望遠市場總整理
首爾傳統市場必去之一！望遠市場必食小食推薦！
Hello，大家好，我哋係由韓國人每日提供最新韓國旅行資訊嘅Creatrip。
想要了解一個地方最簡單就係去傳統市場！今日小編想同大家介紹望遠市場，位於弘大附近，呢度出名生果平同多小食，如果大家之後都有諗住去，就要認真睇吓小編嘅介紹啦！
「望遠市場」簡介
- 地址：서울특별시 마포구 포은로8길 14
- 營業時間：09:00 - 21:00（每間鋪頭都會唔一樣）
「望遠市場」介紹
望遠市場出名多小食，例如年糕、炸雞、紫菜包飯等，可以用到超平嘅價錢就可以食得飽。
一入到市場就會見到左右兩邊有超多美食，除咗有新鮮食材之外，仲有唔少小食。
呢度比起一般傳統市場更加乾淨，而且排得都好整齊，場內仲有地圖可以拎嚟睇，跟住行完全唔會蕩失路。
呢度嘅食材全部擺放得好整齊，價錢亦都寫得好清楚，唔需要擔心會俾人呃。另外有啲舖頭仲有得堂食，喺度解決絕對冇問題！
望遠市場美食推薦
1. Deep Fried Market
- 地址：서울 마포구 월드컵로13길 64
- 營業時間：11:00 - 20:00
第一間小編想推薦大家嘅就係最近好流行嘅棉花糖雪糕，喺IG經常會見到唔少人推介，雪糕可以揀朱古力、雲呢拿同士多啤梨，一粒大約係₩4,000。另一個係芝士蛋糕口味，唔單止形狀夠可愛，食落真係有芝士味，味道有啲甜不過都幾唔錯！
2. 好味的家（맛있는집）
- 地址：서울 마포구 망원로8길 30
- 營業時間：10:00 - 22:00、逢星期一休息
0.jpg)
香港食煎釀三寶食得多，會唔會想試吓韓國嘅炸物係點嘅呢？小編推薦大家除咗叫炸物之外一定要叫埋年糕，保證試過絕對唔會後悔！
呢間鋪頭價錢唔貴，辣炒年糕只係₩4,000、紫菜包飯₩3,000、炒雜菜係₩3,500，同朋友一齊幾樣share食，絕對會飽！
3. 媽媽的小菜（엄마손반찬）
- 地址：서울 마포구 망원로8길 30
- 營業時間：09:00 - 20:00、逢星期三休息
如果大家都鍾意食小菜，呢度超多款可以揀，比起去超市買，呢度價錢會相對平，每公斤係₩8,000起。
4. Kyusu炸雞丁.炸雞（큐스 닭강정.치킨）
- 地址：서울 마포구 망원로8길 27
- 營業時間：10:00 - 20:30
去到望遠絕對唔可以錯過呢一間炸雞鋪頭，唔少電視節目都嚟過取景，舖頭用粉紅色去裝修，經過絕對會望到！大家可以買杯裝邊行邊食，或者係盒裝最多可以揀兩隻口味。
0.jpg)
小編最後買咗一個杯裝試，雞肉好脆同嫩，加埋啲醬汁一齊食超好味！杯裝係₩4,000，盒裝價錢由₩7,000至₩22,000，取決於你要買嘅大小。
5. 雨耳樂（우이락）
- 地址：서울 마포구 포은로8길 22
- 營業時間：12:00 - 22:00（Last Order 21:00）
呢一間舖頭小編係見到超多人排隊所以忍唔住都買埋一份，原來佢哋係專賣炸辣椒同米酒。
炸辣椒裏面有包埋豬肉，而家諗返起都令小編流晒口水！₩9,000有三條，米酒一支係₩8,000至₩10,000，兩個夾埋一齊食真係一大享受！
6. 望遠牛肉餅（망원떡갈비）
- 地址：서울 마포구 포은로8길 25
- 營業時間：平日 10:30 - 20:30、週末 09:30 - 20:30、逢星期一休息
呢間舖頭一樣都係要排隊，不過遠處已經聞到佢超香，牛肉餅有原味同辣味兩種，2件₩6,000、5件₩11,000。
不過去到如果唔想等，可以先同老闆落單，俾完錢講手機最後4個號碼，老闆就會比一張收據你同講幾時要返去拎。
7. 望遠可樂餅（망원고로케）
- 地址：서울 마포구 망원로 80
- 營業時間：09:00 - 21:00、逢星期日休息
呢度嘅可樂餅一件₩1,000，價錢唔貴，加上又多款口味，上面有寫埋英文同中文，落單都方便好多！
除咗可樂餅之外仲有熱狗同糯米波，唔少韓國學生放學都會嚟買㗎！
8. 無窮花魚糕（무궁화어묵）
- 地址：서울 마포구 망원로 82
差唔多行到盡頭嘅時候會見到一間手製魚糕舖頭，如果有好多種，另外仲有炸物同埋年糕，價錢平，口痕嘅時候嚟呢度食吓都唔錯！
小編試咗老闆推薦嘅芝士同紫蘇葉口味，趁熱食嘅時候點老闆準備嘅秘製醬汁真係超好味，令人忍唔住一啖又一啖。
如果天氣凍嘅時候去到，邊食住熱辣辣嘅年糕飲番杯魚糕湯真係個人即刻暖笠笠！
市場周圍氣氛
呢度無論幾時去，都會有唔少市民喺度行，呢度通風口一啲都唔會覺得覺或者臭，加上基本係直路，要行超方便。
除咗啱啱介紹嘅小食之外，呢度仲有唔少乾糧賣。
另外仲有唔少新鮮生果同埋海鮮。
不過始終因為係市場未必每一間舖頭都肯收信用卡，建議大家可以帶定現金，想了解韓國當地文化，去市場一定會發掘唔少驚喜，而且亦會欣賞到呢度嘅獨特魅力！
要點樣先去到望遠市場？
喺望遠站2號出口出到嚟之後轉右會係一條小巷，之後一直直行。
0.jpg)
沿途行都會見到唔少檔口。
差唔多去到望遠市場入口會見到呢一間世界零食專門店。
0.jpg)
基本上由地鐵站行去望遠市場入口只係5至10分鐘，相當之方便。
望遠市場附近美食推介
1. With Yen（연이랑 커.차.그）
如果本身對茶同咖啡有興趣嘅朋友，一定要去呢間With Yen餐廳。
2. 望遠那裡（망원 그곳）
呢度嘅氣氛、食物、酒類都好正，而且帶有一種復古感，超有個性，嚟呢度絕對唔會令你失望！
3. 台灣一人火鍋專賣店（타이완웨이）
如果嚟到韓國想打邊爐，小編推薦大家可以去食台灣一人火鍋專賣店！
如果之後去望遠市場，不妨都可以參考吓小編嘅介紹，話唔定會幫到大家㗎！如果想睇其他首爾傳統市場介紹，都可以撳我了解更多詳情。
如果有更多想知嘅內容，都可以隨時dm話俾我哋知：）
Instagram：creatrip.hk
