Hello，大家好，我哋係由韓國人每日提供最新韓國旅行資訊嘅Creatrip。
平時睇韓劇或者綜藝，好多時我哋只會留意到幕前嘅成員，但忘記咗背後其實有一班幕後功臣。好多人都想入電視台做嘢，不過現實生活中係咪我哋睇到咁風光同幸福呢？今日就等小編為大家揭露喺電視台做嘢真實生活係點過㗎啦！
韓國電視台工作實際生活
1. PD係點解？
PD（Program Director or Producer）係負責電視節目策劃、製作、導演、播出等各個環節。同時佢哋仲要心水清，要了解到觀眾鍾意睇咩，去諗一啲創新Idea，另外仲要負責人力資源管理、控制預算等。
2. 點先可以做到PD？
대학내일
喺講點成為PD之前，小編想同大家解釋一下，PD唔一定會係隸屬於電視台，通常叫做廣播PD，就係播放嗰個節目嘅電視台入面一個正職員工，不過實際嚟講，真正喺隸屬於電視台嘅正職PD其實唔多。
雖然有好多人都會想做電視台嘅PD，不過因為競爭大，要做都唔係一件易事，喺韓國最出名嘅電視台有KBS、MBC、SBS、tvN、JTBC等，聽講喺公開招聘嘅情況下，競爭率高達1000:1！
因為要成為PD嘅過程實在太難，所以韓國會叫呢個過程做「言論考試」（언론 고시），喺韓國考高級公務員嘅話要考5級嘅試，同樣地做電視台PD一樣要考個差唔多難度嘅試。
咁電視台平時會點樣公開招聘呢？小編就以目前MBC網站嘅公告做例子講解俾大家聽啦！
第一就係要準備好自我介紹，喺韓國有好多人都會想做PD，雖然做PD冇話一定要指定嘅學校或者讀咩專科，不過如果想喺電視台做，基本上學歷都相當之高。
例如大家都會熟悉嘅羅暎石PD，佢畢業於延世大學，金泰浩PD畢業於高麗大學，以及製作《請回答吧》系列同《機智醫生生活》嘅申元浩PD，畢業於首爾大學，呢三間大學就係鼎鼎大名，全韓國嘅Top3 大學--S.K.Y.，要入去一啲都唔簡單。
시사IN포토
第二就係寫作，聽講呢個係最難嘅一關，雖然做電視台PD好多時只係拍片，不過文筆方面都好重要，要點樣寫一個好劇本，都要有好好嘅組織能力，同埋要寫到一點說服到人，真係超高難度。
第三就係面試，每一間電視台要求嘅面試風格都唔一樣，不過對於請PD嘅面試，就會特別苛刻。以MBC 2021年公開招聘為例，主要分為三個階段：能力面試（역량면접）、多方位深層面試（다면심층면접）同最終面試（최종면접）。
只要經歷以上嘅過程，你就可以成為1000分之1，1000名競爭者中唯一嘅合格者成為PD。
咁其他如果唔屬於電視台嘅PD係點嘅呢？佢哋多數都係外包製作公司，或者係自由工作者。
因為一個電視台有無數個節目，電視台嘅PD唔能夠負責晒電視台內所有嘅節目，所以有時都會外判俾其他外包製作公司，因為頭先都講到要做電視台PD要由1000人爭同一個位，所以係要有熱情同熱愛呢份工，先會繼續揀呢條路。
基本上一開始會由普通媒體公司做起，之後慢慢儲經驗，再成為一位有能力嘅PD。
3. PD助手（助理指導）
即使已經係合格，入到去電視台做嘢，都唔可以話即刻可以做到一個節目嘅總指導者。要成為一位主持節目PD，至少要做五年助理指導，加加埋埋平均可能要做七年先得。
要成為一位出色PD，好多事都要由低做起，當中包括演員招募、揀拍攝地點、時間分配、預算管理、編輯同拍攝等，所有都要一手一腳去做，助理指導要做嘅嘢多到數唔晒，聽講係會永無止境，有時忙到可能一星期都返唔到屋企一次。
另外，喺電視頭做，系統都冇想像中咁好，會相對保守同埋有好多唔合理同暴力嘅做法。例如2016年10月，tnV電視劇《獨酒男女》，當時助理指導係이한빛（音譯：李漢光），喺劇完結之後第二日自殺，當時佢只係入職10個月。
喺拍攝55日當中，李漢光只係休息咗兩日，聽講當時佢每日做到凌晨四點，返屋企休息一陣，換件衫朝早六點又要出嚟做嘢，甚至當時佢仲聽到啲侮辱性嘅說話，所以由助理開始，已經可以睇得出係一件好辛苦嘅工。
4. 主PD
經過助理指導培訓後，就可以成為一位主PD，自己策劃一個節目，雖然佢哋工作量可能會比助理少，但佢哋嘅負擔更加大同重。唔同嘅節目需要嘅人才都唔同，不過普普通通一個節目最少都需要30至40人，要同到咁多人溝通，真係好需要一個好有指導能力嘅人去做。
