Hello，大家好，我哋係由韓國人每日提供最新韓國旅行資訊嘅Creatrip。

大邱係韓國第三大城市，小編之前都介紹過唔少旅遊熱點，今日特別再整理一篇韓星都去過嘅大邱熱門景點，大家一齊嚟跟住打卡啦！

韓國藝人都去過嘅大邱熱點

啟明大學 大明校區

계명대학교 대명캠퍼스

• 地址：대구광역시 남구 대명동 명덕로 104

第一個想介紹嘅地方係位於大邱嘅啟明大學大明校區。 好似首爾嘅梨花女大、慶熙大學咁，啟明大學係大邱超熱門嘅大學校園景點，學校靚到有「韓國的小哈佛」之稱添！

如果係Seventeen嘅fans就一定認得呢張相！ Seventeen隔兩年到訪啟明大學大明校區，拍攝 만세 Part Switch Ver. 同 울고 싶지 않아 Part Switch Ver. 。另外仲有《花樣男子》、《黑祭司》、《意外發現的一天》、《陽光先生》等多套電視劇、電影都喺呢度取景。

呢度係啟明大學大明校區嘅大明本館，係Seventeen兩次嚟拍攝嘅地方！ 喺林木繁茂嘅路口盡頭可以見到好靚嘅建築。

紅磚屋被青藤覆蓋，白色嘅柱同屋頂成為亮點，散發住異國風情。 Seventeen嘅MV就用呢個建築做背景，配合佢哋帥氣舞蹈，超有魅力！

呢度就係《陽光先生》男女主角野餐嘅場地。 

大家都好似《陽光先生》嘅高愛信同崔宥鎮咁坐喺樓梯度食三文治，休息吓，應該好寫意。

另外，大明Shattuck館、大明의양館、露天禮堂等啟明大學校園入面嘅其他建築都好靚。 去大邱旅行嘅話，不妨去啟明大學大明校區散吓步，親身去吓韓國電視劇、電影中出現嘅拍攝地，會係另一種樂趣！

前往方法

大邱地鐵3號線2號出口出嚟之後，穿過十字路口沿着巷仔行大約 5 分鐘就到。

第一炭火烤腸

제일숯불막창

• 地址：대구광역시 수성구 황금2동 841-2
• 營業時間：每日 17:00 - 02:30

大邱最出名食烤腸，其實係牛或豬嘅胃（又稱牛腸/豬腸），食落好有咬口。 由1970年代初開始，大邱盛行用炭烤腸，呢個文化慢慢擴散至全國，而家已經成為韓國各地隨處可見嘅食物。不過始祖就係始祖，好難搵到好似大邱一樣咁好食嘅地方。

大邱有好多間烤腸美食店，今日為大家介紹嘅係IU喺《孝利家民宿》食得好滋味嘅「第一炭火烤腸」。 

去「孝利去民宿」嘅遊客入面，有5個係嚟自大邱嘅同事。佢哋喺「第一炭火烤肚」外賣新鮮嘅烤腸，帶去濟州島同民宿嘅人一齊分享。 IU食得津津有味，引起話題。 小編都過去呢間IU都鍾意嘅烤腸店！

