Hello，大家好，我哋係由韓國人每日提供最新韓國旅行資訊嘅Creatrip。
2020東京奧運進行得如火如荼，首先恭喜香港劍擊選手張家朗勇奪金牌同港隊女飛魚何詩蓓奪銀牌！！！好！言歸正傳！
尋日（26號）男子團體射箭金牌戰中，戰勝日本嘅韓國隊對上戰勝荷蘭嘅台灣隊，經一番緊張嘅對決之後，由韓國贏出，奪得奧運金牌，而台灣攞銀牌、日本得銅牌。台灣隊隔17年再創佳績，韓國隊超乎想像嘅成績亦引起話題。
韓國隊唔只喺男子團體射箭項目摘金，喺個人賽等項目亦都獲得佳績。大家知唔知點解韓國射箭咁勁呢？連綜藝節目《偶像明星運動會》嘅射箭，都係固定項目，屢創話題。一齊嚟睇吓韓國射箭嘅歷史，同埋係射箭方面有咁好成績嘅原因啦！
韓國射箭成績超卓嘅原因
東京奧運射箭項目
2020東京奧運男子射箭團體賽項目中，規則為三個回合定輸贏，一隊有三位成員，每人一局射兩支箭，單支箭擊中靶心為10分（單隊滿分60，單回合成績較高一方獲2分積分）。
尋日韓國對台灣嘅金牌戰時，三回合嘅分數如下：
| 韓國隊 | 台灣隊 | |
| 第一局 | 59 （5支10分箭） | 55 （2支10分箭） |
| 第二局 | 60 （6支10分箭） | 58 （4支10分箭） |
| 第三局 | 56 （2支10分箭） | 55 （1支10分箭） |
| 總比數 | 6 | 0 |
台灣隊雖然最後只奪得銀牌，但追平叿台灣隊史上嘅最佳記錄。再睇吓韓國隊嘅分數，尤其第二局全員射出10分箭，令台灣網友甘拜下風。
韓國射箭成績突飛猛進？
조선일보
其實韓國射箭歷來嘅成績都好好！自1988年漢城奧運，首度創立射箭團體項目之後，至今總共九次嘅奧運比賽入面，女子團體射箭項目嘅金牌都係由韓國隊奪得，未有人打破到紀錄；而喺男子團體射箭項目，亦成功喺2020東京奧運取得二連霸。
今次2020東京奧運首次創立混合團體射箭項目，韓國亦獲得金牌；個人射箭方面，前幾年都係由韓國選手獲得殊榮，甚至喺頭三名，曾經數次出現韓國代表選手奪得唔只一項名次嘅紀錄。2020東奧賽事仲未結束，韓國選手嘅積分排名都排喺前四，絕對係個人賽得獎嘅熱門名單。
點解韓國射箭咁勁？
조선일보
1984年，韓國首次參加洛杉磯奧運會，獲得女子個人賽金牌之後，直到2020東京奧運為止，囊括咗23個獎項嘅金牌，係全世界參加奧運射箭項目國家之最，最令韓國人感到自豪嘅，就係韓國參與射箭項目嘅選手，並冇因為時代變遷而出現人才斷層。
佢哋射箭成績咁強，普遍認為「系統」係最大功臣！系統嘅意思唔係話訓練過程有幾嚴苛、所配器材有幾高級，而係由細細個開始培養嘅射箭教育，射箭協會嘅帶領方針，成功令韓國三十年嚟，喺奧運會上Keep住咁好嘅成績。
個別例子
其實好多國家嘅運動選手同政府機關嘅關係一樣，私底下有唔少聲音。最出名嘅例子，某種程度上係肯定咗韓國射箭培養體系上嘅成果。2001年8月，北京世錦賽開打，韓國男子射箭代表隊選手反對特別訓練，拒絕出席比賽。
當時呢件事引起關注，國會提出「協會無視選手人權」嘅意見，但大韓射箭協會仍然處分拒絕參與訓練嘅四名男選手，取消佢哋國家代表隊嘅資格，改派同國家隊一同訓練，預備參加亞錦賽嘅B組人員上場。
最後，當年補上嘅B組成員橫掃北京世錦賽團體、個人金牌項目，其中兩名選手後來嘅2008北京奧運獲得金牌。