另外要用自己名去做節目，收視率好唔好都係一個壓迫感，因為唔係自己一個做，同時係好多人一齊分擔，所以收視率好，負擔先冇咁大。
5. 年薪
每一位PD嘅收入都可以差好遠，電視台嘅PD同出面外判嘅PD比，有可能會平均相差三至四倍。另外亦都要好睇業績，唔同節目有唔同嘅製作費，當中亦都要達到指定目標收視率，聽講如果達成指定收視率，同埋出口到外國，咁另外就會得到巨額獎金。
根據Kreditjob顯示，2016年每一間電視台年薪都會有少少差異，不過平均都係4,000萬won以上（約HKD280,000）。呢個年薪類似係大學生畢業去大公司做嘅一樣。相反如果係外包製作公司，一開始只會係最低工資，大約係2,000萬won（約HKD140,000）。喺過去幾年前，聽講有啲外判PD一個月先係得80萬won（約HKD5,600）。
當然如果係「星級PD」，佢哋每個計劃/工作都好成功，有好成績嘅話，佢哋就會賺好多錢。就好似《兩天一夜》、《新西遊記》、《尹食堂》等由羅暎石PD創作嘅節目，喺2008年佢得到嘅獎金已經有40億韓幣，呢個金額有傳仲比CJ會長同副會長年薪更高！製作《請回答吧》系列同《機智醫生生活》嘅申元浩PD，喺2018年都賺咗28億韓幣，相當厲害！
作家係做咩？
作家主要係有分兩種，一種係寫電視劇嘅劇本，另一種係寫綜藝或者時事嘅劇本，佢哋要參與節目計劃、構圖，寫劇本等。除咗寫劇本，佢哋仲要輔助幫PD手。
2. 點先可以做到作家？
寫電視劇同寫電視台節目劇本嘅作家性格好唔同，所以要成為作家都有唔同方法。
한경닷컴
如果想成為電視劇作家，只要參加電視台或者電視劇舉辦嘅寫劇本比賽就有機會，不過要入呢行門檻好窄，要寫一個好嘅劇本同時，真係要花好多時間去練習，就算寫完都要有製作人欣賞先得，所以永遠都係無了期咁等。好多時作家都係自由工作者，所以佢哋冇職級，就連年薪都好難計。
電視台作家其實冇正式嘅公開招聘，大部份都係自由工作者或者係合約制形式去合作，咁有咩方法可以成為節目作家呢？
第一，最好係識人，因為作家主要係協助主PD工作，如果PD覺得你係適合人選，咁就可以一齊做嘢。
第二，去學院，喺韓國有唔少關於想做作家而設嘅學院，如果已經讀完，學院都會安排一啲廣播節目俾大家做。
第三，透過求職網睇吓有冇關於節目作家嘅資訊，如果有睇啱就可以send cv去試吓。
3. 忙內作家
係身為作家排名最低，佢哋主要負責協助高級作家（前輩），要做嘅嘢有好多，譬如研究節目嘅數據、調整日程、幫助編輯等。要經過呢啲程序，先會慢慢知道一個節目係點做同訓練到能力。聽講有時仲要負責去影印同準備節目材料同零食等雜務。
雖然聽落好簡單，但做嘅嘢就好多，所以有60%嘅人曾經會因為要做嘢事太多，而放棄成為作家嘅夢想。
4. 副作家
做忙內作家通常係做三年左右，之後就有機會升級做副作家，當中主要係一個節目入面負責其中一個項目，要自己寫劇本，同有巨大責任感。
5. 主作家
오마이뉴스
如果做滿10年作家，就會升做主作家。到時要負責嘅唔止係一個項目，而係整體，除此之外仲要負責確認忙內作家同埋副作家嘅工作，另外要同PD一齊傾節目嘅大方向，擔任非常重要嘅角色。
6. 作家年薪
如果係比較出名嘅作家，就好似寫過好多代表作嘅金銀淑作家，當時佢寫嘅韓劇《陽光先生》，原稿同契約金一集已經係1億韓幣以上，大約嗰時加埋已經收到20億韓幣。
雖然聽落好似都搵好多，不過都好大風險，因為作家唔會有固定嘅時薪/月薪，佢哋係以集數去計。就算幾努力都好，如果電視台唔滿意，都唔會得到任何嘅報酬。
忙內作家一集大約會收到40萬韓幣左右（約HKD2,800），一個月大約有160萬韓幣（約HKD10,700）。隨住年資同埋經驗多，搵嘅錢都會越嚟越多。主作家可能一集會係150萬-200萬（約HKD10,000 - 14,000）一個月最高可以賺600萬-800萬韓幣（約HKD42,000 - 56,000）。
唔單止工作量多，就業又唔算穩定，所以非常辛苦。
雖然平時可以見到PD或者作家可以近距離見到偶像或者藝人，睇落多姿多彩，但其實幕後嘅工作一啲都唔簡單。
做幕後好多時未必係令觀眾記得，不過希望大家都會知道佢哋嘅努力，每一份工作或者崗位都唔簡單。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
