Hello，大家好，我哋係由韓國人每日提供最新韓國旅行資訊嘅Creatrip。
相信大家成日都俾啊爸啊媽話大使，都叫你慳啲使㗎啦！今日就同大家講吓韓國老一輩嘅儲錢方法，有啲都幾得意！
老一輩韓國人慳錢方法
慳食
1. 望魚解渴
cha.go.kr
現今嘅韓國算係富裕，但過去韓國係一個貧窮嘅國家，飽受戰爭嘅蹂躪。相傳有一個故事話有一家人為咗節省食物，就將曬乾咗嘅魚掛喺餐枱嘅天花板上，等自己食緊豉油撈飯嘅時候，抬頭望住條魚，減低食慾。
亦都有另一個故事話，因為屋企家冇錢買肉，啊仔話想飲肉湯，爸爸就去街市用手摸啲肉，返屋企洗手之後，用返嗰啲水去煮蔬菜湯，令湯有豬肉嘅味道。雖然呢啲都係相傳嘅民間故事，但反映到古代朝鮮嘅貧窮。
2. 將食物醃鹹
大家都應該知，韓國菜好多時除咗主菜，仲有好多伴菜，例如：白菜泡菜、蘿蔔泡菜或其他鹹菜。呢個係古代韓國人嘅習慣，因為天氣唔好，唔係一年四季都有蔬果，所以到咗豐收嘅季節，佢哋就會醃製成鹹菜，而醃鹹嘅食物可以存放好耐，咁樣做嘅話之後一年四季都可以有得食。
慳用
1. 2間房用1盞燈
電對古代嘅人嚟講係一種奢侈品，所以韓國人有好多慳電嘅方法，例如有2間房嘅屋，會喺2間房中間掛一盞燈嚟一齊用，或者天氣熱時就開窗，唔開風扇等等。
2. 善用報紙
睇韓劇或者韓國電影嘅話，會發現韓國有朝早送報紙嘅服務。 為咗慳錢，韓國人喺煮油膩嘅嘢食時會用報紙蓋住個煲，或者用報紙嚟當防油紙，有啲人仲要攤開報紙當地墊咁坐。以前嘅人仲會摩擦報紙，等佢軟啲，當廁紙咁用。
3. 賣頭髮
以前嘅韓國，媽媽會長頭髮之後拎去賣。賣頭髮得嘅錢就會用嚟買零食，或者學習用品俾小朋友。
4. 延長鉛筆
大家細個用鉛筆係咪用到一半，覺得唔好揸就忍唔住揼咗去呢？以前嘅韓國學生會用到最後！佢哋會將變得好短嘅鉛筆塞入壞咗原子筆筆筒圓珠筆入面，延長個長度，可以好揸啲，然後用到盡一盡！
5. 放磚落馬桶水箱
喺韓國，爺爺嫲嫲，甚至爸爸媽媽都會講以前佢哋會係馬桶水桶入面放舊磚，等流入水箱嘅水快啲升高，咁樣入嘅水會少啲，從而慳到水。
如果大家有睇《我家的熊孩子》(미운 우리 새끼)，就會發現金鍾國好慳，洗碗、洗手、洗澡或刷牙嘅時候，都將水龍頭開得好低，或者塞住個去水位，儲住啲水啲用嚟用，佢話呢啲都係喺爸爸度學返嚟嘅慳水方法！
以上，小編整理咗一啲韓國人過去嘅慳錢故事。如果大家都有咩慳錢大法，歡迎留言同小編分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
