Hello，大家好，我哋係由韓國人每日提供最新韓國旅行資訊嘅Creatrip。
米酒，又稱「馬格利」，係韓國傳統用大米釀成嘅酒，可以喺超市、便利店買到。韓國人喺落雨嘅時候，好鍾意飲米酒，食煎餅（韓文：전，發音：jeon）因為煎緊嘅時候聲音好似滴滴答答嘅雨聲。今日小編就為大家介紹吓最近喺韓國好流行嘅米酒飲法，製法好簡單，大家喺屋企都好易整到㗎！
5款韓國人氣米酒cocktail
只要有以下嘅材料，就可以整到五種嘅米酒！
材料：
米酒、冰、藍色檸檬梳打、三合一咖啡、士多啤梨果汁、鮮忌廉、綠茶粉、Oreo、軟糖（可加，可唔加）
呢啲材料都係好容易喺便利店，或者超市就買到，咁而家就逐樣試吓整啦！
1. 咖啡米酒
咖啡米酒就好似加咗牛奶嘅咖啡，一啖就飲到多重口感，又有酒味，又有咖啡味。小編推薦俾鍾意飲甜中帶苦嘅朋友試吓！
所需材料：
米酒、冰、三合一咖啡粉、鮮忌廉 (可加、可唔加)
做法:
1. 沖溶啲咖啡粉，可以用水或者米酒沖，不過咖啡粉用水沖會容易啲溶。
2. 加啲冰落另一個杯度。
3. 將米酒倒落有冰嘅杯度，倒至 2/3 滿。
4. 將第一杯嘅咖啡倒入有米酒嘅杯。
5. 按個人喜好加鮮忌廉（可唔加）
係唔係好簡單呢？
2. 士多啤梨米酒
呢個係甜甜哋嘅米酒cocktail，有好香嘅士多啤梨味，酸酸甜甜，好易入口，如果係士多啤梨控，一定會愛上。
所需材料：
米酒、冰、士多啤梨果汁、鮮忌廉（可加、可唔加）、軟糖 （可加、可唔加）
做法：
1. 倒1/3杯士多啤梨果汁。
2. 加冰
3. 再倒入米酒
4. 加鮮忌廉、軟糖（可唔加）
3. 綠茶米酒
呢個係一個幾健康嘅綠茶米酒cocktail！綠茶有效消除毒素，保持身體平衡，同時米酒有發酵成份，具有完美嘅美容同健康效果。
所需材料：米酒、冰、綠茶粉、鮮忌廉（可加、可唔加）
做法：
1. 沖溶綠茶粉，可以用水或者米酒沖，不過綠茶粉用水沖會容易啲溶。
2. 加啲冰落另一個杯度。
3. 倒米酒落有冰嘅杯度，倒至 2/3 滿。
4. 將第一杯嘅綠茶倒入有米酒嘅杯。
5. 按個人喜好加鮮忌廉（可唔加）
4. 藍檸梳打米酒
藍檸梳打好清新，同米酒好搭！飲落完全唔覺飲緊酒，以為飲緊果汁。太易入口，所以好容易飲多！小心會醉啊！
所需材料：米酒、冰、藍色檸檬梳打、雪糕（推薦雲尼拿味）
做法：
1. 加冰，倒入2/3杯米酒
2. 加藍色檸檬梳打
3. 加雪糕（可唔加）
小編第一次整嘅時候加咗提子味嘅雪糕，搞到杯酒嘅顏色好醜樣，大家千祈唔好學！第二次整嘅時候就用咗雲尼拿雪糕，超完美！力推用雲尼拿雪糕，大家都可以整到好似上面圖中咁靚嘅cocktail！
5. Oreo米酒
Oreo米酒都超好味！一啲都唔似飲緊cocktail，比較似飲緊Oreo冰沙。如果大家唔係咁鍾意好強酒味嘅話，呢杯會令你刮目相看。
所需材料：冰、米酒、Oreo
做法：
1. 加冰、4 oz 米酒，同3塊 Oreos落搞拌機嘅杯
2. 將佢哋全部搞勻
3. 再倒入玻璃杯
另外可以再加一塊Oreo 裝飾。
以上就係5個而家韓國好多整嘅米酒cocktail，每個做法都好簡單，唔使5分鐘就搞掂，又好玩，大家都試吓跟住整，飲吓好唔好味啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
