즈）
地址：대구 중구 동성로6길 61태왕스파크 5F 6F
營業時間：平日12:00 - 21:00（最後入場時間20:00）、週末12:00 - 22:00 （星期六最後入場時間21:00）
除咗SPARK LAND之外，喺同一幢大廈嘅5樓同6樓仲可以玩HAPPY VILLAINS，佢係一個室內版遊樂場，入到去可以體驗唔同項目，一樣都超好玩！
大家可以先喺6樓買入場券，呢度有分室內運動場或者室內Roller兩種，室內運動場3個鐘券未滿14歲係₩25,000，而成人係₩25,000。
不過今次小編揀咗踩Roller，呢度職員識講外語，大家唔需要擔心溝通上有問題，未滿14歲（小學生）價錢係₩8,000、14歲以上（中學生）以上係₩10,000，買完之後就可以入場任踩一個鐘，另外如果大家冇帶襪，可以直接喺現場買，一對係₩1,000。
入到去之後揀啱Roller鞋嘅size同戴好安全裝備就可以出發啦！
韓國之會流行踩Roller，都係因為自從韓劇《請回答1988》播出，復古風再次與起，配埋呢度嘅五彩十色嘅燈光加音樂，就好似瞬間返返去80年代嘅感覺，喺韓國超有人氣。唔單止可以同朋友或者屋企人去，其實自己一個去玩都可以好開心！
9. 東亞木匠（동아목동）
地址：대구 중구 국채보상로125길 14
營業時間：11:30 - 20:00 （Break Time 15:00 - 17:00 ）、 逢星期一及每個月最後一個星期二休息
玩完咁刺激嘅活動之後，大家係咪都開始有啲肚餓呢？小編想同大家介紹呢一間東亞木匠餐廳，佢係專食韓式料理，唔單只係大邱，而家喺各個地區都超有名，聽講Break Time完之前已經有人喺度排緊隊。
17:00一開門，就已經要寫Waiting List，等咗40分鐘左右之後先可以再入去，可見佢人氣相當高！不過只要食完，就算等耐啲都覺得係值㗎！
佢哋主要係用大邱、慶尚北道健康料理去煮，喺唔同季節去，更加可以食到唔同嘅韓式料理。今次小編去嘅時候係夏天，材料用到唔少芝麻葉同埋紫蘇籽油去整。
小編去到嘅時候叫哂3款呢度主打Menu，而家就逐一為大家介紹。
牛肉紫蘇葉湯麵（차돌 깻잎 국수） ₩12,000
第一個想同大家介紹嘅係牛肉紫蘇葉湯麵，湯底味道超濃，配埋薄片肥牛，真係好正。
如果你本身都鍾意食紫蘇葉，呢一款絕對唔可以錯過。
紫蘇籽油麵（들기름국수） ₩9,000
係用咗慶尚道磨坊直接醃製嘅紫蘇籽油，再同爽口嘅麵一齊撈嚟食。呢款料理相當有特色，推薦大家嚟到要試吓！
雞蛋紫菜包飯（계란김밥）₩8,000
呢個雞蛋紫菜包飯，幾乎每一個人去到都會必叫！中間放咗超厚嘅雞蛋卷，當食緊其他料理嘅時候覺得有啲膩，只要食佢即刻可以中和返。
之後去大邱唔知食咩好，不妨考慮去呢一間「東亞木匠」啦！
10. THE DIFFER（더디퍼）
地址：대구광역시 중구 서성로 67
營業時間：每日 10:00 - 22:00
最近呢間The Differ喺SNS相當紅，食完飯想搵個地方休息可以去呢間Cafe。
呢間Cafe唔單止夠大，而且好多打卡位，配埋呢度嘅燈光，真係可以影到好多人生照。
不過當中佢會咁hit，係因為呢度有一個位係可以同好多隻比熊犬一齊打卡，真係超可愛！
另外呢個掛滿唔同鐘嘅位都好多人企喺前面打卡，俾人一種好型嘅感。
呢度唔單止有咖啡，仲有紅酒、包類等！
如果大家打完卡唔想坐喺入面飲，都可以揀外賣，最後小編叫咗佢哋嘅招牌朱古力鮮奶飲品。
今次同大家推薦嘅大邱一日遊，唔知大家滿唔滿意呢？希望大家都會鍾意今次小編嘅分享啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk