Hello，大家好，我哋係由韓國人每日提供最新韓國旅行資訊嘅Creatrip。

唔知平時大家有冇睇韓國綜藝《第六感》呢？佢係一個喺一集裡面會去3間餐廳，當中有2間係真，1間係假，成員要透過推理、問問題同觀察等方式，搵出真正假餐廳！今日小編整理咗第一季嘅「真」餐廳，好多都係相當神奇，唔知當中有冇邊一間會激發大家好奇心會想去試吓呢？

以下係整理咗《第六感》第一季嘅餐廳

韓綜《第六感》餐廳

1. 馬廏間便利餐廳（마굿간편한식당）

由買食材到放入嘴只係需要三秒
喺超市買到嘅食材可以即刻煮嚟食嘅「超市餐廳」

• 營業時間：09:00 - 23:00
• 地址：경기 남양주시 별내3로 285

來源：tvN

《第六感》第一季第1集第一間登場嘅就係「馬廏間便利餐廳」，超市入面買到嘅所有食材，包括豬肉、牛肉、火腿、Pizza、水餃等，都可以喺餐廳入面即買即煮，總共有130個座位。

買完食材之後，如果想即刻煮嚟食，大人只需要俾₩4,400、小朋友₩2,200就可以任用，其中雞蛋、湯、小菜、蔥蒜、麵、沙律、水果、飲品等都係無限供應。

老闆以「希望顧客可以以經濟價格食到好味嘅食物」為理念，唔單止只賣新鮮食材，仲以超優惠價提供自助吧。

2. Lee Jong Kuk 104（이종국104）

一餐飯要100萬
英國王子都讚嘅VVIP韓食餐廳

• 營業時間：11:30 - 22:00、星期日休息
• 地址：서울 성북구 성북로 95-1

來源：tvN 

位於首爾富人區城北洞餐廳「Lee Jong Kuk 104」都出現過喺《第六感》，當時講到一餐飯要100萬韓幣（約HKD7,000），真係嚇咗一跳，不過小編之後再搵吓資料，原來佢哋都有提供15萬（約HKD1,500）、30萬（約HKD2,100）同50萬（約HKD3,500）嘅套餐。

來源：tvN 

每一款菜色都係根據客人去度身定做，用嘅食材同餐具都係最高級，餐廳內部設計同擺盤都好講究。就連成員Jessi都話想帶啲餐具返屋企。  

3. 洞內大叔炸雞（동네아저씨치킨）

甜鹹炸雞！
朱古力炸雞？

• 營業時間：16:00 - 02:00
• 地址：서울 관악구 행운2길 16

來源：tvN 

「洞內大叔炸雞」嘅老闆喺2017年研發咗一款原味黑朱古力炸雞，一份₩26,000，比一般炸雞貴啲。一推出之後已經成為熱話，唔少網民都不斷討論！不過有食過嘅客人就覺得口味相當特別同新奇。

平時朱古力同炸雞都係分開食，如果煮埋一齊的確好難想像，不過估唔到現實竟然有一間！

來源：tvN 

劉在錫食完之後話：「食頭三塊會覺得好新鮮、好好味，但之後就會開始覺得膩，即使食再多嘅薯條同蘿蔔，口中嘅朱古力味仍然係好濃烈。」，甚至有網民食完之後話：「短時間內都唔想再食到朱古力！」 ，唔知大家又會唔會想挑戰吓呢？  

4. Robert Chicken（롸버트치킨）

冇廚師嘅廚房！
機器人炸嘅「未來型炸雞」

• 營業時間：11:00 - 00:00（15:00 - 16:00 Break Time、23:30 Last Order）
• 地址：서울 강남구 언주로 604

Robert Chicken係一間食品科技新創公司，目前喺江南有兩間分店。公司經營理念係希望由機器人幫助製作料理，以保護廚師因工作而可能患有肺部疾病同防止燒傷等危險。

雖然呢間炸雞店係機械化，但都係會有員工幫手打包同收錢，但就可以保護到廚師，唔怕佢哋會被油彈親，都係一個唔錯嘅科技。

原本以為機器人整嘅炸雞可能冇人手整咁好，但睇完節目同網民評價之後，發現口味同人手整嘅一模一樣！

5. 24小時大器慢成（24시 대기만성）

一碗海鮮麵要10萬！
超高級海鮮麵店

• 營業時間：24小時營業
• 地址：경기 평택시 이화로 391

如果有追《第六感》嘅朋友，對呢碗巨型海鮮麵一定唔會陌生！呢間就係劉在錫因為碗最上面，放咗兩隻炸蝦而覺得係「假」嘅餐廳。

事實上，「24小時大器慢成」唔係所有菜式都咁貴，一般韓國中式餐館會出現嘅炒飯、炸醬麵、海鮮麵、餃子同糖醋肉等，價格都好平，大概係₩5,000（約HKD35）至₩20,000（約HKD140）左右。

來源：tvN 

而巨型海神王海鮮麵裡面嘅章魚、鮑魚、大蝦、黑虎蝦、魷魚、炸蝦等全部都係最高級海鮮食材，加上濃郁辣味湯底同爽口嘅麵，一碗要₩109,000（約HKD763），一大碗大約係4至5人份量，如果除返開又唔算太貴。

6. SANHONG烏山平澤店（산홍 오산평택점）

好似山一樣咁高嘅肉塔
高40cm排骨店

• 營業時間：11:00 - 22:00（15:30 - 16:30 Break Time）；冷麵最後Last Order 21:00
• 地址：경기 평택시 서탄면 발안로 1180

啲肉堆到好似山咁高嘅菜式真係好少有，佢足足高成40cm！細份₩35,000、中份₩45,000、大份₩55,000，價錢一啲都唔貴，反而覺得好親民。

湯底放咗好多蔬菜、牛肉排骨、年糕同麵疙撘等食材，最後喺上層鋪上大大塊牛肉片，整到好似一個小山形狀咁。聽講老闆一年可以賺到8至9億，可想言之佢人氣有幾高！

7. 夢中食（몽중식）

有故事嘅中式套餐料理

• 營業時間：午餐第一場12:00 - 13:30；午餐第二場14:00 - 15:30；晚餐第一場17:00 - 19:00；晚餐第二場19:30 - 21:30；星期一休息
• 地址：서울 마포구 동교로257 2F
• 網址：mongjoongsik

來源：tvN 

「夢中食」餐廳好特別，佢係將美食同故事、電影、動畫結合埋一齊。唔同時段價錢都會唔一樣，午餐價格一律₩35,000、晚餐第一場₩65,000、第二場係₩90,000。大家可能都會好奇點解時間會咁分？原來老闆係想要打造成入電影院睇電影嘅感覺，所以去之前要先喺網上睇食咩再進行預約。

店入面嘅招牌、裝飾、餐具擺設、Menu設計同員工服裝，都令人感受到東洋文化。老闆亦會根據唔同主題將店入面換上合適風格同餐具，每一次去都會令人有新驚喜。

喺食之前，老闆仲會同客人分享自己嘅故事同菜式概念，故事主題會不定期變化，如果有鍾意嘅香港電影、台灣電影等都可以同老闆傾，老闆好鍾意同客人互動。

8. Perlen（펠른）

咖啡都可以有套餐？
一齊享受高級特選甜品同咖啡套餐

• 營業時間：12:30 - 22:00（新年、中秋休息）
• 地址：서울 마포구 성미산로22길 18
• 網址：perlen_official

「Perlen」位於弘大延南洞，呢度最主要係想令客人享受咖啡背後嘅故事。內部座位唔多，原本唔需要預約就可以去，但自從綜藝節目《第六感》播出，Perlen大受歡迎，即興想去都好難有位。

Perlen可以揀嘅款式唔算多，價錢亦都偏貴少少。不過大家如果有睇節目都知呢間Cafe特色就係「咖啡套餐」課程。

想去嘅朋友，都要先喺NAVER預約（撳我），有分成有咖啡因同冇咖啡因課程，價格一樣都係₩38,000（約HKD274）。

課程時間大約係一個鐘，可以品嚐三種飲品同三款甜品，透過課程除咗可以聽咖啡師講解每一款菜式嘅故事之外，仲可以睇點煮、點飲，而隨住季節嘅變化，呢度亦都會轉Menu。

9. 臨津江水刺床（임진강수라상）

喺地下游嚟游去嘅魚？
喺水上食飯嘅水族館餐廳？

• 營業時間：11:00 - 21:00、星期一休息
• 地址：경기 파주시 파평면 화석정로 101

位於坡州嘅呢一間「臨津江水刺床」餐廳，主打每一張檯下面都係透明玻璃，等客人可以邊食魚邊睇魚？

水刺（수라）指嘅係古代朝鮮宮廷御膳料理，而水刺床係君王嘅餐桌。老闆會咁改名係希望客人可以好似皇帝咁一樣享受美食。

餐廳出面被花草樹木包圍，行入嚟嘅時候好似去咗一個小花園咁。再入到去鋪頭親會見到有滿透明玻璃水族箱，總共有九個小包廂，大家可以同朋友食得更自在。

呢度最有人氣嘅係需要叫兩人份嘅烤鰻魚同辣湯套餐，辣湯上面鋪滿芹菜同金針菇，裡面有黃顙魚、鯰魚、螃蟹三種海鮮。

同時擺滿各式各樣小菜，不愧係名副其實嘅「水刺床」！烤鰻魚分成鹽烤同紅辣椒醬烤，喺底有洋蔥可以幫肋解膩，鰻魚同洋蔥嘅甜味，加上老闆特製醬汁一齊食，真係超好味！

10. 郊外線 我們家（교외선 우리집）

由鐵路行去只要三秒嘅家庭餐廳

• 營業時間：11:30至19:30、星期一休息
• 地址：경기 고양시 덕양구 대장길 78-34

位於京畿道高陽大井站附近有一間叫做「郊外線我們家」嘅餐廳，只係聽個名已經覺得好溫馨。就好似成員所講，呢個地方好似電影或者韓劇會嚟取景嘅地方，雖然睇落好似荒野，但呢度居然有間隱藏版餐廳？

雖然餐廳喺車站附近，目前冇列車行駛，但每日仍然吸引唔少客人嚟食，餐廳亦都屹立不倒經營咗九年以上！

呢度只有刀削麵同餃子湯可以揀（夏天先有冷麵），每一碗都係₩7,000，店入面冇提供飲品。不過老闆特製嘅手工麵好受客人歡迎，用蜆熬煮嘅湯好濃郁。雖然餐廳可以揀嘅款式唔多，不過通常越簡單嘅菜式，就越考師傅嘅廚藝實力。

以上就係小編為大家整理好嘅韓國綜藝《第六感》第一季餐廳，雖然有啲餐廳交通唔算太方便，不過咁神奇嘅餐廳，遠遠地都值得去一次！當中有邊一間會引起大家好奇心會想去試食呢？? 歡迎留言話俾小編聽 ！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購