韓國曖昧文化（feat. 《無法抗拒的他》)
韓國人最鍾意曖昧？點先算曖昧？又會曖昧幾耐先開始拍拖呢？
Hello，大家好，我哋係由韓國人每日提供最新韓國旅行資訊嘅Creatrip。
最強小三「韓韶禧」、Netflix親生仔「宋江」主演，改編自同名webtoon嘅「無法抗拒的他」，大家有冇追緊呢？劇中朴宰彥（宋江飾）憑住超高顏值同劉娜比（韓韶禧飾）只曖昧但唔確認情侶關係嘅「賤男」戲碼，有冇睇到大家揼心口？實際上，韓國係咪好多男仔都係咁？今日小編就同大家講吓韓國嘅曖昧文化，再分析吓朴宰彥嘅行為啦！
韓國曖昧文化（feat. 《無法抗拒的他》)
some（曖昧）
曖昧係戀愛關係中正式拍拖前嘅階段。 即係比朋友親近，但戀人未滿嘅關係。 「曖昧」表現住兩人之間有「某種」嘅感情，韓文將英文嘅「something」縮寫為「some」，解釋為曖昧（썸）。
2014年韶宥同鄭基高嘅合唱曲《Some》獲得超高人氣之後，「Some」作為曖昧嘅詞開始廣泛使用。 歌入面反覆出現「似戀人非戀人的你」（연인인 듯 연인 아닌 연인 같은 너）、「似我嘅非我嘅你」（내꺼인 듯 내꺼 아닌 내꺼 같은 너）等歌詞，準確說明咗曖昧嘅特性。
「some」出現之前都有成為戀人之前嘅階段嘅講法。 喺韓國，會用動詞「拍拖」（사귀다）嚟表達雙方成為戀人。 「拍拖」嘅韓文「사귀다」入面嘅「사」同數字「4」嘅發音一樣，所以交往前嘅階段會利用數字「3」（삼）來形容，叫做「삼귀다」。「some」呢個字出現之後，大家都用「some」嚟表達曖昧階段。
如果同某個人處於戀愛之前嘅階段，韓國人會使用「some」呢個名詞，加上有「搭」意思嘅「타다」(ride)結合一起，變成動詞「썸타다」。同自己曖昧嘅男性叫做「some男」（썸남），女性被稱爲「some女」（썸녀）。
曖昧嘅特徵
點解韓國人喺正式拍拖之前一定會經歷曖昧？ 因為曖昧係為咗了解對方嘅過程。 以前都有正式戀愛前探索對方嘅過程，有咗「曖昧」呢個正式（？）嘅概念之後，呢個過程對韓國人嚟講變得非常重要。
曖昧最大嘅特點就係似是而非呢種唔確定性。 包括當事人在內，邊個都唔知道大家會唔會發展戀人。 如果A同B之間係曖昧關係，即係A同B互相係對對方有愛情上嘅好感，而且會用有一啲行動嚟表達彼此對對方都有好感。
不過「好感」同「用行動表達」都好主觀，所以好難100%肯定對方係咪同自己一樣有同樣嘅感覺：究竟係出自單純朋友之間嘅善意行為，定係出自愛情上嘅關心呢？所以曖昧緊嘅人都會感到不安，會成日問周圍嘅人意見。
不過呢種「唔確定」又令人好心動。 好多韓國人都話：「曖昧嘅愛情最好嘅時期」，因為彼此嘅唔肯定感最能激發想要發展成戀人嘅懇求，又想將自己最好嘅一面展現俾對方睇，會令自己保持最佳狀態。 大家都會努力向對方表達好感，會一直保持聯繫，會經常見面。 不過呢種見面唔會正式叫做「約會」， 因為韓國人一般認為只有肯定咗關係先可以約會。
結束曖昧嘅方法
結束曖昧就係成為正式嘅戀人。 韓國人嘅話通常都會經過告白呢個程序，意味住由而家開始雙方係明確戀人關係。如果冇表白，一般都唔會當係戀人關係。
所以曖昧嘅timing好重要。 喺韓國，性格比較心急，曖昧通常維持2個星期至1個月左右。 喺呢段期間會了解吓對方，確定彼此嘅心意之後，就會表白進入拍拖階段。
如果錯過表白嘅timing，曖昧就好大可能不了了之。 等對方表白等咗一段時間之後，但如果對方都冇表白到，就會認為對方唔鍾意自己，或者會覺得對方係唔適合成為戀人，之後就會疏離。
《無法抗拒的他》嘅曖昧
咁而家一齊睇吓韓劇《無法抗拒的他》入面嘅朴宰彥同劉娜比之間究竟係咪曖昧關係呢？正常嚟講，唔可以叫做曖昧。 雖然佢哋兩個嘅關係確實超出咗一般朋友嘅關係，但唔係韓國人所接受嘅成為戀人前一階段。 由韓國人嘅角度嚟睇，朴宰彥係一個賤男⋯⋯
一睇都知，劉娜比對朴宰彥好有好感，而且因為朴宰彥一開始就成日做啲令人有錯覺嘅行為，令劉娜比成日都諗朴宰彥係咪都同自己一樣有咁嘅感覺。
例如佢哋第一次喺酒吧見面時，朴宰彥話教佢掟飛鏢，將手放喺劉娜比嘅膊頭又捉住佢隻手，不時又摸吓娜比塊面，又擺出超寵溺嘅笑臉等等咁親密嘅身體接觸。 喺韓國，如果對方係異性，都會保持距離，唔會做出一啲不必要嘅身體接觸。 只會喺對有好感嘅朋友，或者真係拍拖先會有咁親密嘅身體接觸。
而且喺第一集，一班同班同學一齊飲酒，但朴宰彥就細細聲同劉娜比說「我哋兩個出去啦」，然後去買雪糕。 通常喺集體活動上講「一齊去買雪糕」會被認為係曖昧嘅信號，借買雪糕為名，其實係製造兩個人單獨相處嘅機會。所以朴宰彥嘅行為一般係會被解讀成對想有意思嘅女仔做出嘅行為。
不過朴宰彥一直都係咁同人flirt，本住靚仔嘅外型，唔係真心想同其他人交流，只係自我享受。佢面對劉娜比一樣，一開始就冇諗過要同對方拍拖，所以好難會好似娜比所期待咁進入拍拖階段。
另外，劇集入面亦表示有兩人之間有性關係，而且係持續嘅。 一般韓國人喺曖昧階段絕對唔會發生性關係。 雖然亦都有透過曖昧之後發生性關係，確定彼此嘅心意，走向告白嘅階段嘅人，但《無法抗拒的他》只係反覆發生性關係，冇去到下一步嘅拍拖階段。 韓國喺性關係上比較保守，一般認為只有拍拖嘅戀人之間先會發生性關係，所以劉娜比同朴宰彥嘅關係唔係朋友，又唔係曖昧，亦唔係戀人，而係一種奇怪嘅關係。亦都因為咁，好多webtoon嘅讀者、劇迷都話朴宰彥一方面不斷曖昧，不斷同女方發生性關係，但又唔確認情侶關係，係一件靚嘅垃圾（잘생긴 쓰레기)。
今日小編同大家一齊了解咗韓國人嘅曖昧文化，同埋以呢種文化嚟睇韓劇《無法抗拒的他》入面兩位主角嘅關係，唔知大家有咩睇法呢？大家又接受到曖昧幾耐呢？有冇係現實生活中遇過好似朴宰彥嘅人呢？歡迎留言同小編分享你嘅愛情故事！
如果有更多想知嘅內容，都可以隨時留言或者dm話俾我哋知：）
Instagram：creatrip.hk