小編姑且唔講訓練嘅強度係咪真係影響到選手嘅身心，但代替原本A級選手參賽嘅B組選手，橫掃世界大賽獎項係相當少有，證明咗韓國喺射箭人才嘅培養上，基礎非常之深厚。
備註：協會後來對選手放寬處罰
韓國點樣選拔射箭人才？
조선일보
韓國射箭國家隊選拔歷史可算係幾久遠。1983年，大韓射箭協會由大韓弓道協會獨立出嚟之前，韓國已經進行咗六次以上嘅國家代表選拔。
20年前，大韓射箭協會早就透過新秀選拔，向小學生免費提供弓箭，安排高水準嘅教練去學校，由基礎開始教育。一直以嚟韓國對於射箭人才嘅培養都係一視同仁，選拔上唔似其他運動咁用大型賽事積分，或以教練派系等進行分配，而係以選拔賽上嘅「臨場表現」進行評定。
即係話，就算喺上一次奧運獲得金牌嘅得主，亦唔會無條件保證入到國家代表隊。就算係鄉下訓練嘅高中生，都可以憑住卓越嘅表現，成為國家隊嘅選手；另外，韓國為咗避免選手之間產生派系，禁止私下搵教練操，每個人嘅教練都會固定轉換。
大韓射箭協會採用淘汰制方式進行國家代表選拔，所以過去表現係點唔係重點，選拔現場嘅發揮先係關鍵。
選拔過程長達八個月，喺全韓國1,500多名射箭手中，篩選出頭100名進行淘汰賽。同時，國家選拔賽會將同一隊嘅選手先放喺第一輪，等佢哋各自選出最好嘅選手進行淘汰賽，減少同一隊嘅選手一齊出線，盡力做到公平。
因為大韓射箭協會呢份執著同規定，加上由兒童時期培養對射箭嘅愛好，亦都施行禁派系，每年嘅選拔會上，都會出現新面孔。
매일경제
好似今次2020東京奧運男子團體賽、混合團體賽中都獲得金牌記錄嘅金濟德，年僅17歲，成為韓國射箭史上最耀眼嘅黑馬之一。
另外，男子團體射箭嘅成員中，有一位選手已經40歲，同樣靠住優異成績殺入國家代表隊，成功摘金，係韓國奧運史上年紀較大嘅選手之一。
韓國係點訓練射箭選手？
한국경제
眾所皆知射箭講求心靜，咁先可以瞄準，射向靶心。不過呢啲都係基本功夫，喺射箭場上，外界任何一個干擾都可能會影響箭射出嘅情況。韓國近幾年嘅奧運，都會事先去嗰個國家考察，甚至將比賽環境一模一樣咁複製出嚟俾選手練習。
例如2004雅典奧運時，考慮到地面係人地草皮，就喺選手練習場上加上類似質地嘅物料；2008北京奧運時，加入現場觀眾嘅吶喊助威聲；2012倫敦奧運就考慮到氣候影響，進行應對風雨嘅訓練；仲有2016里約奧運，參考當地治安問題，宿舍、訓練場地比較遠嘅因素，作出調整；甚至喺2020東京奧運，主要練習時都以日英雙語廣播為背景聲音。
꿈꾸는섬
일간스포츠
喺日常訓練中，有韓國奧運選手表示試過喺衫入面放蛇，但仍然要維持鎮靜咁射箭。網上亦可以睇到職業隊派出吉祥物、觀眾、突發噪音騷擾，確保每一位選手喺射出箭嘅瞬間，都係心如止水，唔會受到任何干擾。
就係咁嘅訓練，創造出韓國嘅射箭神話。
四年一度嘅奧運會，每一位選手能夠代表出賽，甚至登上前三名嘅寶座，都係付出過無數心血。小編今日整理咗韓國射箭隊嘅表現，簡單講吓佢哋成功嘅原因，唔知道大家有冇感受到韓國有幾重視射箭呢項運動呢？
最後恭喜所有獲獎嘅運動員，希望2024巴黎奧運上，所有選手都能再聚首一堂，發揮自己多年來努力嘅成果。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