果然係美食店，室內空間相當大，但人氣超旺，所有枱坐滿哂人。 平日接近夜晚9點，仲係好多人。

牆上貼滿嚟過嘅名人，佢哋嘅簽名，同埋拍攝《孝利家民宿》嘅相。

呢度有賣牛腸同豬腸，最少要叫3人份，所以小編叫咗1人份牛腸同2人份豬腸。

小菜就比較簡單，有包住烤腸嚟食嘅芝麻葉、生菜，同青瓜、大蒜、包飯醬。 

而呢度最特別嘅係點烤腸食嘅調味醬，個醬係用韓國傳統大醬製成，但比大醬稀啲、甜啲。 

連埋啲蔥、水芹菜、辣椒撈埋一齊食，更加完美！

左邊有切開一塊塊嘅係牛腸，右邊圓碌碌嘅係豬腸，小編就決定烤豬腸食先。 

豬腸(돼지 막창 /1人份, 150g) ₩10,000

可以將圓碌碌嘅豬腸就咁放上鐵板度燒，又或者剪開變成扁平形狀再燒，等熟透之後就可以食啦！

小編用咗個幾方法嚟食烤腸。 第一個方法係齋食烤腸，將烤腸點上面介紹嘅醬，同芹菜、蔥、辣椒一齊食。 辣醬特有嘅甜味，加埋蔥、芹菜、辣椒嘅香味，好夾。

第二個方法係包菜食，將豬腸連埋大蒜等放上生菜或者芝麻葉度，加少少包飯醬一齊食，真係好香又有咬口。 小編本身仲擔心有陣豬內臟嘅特別味道，不過咁樣食真係好好味！

牛腸(소 막창 /1 人份, 150g) ₩15,000원

食完豬腸之後，就換個鐵板轉烤牛腸。 牛腸嘅價錢比豬腸貴，味道都好味啲！

一樣可以好似頭先咁齋點醬食，或者包菜食。牛腸比豬腸更加香純、更加煙韌，鍾意有咬口嘅朋友應該鍾意牛腸多啲！小編就覺得豬腸同牛腸都好好味，而呢間「第一炭火烤腸」有獨門醬汁，令到烤腸嘅味道更加鮮美。

前往方法 

由大邱3號線兒童會館站1號出口出嚟，經過左邊嘅馬路之後，靠住左邊直行。 到第二個街頭轉入去，再行一分鐘就到。

柳樹食堂

버들식당

• 地址：대구광역시 달서구 성당1동 118-1
• 營業時間：每日 12:00 - 22:00（Breaktime：15:00 - 17:00）

今次想介紹嘅係位於大邱頭流公園正前嘅柳樹餐廳。 呢度由1967年開業，已經營運咗3代，係歷史悠久嘅烤腸火鍋專門餐廳，亦係韓國文化觀光部選定嘅全國100大美食店。 

50年嚟，好多大邱當地人同遊客都去「柳樹食堂」。 2018年出演jtbc綜藝節目《夜行鬼怪》嘅FTIsland李洪基、NU'EST JR都嚟過呢度一齊食飯！

打開老式嘅門行入去，中間有條長長嘅走廊，兩邊都有房。 每個房都有1-2張左右嘅枱，感覺好溫馨。

呢度嘅menu大致分為火鍋（전골）同調味烤腸（양념 구이），但係呢度出名食火鍋，所以小編都叫咗呢度嘅招牌火鍋。 加上呢度所有嘅菜式都係至少叫兩人份，所以小編都叫咗兩人份。

夢幻的味道（三合火煱）（환상의 맛 (삼합 전골)  /1 人份, 250g) ₩17,000

中間嘅烤盤係「夢幻的味道」嘅三合火鍋，仲有各種小菜：涼拌生菜、豆芽、魚餅、薯仔沙律等，味道都唔錯。

韓國人食呢種熱辣辣嘅火鍋時都會飲燒酒，所以小編都叫咗一支！ 煮到熱辣辣嘅火鍋入面，放滿芝麻葉同金針菇。職員上菜嘅時候已經差唔多熟，所以只要等多一陣完全熟透再食就可以。

呢個火鍋最大嘅特點係包晒，小腸、大腸同烤肉三樣！ 出演《夜行鬼怪》嘅藝員都係呢個原因而揀咗佢。有咬口嘅小腸、香噴噴嘅大腸、軟腍腍嘅烤肉，真係一如其名「夢幻的味道」。

雙拼配料 (반반사리) ₩ 1,000

食到咁上下，再加即食麵同烏冬，真係超飽、超滿足！ 不愧係堅守咗50年嘅美食店！

前往方法

喺大邱2號線地鐵頭流站落車之後，9號出口出嚟前面嘅巴士站搭503號巴士。 經過頭流公園同E-world之間，5分鐘左右，喺頭流公園十字路口2站落車，過行人馬路之後就到。

中央炒年糕

중앙떡볶이

• 地址：대구광역시 중구 동성로2가 동성로2길 81
• 營業時間：每日11:30 - 20:00 (賣完即止)，每月第一個星期日休息，之後逢10、20、30號休息

今次要介紹嘅係位於大邱中心東城路嘅中央炒年糕。 呢度都開咗30年，唔只受到大邱當地人嘅喜愛，仲深受遊客歡迎嘅嘅小食店。

《白種元的三大天王》節目入面，介紹大邱三大炒年糕美食店時都出場過，白種元食炒年糕嘅片段播出之後，更加多咗人慕名而來。連白種元都認可嘅美味炒年糕店，小編緊係都要跟住去試食啦！

舖頭入口嗰度就可以見到職員喺一個超大嘅鐵板上炒年糕。呢個炒年糕嘅方式都係韓國傳統嘅小食店風格！

舖頭中間同牆嘅兩邊都有長枱。 雖然空間唔算好闊落，但係呢種Bar枱形式嘅座住設計，可以容納到好多人。 平時都好多人要排隊等，小編就避開咗午飯時間，好好彩咁唔使等就入到去！

