Hello，大家好 ，我哋係由韓國人每日提供最新韓國旅行資訊嘅Creatrip。
外語教師喺韓國今個月疫苗接種嘅目標對象之一，但係上個星期登記嘅時候，好多外籍老師都遇到系統故障嘅問題，但韓國嘅同事就可以正常登記，引發歧視嘅問題。
外籍老師登記打疫苗受歧視
今個月初，韓國疾病控制及預防部將輝瑞疫苗分配俾首爾同京畿道，等各區自治團體根據各自嘅風險評估，決定優先俾邊啲人接種。首爾獲得足以覆蓋 200,000 人嘅輝瑞疫苗，而京畿道獲得140,000 人嘅劑量。
因為獲得額外疫苗，首爾同京畿道地區管理局將本身唔包括喺全國疫苗接種計劃嘅私人教育機構（학원）嘅教師、送貨工人等，列入新嘅目標群體，可以由今個月開始接種疫苗。
優先接種疫苗登記由星期二開放登記，但好多外籍教師都表示佢哋預約唔到，而佢哋嘅韓國同事就成功登記，有啲更加已經接種咗疫苗。
喺高陽一間私人教育機構工作嘅外籍教師表示，佢同埋其他外國同事都喺登記嘅過程顯示「系統故障導致預約被取消」，亦有喺其他教育機構工作嘅外籍教師被告知「該系統目前不對外國人開放」，同時韓國嘅職員就收到預約日期。佢哋表示呢次預約接種疫苗造成好大混亂，亦唔明點解講話佢哋有資格優先打疫苗，但又登記唔到。
京畿道官員話過去一星期，有一啲符合接種條件嘅人錯過咗預約。由於數據系統故障，所以有優先權嘅數據暫時用唔到，但否認呢類事件只係發生喺外國人身上。另外推斷外國人之所以面臨登記問題，係因為喺移民局登記嘅資訊，包括拼寫、空格等，同數據庫唔一致而登記失敗。
為咗解決呢個問題，首爾地區管理局改變咗新規則，指出符合接種條件嘅人喺7月24號之前，可以喺冇事先登記嘅情況下，喺首爾30多間疫苗接種診所揀其中一間進行注射，接種時只要出示外國人身份證或身份證明即可。
疾病控制部的一位高級官員表示：「韓國從來冇阻止外國人獲得疫苗。排除特定嘅人群既無益亦無意義。」
另外，目前疫苗註冊系統只提供韓文，官方表示未有計劃增設其他語言。唯一可以用外語得到新冠肺炎資訊嘅途徑只有致電24小時服務熱線1339查詢。
新聞來源： The Korea Herald(1),(2)
如果有更多想知嘅內容，都可以隨時留言或者dm話俾我哋知：）
Instagram：creatrip.hk
