馬場洞韓牛｜華新畜產
馬場洞「華新畜產」，1++韓牛等住你嚟食，每一塊都係入口即溶！
Hello，大家好，我哋係由韓國人每日提供最新韓國旅行資訊嘅Creatrip。
嚟韓國食咩最興奮？部隊鍋？炸雞？燒肉？雖然呢啲都係正確答案......不過如果問小編，就一定會答係韓牛！不過好多人以為韓牛都會好貴，但只要嚟馬場洞，就可以用比較平嘅價錢食到最高級嘅韓牛！
而今日小編想同大家介紹嘅呢一間，更加係超多外國人會去買！到底佢有咩咁吸引？就等小編逐一話你知啦！
馬場洞「華新畜產」資訊
- 地址：서울시 성동구 고산자로 344
- 營業時間：08:30 - 20:00
馬場洞「華新畜產」推薦理由
- 每次去馬場洞，舖頭太多選擇唔知搵邊一間好，不如就試吓小編推薦嘅華新畜產啦！
- 老闆服務態度超好，除咗可以揀已經包裝好嘅韓牛之外，有想食嘅特別部位，都可以同老闆講，佢會即時喺大家面前切想要嘅韓牛部位俾大家。
- 喺度買過韓牛嘅，都係有讚冇彈，除咗韓國人會去捧場之外，亦有唔少外國人都會專登去。
- 除咗有高質嘅韓牛之外，呢度仲有五花肉、梅花肉賣，可以一次過滿足想食牛同豬嘅朋友！
- 只要係我哋會員，買滿₩50,000韓牛，仲會送肥牛，超抵！
馬場洞「華新畜產」優惠
- 買滿₩50,000韓牛，即送肥牛。
- 唔需要預約。
- 如果用coupon嘅時候，有任何疑問都可以send email到help@creatrip.com。
馬場洞「華新畜產」價格
華新畜產韓牛價格 | |
| 里肌肉1++ (100g) | ￦17,000 |
板腱肉 (100g) | ￦20,000 |
| 護心肉 1++ (100g) | ￦17,000 |
| 五花肉 (100g) | ￦3,500 |
| 梅花肉 (100g) | ￦3,500 |
馬場洞「華新畜產」介紹
大家見到呢個馬場洞入口，係唔係都好懷念呢？就算嚟咗幾多次都好，都會喺度打返張卡！
沿住入口一路靠左行，行幾步就會見到今日小編想同大家推薦嘅「華新畜產」。
隔住個mon大家有冇睇到流口水呢？雪櫃放出嚟嘅基本上都係1++韓牛，大家可以見到韓牛啲紋路超靚。
如果大家唔鍾意買已經包裝好嘅韓牛，呢度好貼心有一個版（有圖＋中文）係俾大家指出想食嘅部份，睇啱只要同老闆講就OK！
另外呢度買韓牛仲會推薦大家兩種食法，包括係炭燒或者用石板燒，大家可以決定完再話俾老闆知。
雖然顏色唔同，但呢兩款都係板腱肉（살치살），左邊嗰款會係最常見，而右邊嗰款大家會見到油脂會比較多，今次老闆推薦小編兩款都試吓。（大家買嘅時候可以指定要邊一款）。
每一間指定嘅一人份都會有唔同嘅標準，而小編介紹嘅呢一間普遍係200-300g為一人份。大家可能會諗咁到底要買幾多先會飽？小編俾大家參考一下：普通食量大約₩30,000左右會飽，而食量比較多嘅話，₩50,000左右就夠。
如果大家有想食指定嘅部位，老闆仲會即時切俾大家同包裝好。
而大家可能會叫嘅里肌肉（등심），老闆都會先幫大家切走肥膏再去磅重，一啲都唔呃秤！
買好嘅韓牛，老闆娘都會幫大家包好，等大家之後可以拎去餐廳燒。
一開始同大家講到，可以揀要炭火燒或者石板燒，小編最後決定揀炭火，老闆娘仲好貼心咁同埋大家去。提提大家，去餐廳食多數都要俾座位錢（每間舖頭都唔同，基本上係₩5,000 - ₩7,000）。
老闆娘帶小編去呢一間炭火燒肉，小編第一感覺超好！平時去開嘅燒肉店可能都會覺得好油膩，但呢度唔會有呢種感覺，而且仲好乾淨！
入到去職員就會幫大家安排座位，望住呢個畫面真係覺得好幸福！（提提大家：坐低之後要等個火夠熱先好燒，如果職員得閒都會嚟提大家幾時燒先係最好。）
小編一開始燒里肌肉（등심）先，平時大家可能都會成塊咁燒，不過有時火力唔平均，有啲部位熟可能有啲唔熟，所以職員就建議最好先剪開一半咁燒。
真係而家睇返......小編都要流口水啦
因為係韓牛，所以唔需要燒得特別太熟，燒好嘅一半可以先擺埋一邊，之後再燒埋另一半。大家可以見到肉汁超多，肉超嫩！
大家可以根據自己個人口味去用菜包，或者點鹽去食，不過小編覺得韓牛加wasabi一齊食，係最正！好多韓國人都會咁食添！
之後小編就燒埋另外兩款板腱肉（살치살），入口即溶嘅感覺真係好幸福！不過如果要比較兩款，小編會鍾意最原本嗰一款，油脂相對冇咁多同埋冇咁膩。
燒完韓牛之後，就係燒五花肉啦！喺燒之前大家一定要同職員講，職員會再幫大家換鐵板去燒。
燒到金黃色嘅五花肉，用菜包住，連埋蔥同蒜頭一齊食，呢個組合完全冇得頂！
如果係揀梅花肉，大家唔好以為好乾，同樣佢都係超有肉汁，而且肉超嫩，無論係就咁食，定係點醬食都一樣好好味。
如果大家都仲係覺得唔夠飽，除咗可以再買韓牛之外，你可以喺燒肉店裏面加啲主菜一齊食。
之後去馬場洞，想食CP值高嘅韓牛，不妨試吓小編推薦嘅華新畜產啦！保證大家試過唔會失望！
馬場洞「華新畜產」前往方法
- 小Tips：由龍頭站4號出口出到嚟往後行，去到十字路口轉左一直直行，過完兩條馬路之後會見到一個加油站，再行前少少就會見到馬場洞入口（大約行7分鐘左右）。
點先可以享有「華新畜產」買滿₩50,000韓牛，即送肥牛優惠？
現場消費Click下面網址下載Creatrip專屬優惠券，出示畀店員睇即可享有獨家優惠。
以上係馬場洞韓牛「華新畜產」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