牆上面貼咗嚟過名人嘅簽名，有韓國國家代表足球選手、演員安在旭、2PM成員Jun K等等！ 聽講呢度係名人強烈推薦嘅地方，所以更加期待。

小編都叫咗呢度嘅招牌，白種元都食過嘅menu！

米年糕 (쌀떡볶이) ₩4000

又長又厚嘅年糕，加埋魚糕，鋪上紅啵啵嘅醬料！ 唔知係咪因為係用米做嘅年糕，所以比用麵粉做嘅年糕更加煙韌同香純。

小編唔係咁食得辣，所以有啲擔心，但係呢度嘅辣炒年糕醬一啲都唔辣，就好似白種元講嘅一樣，醬料入面加咗咖喱粉，食到好香嘅咖喱味，連埋椰菜一齊食，甜中帶少少辣，好過癮！

扁餃子 (납작만두) ₩4000

扁餃子係大邱出產嘅扁型餃子，將餃子嘅餡減到最少，將餃子皮壓薄後用油煎出，可以話係大邱小食店嘅必有嘅出名菜式。 呢度嘅扁餃子仲會鋪滿炒年糕醬汁添！

扁餃子沾滿炒年糕汁，就咁食都好好味，但同埋炒年糕一齊食嘅話，佢嘅價值先體現到出嚟！ 用扁餃子包住炒年糕一啖咁食，口感更加豐富，更加好味。

前往方法

由大邱1號線中央路站2號出口出嚟之後，行入左邊巷仔，見到2.28紀念公園時，再轉入右邊小巷，第三座建築物就係中央炒年糕。

壽鳳飯店

수봉반점

• 地址：대구광역시 북구 대현2동 321-70
• 營業時間：平日 11:00 - 15:00、星期六/假期 10:20 - 15:40、星期日休息

呢間壽鳳飯店同啱啱介紹嘅中央炒年糕一樣，係《白種元的三大天王》中介紹過，有20年傳統嘅大邱美食店。 大邱5大海鮮麵店，亦係中華拌飯餐廳中最有名嘅地方之一。

壽鳳飯店任何時候都有好多人等位，所以有一個非常特別嘅營運方式運，攞到飛之後，喺指定嘅時間內幾個人一齊入去。 

好似上面嘅表咁，10:20（星期六/假期） 、 10:55、11:30、12:05、12:40、13:20、13:55、14:30、15:05、15:40（星期六/假期）等前一個時間段嘅客人全部離開之後，一次過整理全部嘅枱，然後擺放下一個時間段嘅枱。

小編係13:30到，13:55嘅時間段已經截咗，最快就要等到14:30。不過因為只要按時去到餐廳門口就可以，所以喺餐廳門口等，或者去其他地方行住等。 附近係大邱大型市場之一嘅七星市場，所以行完再返嚟。每張飛都有號碼，到入場時間，老闆會喺門口嗌，嗌到自己嘅號碼時入去就可以啦！

正如上圖所見，舖頭入面唔大，大概有7-8張枱，即係話一個時間段只可以入到7-8隊。 

小菜非常之簡單，係韓式嘅中華料理店最基本嘅小菜，有醃蘿蔔、生洋蔥同春醬。

中華拌飯 (중화비빔밥) ₩8,000

小編叫咗個中華拌飯！呢種中華拌飯同其他地方食嘅唔同，好難喺大邱以外嘅地方食到！

首先，跟住白鍾元喺節目中介紹嘅，先舀一啖海鮮麵湯嚟試吓，入面翠玉瓜、洋蔥、蔥等多種蔬菜同海鮮，個湯嘅味道好濃又帶辣。

終於試到期待已久嘅中華拌飯。 中華拌飯同海鮮麵好唔同，唔係用海鮮為主菜，而係以梅頭肉為主。 

洋蔥，翠玉瓜，梅頭豬肉，再用鮮紅嘅醬汁撈勻啲飯一齊食，個醬甜甜地，辣辣地，再加上中華料理特有嘅香味，真係好好味！ 一啖一啖咁食唔停口，不愧係大邱嘅名勝！ 如果大家都想食只可以係大邱食到嘅中華拌飯，一定要去壽鳳飯店試吓啊！

