Hello，大家好，我哋係由韓國人每日提供最新韓國旅行資訊嘅Creatrip。
最近韓國嘅天氣真係成個蒸爐咁熱🥵 喺咁熱嘅天氣刨冰絕對係解暑聖品！大家應該都知韓國好出名食刨冰嘅「雪冰」！今日唔止呢間，小編仲準備咗其他只係1萬~2萬won左右就食到好味嘅刨冰店。另外仲有近幾年喺韓國好流行嘅高級酒店刨冰，價錢就貴啲！一齊去「望冰止渴」啦！
2021 刨冰新品介紹
連鎖cafe篇
韓國唔少連鎖型嘅cafe每年夏天都會推出刨冰新品，一齊嚟睇吓今年佢哋有咩新搞作啦！
1. 雪冰 (설빙)
韓國出名嘅甜品cafe「雪冰」，今年夏天推出咗4種蜜瓜雪冰。 雖然蜜瓜唔算係完全新嘅menu，但係每個夏天都係限量推出，所以每年都好受歡迎！
乳酪蜜瓜雪冰 (요거통통메론설빙)
instagram @sulbing.official
價格：14,900won (約HKD104)
蜜瓜嘅香甜，配合埋乳酪雪糕嘅清爽感，係夏天招牌menu之一。
Real蜜瓜雪冰 (리얼통통메론설빙)
instagram @sulbing.official
價格：14,500won (約HKD101)
蜜瓜入面有紅豆、軟腍腍又煙韌嘅年糕，同埋脆脆粟米片，一啖就有多種口感！
晴王提子蜜瓜雪冰 (샤인머스캣메론설빙)
instagram @sulbing.official
價格：13,900won (約HKD97)
大大粒密瓜，加埋晴王提子，底層仲有雪糕嘅刨冰。
士多啤梨芝士雪冰 (딸기치즈메론설빙)
instagram @sulbing.official
價格：15,900won (約HKD111)
原個蜜瓜入面有士多啤梨同粒粒芝士蛋糕，可以同時感受清爽同甜蜜嘅刨冰。
2. Yogerpresso (요거프레소)
Yogerpresso今年主打紅豆刨冰同水果刨冰，用上招牌乳酪雪糕，口味又多樣化，可以根據個人喜好揀自己鍾意嘅口味！
紅豆刨冰 - 豆粉味/黑芝麻味 (아이스 팥빙수 2종 - 콩고물 맛/흑임자 맛)
instagram @yogerpresso_official
價格：10,500 (約HKD73)
冰紅豆刨冰係韓國傳統嘅刨冰，有紅豆同鋪滿黃豆粉嘅年糕，仲加埋堅果，甜得嚟又香純！可以根據個人喜好揀黃豆粉，或者黑芝麻口味！
冰夢刨冰 - 柿/士多啤梨/奇異果/芒果 (아이스드림 빙수 4종 - 홍시 / 딸기 / 키위 / 망고)
instagram @yogerpresso_official
價格：16,000won (約HKD112)
冰夢刨冰有柿、士多啤梨、奇異果、芒果 4種水果可以揀，加上乳酪雪糕、馬卡龍、牛油脆片、蜜糖片等製成嘅冰夢刨冰，口感超豐富！
3. A Twosome Place (투썸플레이스)
雪條刨冰 (아이스바 토핑 빙수)
instagram @official_atwosomeplace
價格：14,000 - 16,500won (約HKD98-115)
雪條刨冰用牛奶製成冰塊，再喺上面加支雪條 ，好睇又好食！分別有：牛奶雪條紅豆、野莓雪條芒果、野莓雪條乳酪蛋糕、粟米雪條爆谷 4款口味，總有一款啱你心水！
4. Hollys Coffee (할리스)
香桃士多啤梨刨冰 (피치딸기빙수)
instagram @hollyscoffee.official
價格：11,800won (約HKD82 /2人份)、7,800won (約HKD54 /1人份)
香桃士多啤梨刨冰係可以同時感受到桃嘅香甜，士多啤梨嘅酸甜嘅menu。 喺磨碎咗牛奶冰塊上放滿士多啤梨同香桃嘅切片，再加上半個大大嘅白桃喺頂。 另外，由於疫情嘅關係，一齊share食可能覺得唔係咁好，所以推出咗獨食嘅一人份，安全又享受！
