Hello，大家好，我哋係由韓國人每日提供最新韓國旅行資訊嘅Creatrip。
唔知大家嚟韓國旅行嘅時候，有冇喺街度遇到一啲向你傳教嘅人呢？今日小編想大家講吓韓國人喺街上第一個會避開嘅對象「異端」。
韓國有唔少異端，除咗初期令疫情大爆發而廣為人知嘅新天地（신천지）之外，仲有大巡真理會（대순진리회）、耶和華見證人（여호와의 증인）等等，佢哋為咗增加自己所信嘅宗教信徒或賺錢，會喺街頭進行多種傳教活動。 佢哋嘅目標唔只係韓國人，最近連外國遊客都成為佢哋嘅落手目標！今日就同大家介紹吓呢啲異端嘅街頭傳教手法啦！
韓國異端街頭傳教活動
街頭傳教手法
1. 知唔知咩係「道」？
더팩트
喺街度隨機搵人問：「知唔知咩係道啊？」係好耐以前成日見嘅異端街頭傳教方法。 「道」係指宗教意義上嘅精神醒悟。90年代中後期，真係有好多異端用呢一句嚟傳教， 而家已經好少， 但係呢句說話太出名，所以將街頭傳教活動嘅人稱為「傳道怪」（도쟁이） 或「信道人」（도믿맨=도를 믿는 사람）。
2. 問路
另一個常見手法就係扮問路之後同你傾偈。好多時佢哋都問啲好容易就搵到嘅路，例如喺江南附近問江南站喺邊，加上而家個個都用智能電話，好多時都會自己睇地圖，已經好少會開口問路。（當然有小部分係真係問路嘅）當大家好親切咁教佢點去嘅時候，就中咗佢哋嘅陷阱，佢哋就會開始轉話題同你傾偈，再傳教。
3. 問卷調查
喺街上遇到有人俾問卷你請你幫手填嘅話，呢個都可能係異端傳教嘅方法。 通常佢哋嘅問卷調查嘅內容都好求其，而且會問到個人資料。 一般正常嘅問卷調查只會問性別、年齡、職業程度等等，但呢種街頭傳教活動嘅問卷會問埋名、住址、手機號碼。如果真係填咗嘅話，佢哋就可能會上門傳教，或者係咁打電話同你傳教。
4. 心理測驗
인사이트
亦都有唔少會借做心理測驗傳教。當大家做完之後，佢哋會特登講個唔好嘅結果出嚟，激發大家嘅不安感之後，就提議進行心理治療，開始傳教。
5. 講面相
行行吓街突然有人同你講「你嘅面相睇起嚟唔錯喎」、「你幾有福氣喎」、「睇你對眼應該好好命」、「睇你印堂發黑，好多嘢擔心咁喎」等等，提到面相、表情呢啲，100%係異端。 佢哋會用稱讚嘅方式，等你卸下心防而展開話題，又或者講一啲唔好嘅說話，激發人不安嘅心理，再傳教。
6. 扮星探
데일리굿뉴스
呢一個手法主要針對年輕女仔，佢哋會接近一啲身材高挑、苗條嘅後生女，問佢哋想唔想做model、啦啦隊隊長、主播等。 一開始，真係會好似培訓model、啦啦隊、主播嘅專門教育機構一樣咁訓練，然後慢慢咁開展傳教活動。
7. 扮搭訕
呢一個手法主要係利用靚女、型男有目的咁接近異性，扮係對對方有興趣，接近對方之後當係約會咁，好自然講吓自己嘅宗教，藉此傳教。
8. 扮取材訪問
有一啲異端會介紹自己係想做小說作家，或網絡漫畫作家，話自己喺度搜集緊素材而邀請路人做訪問。 開始時會問一啲日常性嘅問題，慢慢就會進入正題，講自己嘅宗教。事實上，真正嘅網絡漫畫作家或培訓作家嘅學院、學校，絕對唔會要求做呢種訪問，即係話，呢種訪問都係假嘅。
9. 向外國遊客介紹韓國文化
最近好多異端會喺旅遊熱點，甚至機場度捕捉嚟韓國玩嘅外國人，以宣傳韓國文化為藉口同遊客搭訕。 因為遊客唔係長時間住喺韓國，所以好難推佢哋入會，令佢哋成為信徒。佢哋會改變策略，帶外國遊客返自己團體嘅宿舍，以體驗韓國文化為名叫遊客向祖先拜祭，然後要求俾體驗費，唔俾錢就冇得走。
應對方法
1. 無視
세계일보
如果喺街度遇到呢啲異端人，直接無視佢哋，繼續行就得。 佢哋嘅目的係1:1咁接近，然後拉入自己嘅宗教信仰。因為佢哋知道好多人話佢哋係異端、邪教，所以佢哋唔敢咁公開。只要當睇佢哋唔到咁走開，佢哋都唔會搞事或者死纏爛打。
2. 報警
如果唔理佢哋咁走開，但異端傳教嘅人繼續跟住你，強迫你做啲咩嘅話，就打112報警。正如前面所講，佢哋唔敢搞大件事，見你報警就會走人。
今日同小編一齊了解咗韓國嘅異端街頭傳教手法同應對方法！本來呢種傳教只係對韓國人，但慢慢佢哋都向外國遊客落手！大家嚟到韓國玩時，一定要小心上面提過嘅例子啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