前往方法

由大邱1號線七星市場站4號出口出嚟，行過左邊見到嘅橋之後，行入左邊嘅小巷就到。

8號食堂

8번 식당

• 地址： 대구광역시 중구 서성로1가 59-1
• 營業時間：星期一至五 08:00 - 24:00、星期日 08:00 - 21:00

呢間8號食堂係一間擁有40年傳統嘅湯飯美食店，韓國人鍾意嘅豬肉湯飯本來嚟自慶尚道。  8號餐廳雖然都有賣豬肉湯飯，但比起只放豬肉嘅豬肉湯飯，血腸湯飯就更加出名！

雖然係一間歷史悠久嘅餐廳，但因為最近先裝修好，內部非常整潔。 枱同枱之間嘅距離都好大，可以好舒服咁食飯。 加上而家新冠肺炎，每張枱之間都設置咗透明板。

入口處掛咗嚟過嘅藝人簽名。 特別嘅係，唔係簽喺紙度，而係簽喺碟度！ 有大邱出身嘅名人、ZE:A嘅成員，仲掛咗同PSY嘅合照添！

呢度主要有肉類同湯飯兩大類嘅menu，小編就揀咗呢度出名嘅湯飯嚟試吓。

小菜非常簡單，有kimchi、洋蔥、辣椒，同埋掠拌野菜。 涼拌野菜係將椰菜、生菜等新鮮蔬菜用酸酸甜甜嘅調味料，加埋香噴噴嘅蘇籽油拌成，清脆可口，令人胃口大開。

血腸湯飯 (순대국밥) ₩8,000

小編叫嘅血腸湯飯係用石鍋裝住，夠晒熱，上面仲放咗蔥。

呢度嘅血腸湯飯喺食之前一定要先調味。 鹽、調味辣椒醬、胡椒（由左到右）。 如果鍾意鹹味，可以放鹽；如果鍾意辣辣哋，可以加調味辣椒醬，鍾意再刺激啲嘅彈以加埋放胡椒，按個人喜好加就得㗎啦！

湯飯入面有好幾個圓碌碌嘅血腸。 一般嘅血腸皮都係薄而半透明。呢度嘅就用又厚又優質嘅牛肚做血腸皮，所以更有咬口，味道更加濃郁！

肉湯都係用盡心血熬製而成。 冇豬肉特有嘅膻味，少油，清清地！ 大家想食大邱最正嘅血腸湯飯，一定要去8號食堂！

前往方法

由大邱地鐵3號線西門市場站1號出口出嚟之後，轉右直行，去到十字路口就過左邊嘅馬路，再直行一個街口，轉入左邊嘅小巷就到。 

C'est la Vie音樂茶房（已結業）

쎄라비음악다방 (폐점)

地址：대구광역시 중구 성내 2동 쎄라비

最後要介紹嘅地方係C'est la Vie音樂茶房。C'est la Vie音樂茶坊係2012年播出嘅韓劇《愛情雨》嘅拍攝地。 韓劇《愛情雨》係以1970年代為背景，所以電視劇製作組根據嗰個年代韓國嘅咖啡館——音樂茶館模樣整咗個攝影棚。 電視劇拍攝結束之後，實際營運咗接近10年，受到大家嘅喜愛。

重現咗70~80年代茶館嘅面貌，一啲上咗了年紀嘅人，同埋好多想體驗70~80年代嘅年輕人都會嚟到呢度。 最近電視劇《5月的青春》亦都係呢度取景。 好遺憾嘅係，最後喺2021年8月結業。 我哋Creatrip特別影底佢最後嘅模樣！

C'est la Vie茶坊位於建築物嘅2樓，由入口就感覺到當時年代嘅風格。 天然色嘅霓虹燈，懷舊嘅裝飾，特別有feel！ 

入面嘅空間都好大，用咗暗黃嘅燈色做色調，特別有懷舊嘅氣氛！

利用木同白色嘅牆壁做室內裝飾，亦都用咗好多復古嘅裝飾物，成個氛圍都好舒適。軟腍腍嘅梳化櫈，坐喺度休息真係好嘆！

一邊嘅牆上有韓劇《愛情雨》演員嘅簽名，同埋幾幅Beatles嘅相，散發住濃濃嘅復古味道。

音樂茶坊入面嘅音樂房依然堅守喺呢度！ 可能因為新冠疫情，好耐冇開過，鋪滿咗灰塵，不過反而感覺到嗰個時期嘅茶館，所以好開心。

因為呢度最初係電視劇嘅攝影棚，周圍都留低住電視劇嘅痕跡。 喺過去10年裏面，應該好多《愛情雨》嘅fans嚟過呢度。

好可惜之後可能冇機會再嚟，最後用小編拍低嘅最後一張照片來彌補少少嘅遺憾啦！

今日小編介紹咗韓國藝人都去過嘅大邱熱門景點，以上都係小編親自去睇過，嚴格挑選後推薦俾大家嘅地方，下次嚟大邱嘅話，一定要去看吓！唔去真係會後悔㗎！🥰 

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購