5. Dessert 39 （디저트 39）
刨冰杯系列
디저트39 공식 facebook
價格：9,800won (約HKD68)
Dessert 39係將世界上超人氣嘅甜品，以韓國風格重新詮釋，創作出自家特色甜品嘅韓國品牌。 今年Dessert 39推出咗可以同時享受飲品、刨冰嘅刨冰杯系列！
由左到右介紹：
香芋麥粒珍珠刨冰：香芋奶茶上放滿Jolly Pong（大麥粒）、珍珠。
布朗尼朱古力刨冰：朱古力牛奶咖啡上放有刨冰、Jolly Pong、朱古力碎、布朗尼。
黑糖麥粒珍珠刨冰：散發住濃濃黑糖味道嘅黑糖珍珠奶茶，加上Jolly Pong、珍珠。
芝士忌廉刨冰：甜甜嘅忌廉牛奶咖啡上，放滿軟林林嘅芝士蛋糕粒、Jolly Pong、曲奇
酒店篇
近幾年喺韓國掀起酒店高級刨冰嘅熱潮，隨着以韓國20、30零歲為中心嘅「Small Luxury」成為潮流，酒店方面開始賣刨冰。 雖然價格貴，但材料豐富又高級，味道非常好！ 如果大家嚟韓國旅遊時咁啱住喺下面介紹嘅酒店，或者想睇吓酒店同cafe嘅刨冰有咩唔同，咁就要試吓以下幾間韓國超紅嘅酒店刨冰啦！
1. Walkerhill Hotels & Resorts (워커힐 호텔앤리조트)
奶茶 & 布朗尼 （밀크티 앤 브라우니）
價格：48,000won (約HKD336)
奶茶 &布朗尼採用有機種植嘅甘蔗，調製出奶茶冰塊做底，搭配布朗尼、馬卡龍、焦糖餅等甜品，大大增加甜蜜度。
熱帶果刨冰 (열대과일 빙수)
價格：55,000won (約HKD385)
呢個熱帶果刨冰入面加入蘋果、芒果、西柚、青提子、火龍果、藍莓、樹莓等各種高級水果，可感受新鮮果肉嘅味道。
2. 朝鮮皇宮豪華精選酒店 (조선 팰리스)
KARA香刨冰 (카라향 빙수)
價格：68,000won (約HKD476)
KARA香刨冰係用咗被認為柑橘類中最甜嘅水果之一，濟州KARA香嘅刨冰。 帶有獨特嘅酸甜味嘅濟州島KARA香係1年只有2個月收成嘅珍貴水果，所以KARA香刨冰亦都只限量銷售150個。
3. 首爾帕納斯洲際酒店 (그랜드 인터컨티넨탈 서울 파르나스)
甜蜜純素刨冰 (스위트 비건 빙수)
價格：45,000 (約HKD315/2人份)、27,000won (約HKD189/1人份)
位於三成洞嘅首爾帕納斯洲際酒店為素食人士推出呢款甜蜜純素刨冰，佢唔係用一般嘅牛奶冰塊，而係用杏仁奶製成嘅冰塊，仲有西梅、椰棗、穀麥、青檸雪葩，既清爽又健康嘅味道！
4. 首爾汝矣島公園中心萬豪行政公寓 (여의도 메리어트 호텔)
蜜糖刨冰 꿀벌빙수 (BEE, Sweet)
價格：29,000won (約HKD203)
首爾汝矣島公園中心萬豪行政公寓嘅「Park Cafe」同堅果品牌HBAF「蜜糖牛油杏仁」合作推出蜜糖刨冰。 呢款刨冰只加咗天然蜜糖、韓國產紅豆、牛奶碎片三種材料，可以享受到材料本身嘅味道。
5. 首爾康萊德酒店 (콘래드 서울)
芝士刨冰 (치즈 빙수)
價格：42,000won (約HKD294)
首爾康萊德酒店新推出嘅芝士刨冰甜中帶鹹，完美結合嘅高級刨冰。 喺淡淡香濃嘅牛奶中加入忌廉芝士、法國芝士、巴馬臣芝士等多種高級芝士，令人感受到濃郁嘅風味！
以上就係今年韓國刨冰新品！唔單只連鎖cafe，仲可以喺高級酒店享受到多種口味嘅刨冰！唔知大家最想試邊款呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
