Hello，大家好，我哋係由韓國人每日提供最新韓國旅行資訊嘅Creatrip。
今年夏天真係好熱，開風扇吹埋嚟嘅風都係熱，小編坐喺屋企都頂唔順要開冷氣！戶外工作嘅人，真係好辛苦！最近釜山一個屋苑其中一位居民就自費買冷氣裝喺警衛室，引起話題！
好人好事：釜山居民自費買冷氣送看更
韓國唔少屋苑嘅警衛室都係冇冷氣，而且空間好狹窄，自然更加熱。有看更話如果唔開風扇，警衞室嘅溫度比出面再高多5、6度。加上疫情關係，要戴住口罩，簡直係透唔到氣。
尋日（28號）KNN釜山新聞報導，釜山有個住喺某屋苑嘅居民，自費買咗12部冷氣，安裝喺屋苑每一座嘅警衞室。
《Move to Heaven：我是遺物整理師》
睇到呢篇新聞，小編即刻諗起韓劇《Move to Heaven：我是遺物整理師》都有講到有個小妹妹用自己錢買咗部冷氣送俾警衛爺爺，但遭到居民因電費問題而反對。
不過現實就冇呢個問題，大家仲極力稱讚嗰位居民嘅善心。原來呢位居民係度住咗10年，訪問佢嘅時候表示：「看更佢哋同我哋嘅爸爸一樣咁嘅年紀，諗到佢哋都係其他人嘅爸爸，唔係好應該關心吓佢哋咩...」
疫情下，送貨工人嘅工作大增。另一屋苑都有為佢哋準備大量嘅支裝水，幫佢哋解吓暑。有送貨工人話唔少人會喺屋企門口放咗啲水、飲品、水果等等送俾佢哋，令佢哋工作更加有動力。
喺酷熱嘅天氣下，屋苑居民為戶外工作嘅人出少少綿力，呢個小小嘅愛心已經可以令人暫時忘記暑熱。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
