韓星應援文化
應援法唔只係為偶像打氣？仲係批評公司嘅手法？等小編話你知應援法小知識
Hello，大家好，我哋係由韓國人每日提供最新韓國旅行資訊嘅Creatrip。
每次睇K-pop舞台表演都好紓壓，不過最近就有啲遺憾。疫情關係，好多舞台表演都唔俾fans參加，或者改以線上形式進行。雖然佢哋嘅舞台仍然好專業，好型，但少咗fans嘅應援聲同吶喊聲，感覺有些少空虛😥而且偶像都成日話好掛住fans嘅應援聲。
fans嘅應援文化喺K-pop起咗好大嘅作用，今日就同大家介紹吓韓國為偶像應援嘅文化啦！
韓星應援文化
應援法
매일경제
應援法係指偶像喺舞台上表演嘅時候，喺特定嘅時間，做一啲特別嘅動作嚟為偶像打氣。應援方法唔係亂嚟，係有規則同約定。應援法基本上可以分為以下3種，為咗令大家容易啲理解，小編就用BTS嘅歌《DNA》嘅應援法作為例子，下面粗斜體嘅部分就係fans應援時嗌嘅部分！
1. 大嗌韓星名
BTS《DNA》舞台開始，聽到節奏嘅口哨聲時，fans就會大嗌團員名：
김남준! 김석진! 민윤기! 정호석! 박지민! 김태형! 전정국! BTS!
咁樣嗌喊兩次之後，就到V負責嘅部分，歌曲正式開始。喺音樂開始、中間或最後出現長長嘅間奏部分時，咁樣嗌團員名係基本嘅應援法。 通常會按成員嘅出生年月日，順序嗌，由最年長（或隊長）到忙內。
2. 歌詞之間嗌口號
喺J-hope嘅part，fans喺冇歌詞嘅部分嗌口號。 以《DNA》為例，會照住前面嘅歌詞嗌：
우리 만남은 (우리 만남은!) 수학의 공식 (수학의 공식!) 종교의 율법 (율법!) 우주의 섭리 (섭리!)
就好似偶像領唱，fans跟主唱，所以更加興奮！
當然都有嗌同歌詞唔一樣嘅口號嘅情況，好似TWICE《YES or YES》嘅應援法，就嗌回應歌詞嘅口號，相當有趣：
절대 후회하지 않게 해줄게 (후회 안 해!)
[中文意思：絕對唔會令你後悔（唔會後悔！）]
3. 一齊唱
最後仲有偶像同fans一齊合唱，通常係喺首歌最高潮位一齊唱。
La la la la la
La la la la la
우연이 아니니까
呢個時候就好似嗌團員名或者口號一樣咁大聲，不過都會跟返原來音樂嘅音調！咁樣先係同音樂互相融合嘅應援法。
以上三個就是最基本嘅應援法。 除此之外，仲有其他各種各樣嘅應援法，例如擁有超強唱功嘅偶像組合BTOB嘅應援法就係和聲，做fans都要有唱功啊！😂 其實只要同音樂相配、為喺舞台上表演嘅偶像帶來力嘅話，都可以叫做應援法！
應援法嘅歷史
到底呢種應援法係由幾時開始形成㗎呢？咁就要追溯返第一代偶像嘅歷史啦！
應援法係由第一代偶像H.O.T.嘅粉絲團「Club H.O.T. 」開始形成嘅。1996年H.O.T.出道後，人氣飆升，韓國開始出現fans文化，直到而家仲仍然盛行嘅偶像粉絲文化就係喺嗰時產生嘅。
應援法亦都係當時H.O.T. fans所創造出嚟嘅文化。 1999年，H.O.T發行第四張專輯《I yah!》，fans喺主打歌《I yah!》同《歡喜》創出應援法。
歌曲開始時會按順序加入團員名，歌曲結束時會嗌出口號：
고마워요. 미안해요. 사랑해요. 영원해요 H.O.T.
[中文意思： 謝謝你。對唔住。我愛你。支持你H.O.T]
呢一句「고마워요. 미안해요. 사랑해요. 영원해요」到而家為止，喺 H.O.T. 粉絲團之間仍然係一句好有意義嘅句子。
當時，娛樂公司冇專門管理粉絲團嘅部門，所以呢種應援法都係fans自己制定嘅。 以積極參與活動嘅粉絲團團長、管理人員為中心，制定應援法，通過網上或其他方法傳俾其他fans，將應援法宣揚開去。
其後水晶男孩、g.o.d、神話等第一代偶像，同之後登場嘅東方神起、Super Junior等第二代偶像出道初期，fans都自己創作應援法。
慢慢呢種應援法文化越嚟越成熟，娛樂公司開始制定應援法。 因為參與偶像粉絲團活動嘅人逐漸增加，網上粉絲團文化蔓延開去，如果由多毎人制定應援法，就會好混亂。
.
另外仲因為想防止粉絲創作一啲誹謗公司嘅應援法。 2007年Super Junior發表嘅《Dont'don》(돈돈)中有一句歌詞「넌더리가 나」(中文意思：真係令人討厭)，fans就係呢個歌詞之後嗌「SM！」嘅應援法：
넌더리가 나 SM！
合埋一齊嘅意思就變咗「真係令人討厭 SM！」，表達對SM娛樂嘅不滿😂
唔知係咪因為咁，自此之後SM娛樂公司就開始親自創作偶像嘅應援法，再upload到官網上。呢種文化就可以傳開，而家大部分娛樂公司都會親自創作應援法upload去官網。
應援法及粉絲團
咁而家粉絲團係點樣得知應援法㗎呢？
偶像出新專輯之後，首次出演音樂節目之前，娛樂公司就會製作新歌應援法，要喺官方網站同SNS公開。 一般嚟講，偶像回歸第一個星期會喺音樂節目表演主打歌同其他1~2首嘅收錄曲。 為咗俾fans去大聲應援，公司會upload1~3首新歌嘅應援法。
之後fans就會一邊聽歌，一邊練習應援法，再喺音樂節目、演唱會上用力應援。 回歸嘅第一個星期，好多時fans都未係好熟個應援法，所以娛樂公司就係派出負責管理fans嘅粉絲經理人幫助fans熟悉新曲應援法。
sbs
小編以前都去過鍾意嘅偶像嘅第一次音樂放送節目，排隊等入場時，粉絲經理人會播歌，等fans去練習應援法。 又或者好似上圖一樣，派一啲印咗應援法嘅貓紙俾fans去熟習！
SEVENTEEN YouTube Channel
最近為咗令fans熟悉應援法，偶像會拍片教fans。一邊播住歌，偶像就化身為成fans一樣咁大聲應援！ 平時負責聽應援嘅偶像，變為嗌嗰一個，睇落又可愛又有趣，係fans最近好鍾意嘅節目。因為係自己偶像親自教，記憶都深刻一啲！
以上就係K-pop 為偶像應援嘅由來、方法同改變，呢種應援文化唔只係對偶像嚟講係一種力量，仲係fans之間嘅歸屬感！希望疫情快啲結束，可以喺演唱會度大聲應援！
如果有更多想知嘅內容，都可以隨時留言或者dm話俾我哋知：）
Instagram：creatrip.hk