Hello，大家好，我哋係由韓國人每日提供最新韓國旅行資訊嘅Creatrip。
唔知大家每一次影相，會唔會都覺得好唔自然，唔知點樣去掌握角度影到靚相？今日小編想教大家一啲韓星平時自拍，鍾意嘅角度，學識之後影靚相話咁易！不過今次教學需要用到一塊鏡，大家記住準備好啦 ！
韓星對鏡影相Pose教學
1. 坐底對鏡影顯長腿
好多時對鏡影相，想顯長腿可以點做？秘訣就係地下唔好留太多空白位，要啱啱影到對鞋，咁就可以顯得有長腿！如果留太多就會顯得好矮同肥。
唔單止女仔，男仔一樣都可以照用，睇落casual得嚟，又有少少型！
坐地下或櫈一樣得，交叉腳會顯得腳長啲，而感覺唔會咁死板！
2. 企高對鏡影顯長腿
比起坐低影，企高更加可以拉長成個人嘅比例，同樣都係將雙腳貼喺相機嘅底線，上面留少少空白位，以iPhone鏡頭嚟睇4:3/16:9一樣都可以影到腿長（其中一條腿稍稍微曲更有美感）！
3. 鏡同手機近距離自拍
唔好以為近距離影一定會顯肥，相反可能其實係會有顯瘦效果！
不過有一個Tips係，手機一定要打直影，咁樣會睇落更修長，打橫影會顯得闊同肥。另外比起望鏡頭，望手機畫面會顯得更加自然。
4. 開閃光燈
大家可能會諗：「開閃光燈唔係只係影到一粒點，太光咩都影唔到咩？」小編一開始都有呢個疑惑，之後再試同埋睇吓韓星點影，發現只要手機拎遠少少就可以。
咁樣影睇落個人仲會顯白啲添！
5. 用唔同鏡影出多角度
如果大家覺得自己係零死角，想影出自己最靚最有自信嘅一面，可以運用多塊鏡影出唔同角度！
鏡會因為唔同擺位而影出唔同角度，大家可以擺好一個最適合嘅角度再慢慢影。
6. 運用車身兩邊倒後鏡
想影啲比較特別嘅對鏡相，都可以用車側邊兩塊倒後鏡，可以記錄低自己當日去緊邊度留底回億。
不過提提大家，最好唔好係揸車嘅時候影，如果唔係會影響揸緊車嘅人，可以喺停低嘅時候先慢慢影。
7. 車內鏡自拍
除咗車兩邊倒後鏡之外，車前駕駛位同副座位都有一個可以用嚟遮太陽嘅摺板，多數打開之後都會有一塊鏡。
8. 只影面部1/3
覺得自拍會好尷尬，可以試吓只影面部1/3，咁樣就自然得多，而且顯得面細！
學識晒以上嘅Pose，以後要影相話咁易
如果有更多想知嘅內容，都可以隨時留言或者dm話俾我哋知：）
Instagram：creatrip.hk
