《海岸村恰恰恰》拍攝地

Hello，大家好，我哋係由韓國人每日提供最新韓國旅行資訊嘅Creatrip。

最近韓國熱播緊嘅韓劇《海岸村恰恰恰》大家有冇追呢？佢係改編自電影《洪班長》，雖然目前仲未播到一半，但收視率同討論度仍然節節攀升，金宣虎同申敏兒嘅化學效應真係令人睇見都開心。

《海岸村恰恰恰》背景主要係喺靠海村莊「公辰」，但實際上韓國並冇呢個地名，劇入面海岸景觀、街道等，全部都係喺浦項取景。之後有計劃去浦項嘅朋友，都可以跟住去打卡啦！

備註：劇照、畫面照片來源為tvN

《海岸村恰恰恰》同區域拍攝地地圖⁽¹⁾

《海岸村恰恰恰》拍攝地

1. 白天的咖啡，月夜的啤酒

• 地址：경북 포항시 북구 청하면 미남리 454-6

「白天的咖啡，月夜的啤酒」係由劇中吳允（吳春在）喺公辰開設嘅Cafe同Live酒吧，只係睇外觀都可以感受到有種年代感。但大家有所不知，呢度只有外觀有修改過去方便拍攝，內部仍然係五金零件工廠，不過因為韓劇播出後太多人去打卡，影響到工廠工作，浦項政府決定拎一筆錢喺隔離起返劇中建築外觀。

2. 清湖五金行

• 地址：경북 포항시 북구 청하면 청라로200번길 5-1

清湖五金行係洪班長好朋友崔金哲所開嘅鋪頭，聽講到而家仲未拆，唔知大家之後去會唔會仲見到呢？

3. 寶拉超市

• 地址：경북 포항시 북구 청하면 청라로200번길 1

清湖五金行嘅一個轉彎位就係崔金哲老婆開嘅「寶拉超市」，就好似鄉下嘅雜貨鋪，保留一種懷舊感。小編上網搵過，呢個拍攝地好似已經拆咗，只剩返本身嘅樣同當時佢哋傾八卦嘅木床，有啲可惜。

4. 公辰市場

• 地址：경북 포항시 북구 청하면 청하로 200번길6

喺《海岸村恰恰恰》入面最重要嘅公辰指標，就係位於浦項市嘅「清河五日市集（청하5일장）」。大家有機會嚟到呢度，可以見到公辰實際上最真實嘅樣貌，而且聽講因為拍攝，周圍嘅鋪頭都跟住改名同「公辰」有關，相當有趣。

《海岸村恰恰恰》同區拍攝地地圖⁽²⁾

5. 尹牙科

• 地址：경북 포항시 북구 청하면 청진리 429

尹牙科都係喺浦項取景，不過就同啱啱介紹嘅地方有啲遠，搭巴士過去大概要半個鐘。尹牙科佈景雖然目前仲保留住，但唔知之後會唔會拆，不過聽講呢度已經成為浦項近期踩點名勝之一，好多人都慕名前來！

6. 山上的小船

• 地址：경북 포항시 북구 흥해읍 해안로 1801

山坡上有一艘小船，只係諗都覺得幾神奇，呢個地方同尹牙科其實都幾近，行過去大約20分鐘。呢艘船仲喺山頂，之後有機會嘅話，小編都真係想去打個卡！

7. 月浦海水浴場（월포해수욕장）

• 地址：경북 포항시 북구 청하면 용두리 431-108

喺《海岸村恰恰恰》第1集同預告片，洪斗植滑浪同尹惠珍喺公辰海邊相遇，實際上係喺浦項嘅「月浦海水浴場」。位置係公辰市區同尹牙科中間，搭巴士去大約15分鐘。

8. 崑崙山展望台（곤륜산 전망대）

• 地址：경북 포항시 북구 흥해읍 칠포리 914-2

崑崙山展望台可以一覽海岸美景，好多人睇完呢套劇都去行山同打卡，之後大家又會唔會想去呢？

9. 大海風景生魚片店（바다풍경 횟집）

• 地址：경북 포항시 북구 흥해읍 죽천길 109

喺《海岸村恰恰恰》第5集嘅最後，尹惠珍跟洪班長去咗一間生魚片餐廳，唔知大家又有冇印象呢？實際上位於比較靠近浦項市區嘅「大海風景」。雖然喺劇中兩個人食完出門口去到海灘淋雨，但實際上兩個係唔同地方嚟！

《海岸村恰恰恰》同區域拍攝地地圖⁽³⁾

10. 石屏1里村莊會館（석병1리마을회관）

• 地址：경북 포항시 남구 구룡포읍 일출로 207

啱啱介紹嘅地方都係喺浦項嘅北區，以下落嚟要介紹嘅都係喺「南區（較靠近虎尾岬）」。由村民活動中心到主演人物屋企都係喺同一個區域，想去打卡嘅朋友都可以參考吓（上方圖片）。

11. 尹惠珍屋企

• 地址：경북 포항시 남구 구룡포읍 일출로210번길 18-20

尹惠珍嘅屋企其實同洪班長、坎離奶奶屋企好近，用咗紅色磚去起，喺呢一帶相當顯眼。之後想去踩點嘅朋友，記得唔好打擾到當地居民，要細聲啲。

12. 洪班長屋企

• 地址：경북 포항시 남구 구룡포읍 일출로204번길 15

啱啱提到嘅尹惠珍屋企，其實就係喺洪班長屋企再往上一條街（要上坡），而洪班長屋企就直接面對海岸線，相當符合佢鍾意滑浪嘅喜好。佢同坎離奶奶屋企一樣，都係用貝類混合水泥、石塊拼成，好有海岸村莊特性。

13. 坎離奶奶屋企

• 地址：경북 포항시 남구 구룡포읍 일출로204번길 19

坎離奶奶屋企離洪班長屋企唔使1分鐘路程，望出去就係大海，望到都覺得好舒服。

14. 紅色燈塔

• 地址：경북 포항시 남구 구룡포읍 석병리 745-2

最後一個《海岸村恰恰恰》景點，就係出場率一直都好高嘅紅色燈塔，同主角嘅屋企都係喺同一區域，亦係洪班長同池PD意外相遇嘅地點。

最後再提提大家，如果之後要去打卡，記住唔好打擾到居民，大家都要將心比己。

以上係小編整理韓劇《海岸村恰恰恰》拍攝地，當中有冇邊個地方係去過，或者之後會想去嘅呢？

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購