Hello，大家好，我哋係由韓國人每日提供最新韓國旅行資訊嘅Creatrip。
喺上年香港有個po話自己女朋友整麵包整上癮，搞到自己成個星期食足12餐麵包，俾同事以為佢冇錢食飯，仲諗住借俾佢 ！唔知大家有冇試過因為洗大咗、糧尾等等嘅情況，要捱麵包呢？之不過，喺韓國就未必可以靠食麵包慳錢啦！
MBN '한국에 반하다-국제부부'
上個月25號播出嘅綜藝節目「迷上韓國--國際夫婦」（한국에 반하다-국제부부）討論有關韓國嘅物價，當中問到「韓國有啲咩係覺得貴」嘅時候，大多數嘉賓都話係麵包！
MBN '한국에 반하다-국제부부'
俄羅斯出身嘅Anna話：「韓國真係有好多麵包舖！以為可以買到好多麵包，點知入去到受到好大衝擊！」、「韓國嘅麵包係世界上最貴」，佢指出全世界麵包平均價格大約係6美金/1kg，但係韓國就要15美金，足足貴超過1倍！
根據2019年英國經濟分析機關「經濟學人智庫」（EIU）嘅調查結果顯示，首爾1kg麵包平均價格為15.59美金，喺全世界物價頭10名嘅城市中最貴！香港就平均3.91美金，計落韓國麵包嘅價格係香港嘅4倍！
小編早兩日仲特登走去周圍都有分店嘅Paris Baguxxxx度視察吓，行勻成間舖頭，最平嘅麵包都要1300won（約HKD9），個size仲細過小編嘅手掌，食完一啲都唔飽！有時喺某啲地鐵站見到嘅小店，細細嘅麵包最平都要1000won（約HKD7）一個，真係好貴！（小編香港屋企附近大大個菠蘿包都係3蚊😩）
反而食飯好似相對平啲，便利店嘅三角飯團最平1000won左右，又或者有啲超市1萬won就有7包叮叮嘅炒飯，除返開雖然同麵包差唔多價錢，但係就飽好多！
大家有冇俾韓國麵包嘅價錢嚇親呢？喺韓國嘅朋友，又有啲咩慳錢大法？歡迎同小編share！（小編好需要！！！！！救救小編嘅荷包🙏🏻🙏🏻）
如果有更多想知嘅內容，都可以隨時留言或者dm話俾我哋知：）
Instagram：creatrip.hk
