2025首爾地區大學賞紅葉景點推薦
到底秋天去韓國可以去邊度睇紅葉? 一次過話曬俾你聽！
- 慶熙大學(경희대학교)
- 梨花女子大學(이화여자대학교)
- 建國大學(건국대학교)
- 高麗大學(고려대학교)
- 延世大學(연세대학교)
- 首爾大學(서울대학교)
- 成均館大學(성균관대학교)
Hello，大家好，我哋係由韓國人每日提供最新韓國旅行資訊嘅Creatrip。
Hello，大家好，我哋係由韓國人每日提供最新韓國旅行資訊嘅Creatrip。
韓國四季分明，所以唔同季節嚟都可以睇到唔同嘅景色。相信大家都知道韓國秋天最出名嘅就係滿山遍野嘅紅葉同銀杏，喺首爾市區好輕易就可以睇到！小編整理咗7個賞紅葉必去嘅大學校區，準備呢個秋天嚟旅行嘅朋友們千祈唔好錯過啦！
🍁參加一日遊去近郊睇紅葉啦👇🏻
2025首爾地區大學賞紅葉景點推薦
慶熙大學(경희대학교)
- 地址：서울 동대문구 경희대로 26
- 前往方法：回基站（회기역）1號出口
喺首爾入面最啱去賞紅葉嘅大學校區絕對唔少得慶熙大學。遍佈成個校園嘅楓樹，加上宏偉嘅歐式建築，點影都會好靚。除咗秋天，春天嘅時候去慶熙大學都可以見到一大片嘅櫻花，想去打卡嘅朋友們一定唔可以錯過。
喺慶熙大學正門行入去就會即刻見到一條金黃嘅銀杏路，再行入啲就會有一大片嘅紅葉等緊你。慶熙大學好大，差唔多要用兩個鐘先可以行完成個校園，不過相信當大家見到咁靚嘅風景，都唔會後悔出咗咁多腳骨力行上去！
梨花女子大學(이화여자대학교)
- 地址：서울 서대문구 이화여대길 52
- 前往方法：梨大站（이대역）2號、3號出口
相信有嚟過韓國嘅朋友應該都知道，甚至有去過梨花女子大學參觀。同頭先介紹嘅慶熙大學一樣，梨花女子大學嘅建築都係行歐洲風格。可能喺大家嘅印象中梨大係一個色彩繽紛、周圍都有好多翠綠樹木嘅地方，但係其實秋冬天去嘅話大家可以見到梨大校園嘅另一面。
秋天嘅梨大色彩對比度低，俾人一種滄桑嘅感覺。如果喺紅葉盛開嘅時候嚟，仲可以見到梨大校區後山變成一片紅色，加上校園入面嘅斜坡同建築，會令人覺得好震撼。
建國大學(건국대학교)
- 地址：서울 광진구 능동로 120
- 前往方法：建大入口站（건대입구역）3號出口
唔知道大家有冇聽過建國大學呢間學校呢？呢度除咗係眾所周知嘅韓劇《鬼怪》嘅拍攝場地，仲係好多出名嘅Kpop歌手嘅母校。小編好推薦大家秋天去一轉建國大學，欣賞遍佈成個校園嘅紅葉同銀杏。
位於建國大學校區入面嘅一鑑湖係全韓國最大嘅人工湖，唔單止係觀光客，連韓國人都好鐘意春天櫻花盛開同秋天遍佈紅葉嘅時候沿住湖邊散步。喺一鑑湖再行入少少就會見到好多大樹，大家可以用紅色嘅紅葉加上金黃嘅銀杏樹葉做背景，影返幾張打卡相！小編亦都推薦大家喺建大欣賞完紅葉之後，可以去附近嘅商圈行吓，親身體驗當地大學生生活嘅同時仲可能可以斬獲唔少戰利品㗎。
高麗大學(고려대학교)
- 地址：서울 성북구 안암동 안암로 145
- 前往方法：高麗大站（고려대역）1號出口
高麗大學係一間同首爾大學、延世大學並列為韓國頭三名嘅大學。因為大部分學校建築都係起喺山上，所以一到秋天，成個山頭就會變成一片紅色。學校同地鐵站附近都有好多楓樹同銀杏樹，未行到入校園入面都已經可以欣賞到好靚嘅景色。
而且高麗大學附近嘅安岩站商圈亦都深受當地學生同觀光客嘅愛戴，下次有機會嚟首爾記得嚟高麗大學呢邊睇吓啦。
延世大學(연세대학교)
- 地址：서울 서대문구 연세로 50
- 前往方法：新村站（신촌역）2號、3號出口
新村係一個幾乎所有觀光客都會去shopping嘅地方，而延世大學就係喺新村商圈嘅盡頭。呢個外牆佈滿藤蔓嘅建築係咪好似係邊度見過咁呢？其實呢個建築係延世大學嘅main building，夏天翠綠嘅藤蔓喺秋冬會變成啡紅色，好似一座歷史悠久嘅城堡咁。
每逢秋天去延世大學，大家都會見到呢個咁浪漫嘅場景，就好似置身於韓劇入面咁。大家下次去新村行完街，記住行埋入延世大學參觀，體驗吓同新村商圈截然不同嘅氣氛啦！
首爾大學(서울대학교)
- 地址：서울 관악구 관악로 1
- 前往方法：冠岳山站（관악산역）1號出口
韓國最著名學府之一嘅首爾大學位於首爾市中心南部，而佢身後就係好多韓國人都會去行嘅冠岳山。可能因為大家對首爾大學嘅印象都係比較嚴肅，相信好多有嚟過韓國旅行嘅朋友都未必會知道呢個地方，但其實由首爾大學正門去到校園入面，周圍都可以見到好多好靚嘅紅葉，加上背後嘅冠岳山，令成個景變得更壯觀驚艷。
以前要去首爾大學多數都係搭2號線去到首爾大入口站再轉巴士上山，但係自從2022年開通咗首爾新林線，大家可以直接搭車去到冠岳山站行過去，方便好多。下次大家有機會不妨去首爾大學，欣賞吓與眾不同嘅紅葉景色啦！
成均館大學(성균관대학교)
- 地址：서울 종로구 성균관로 25-2
- 前往方法：惠化站（혜화역）4號出口
成均館大學位於惠化站附近，可以話係喺首爾入面最古色古香嘅大學校園。入面有好多保存得好完整嘅古代韓屋，加上秋天個陣紅色嘅紅葉同金黃色嘅銀杏，一行入校園就好似穿越咗去古代韓國咁，而且附近嘅大學路商圈又多嘢行又多好嘢食，係小編非常鐘意嘅地方。
成均館大學入面最出名嘅建築相信就係明倫堂。喺朝鮮初期興建嘅明倫堂係古代韓國儒生上堂嘅地方，側邊仲有一棵被指定為韓國第59號自然紀念物嘅銀杏樹，古色古香嘅景色，令好多韓國人同觀光客都會喺秋天不約而同去呢度打卡影相留念。
🍁參加一日遊去近郊睇紅葉啦👇🏻
如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
