白險灘文化村「白險灘超市」介紹
釜山除咗甘川文化村，仲有白險灘文化村！有冇諗過可以喺白險灘文化村邊吹海風邊食拉麵？
Hello，大家好，我哋係由韓國人每日提供最新韓國旅行資訊嘅Creatrip。
釜山除咗甘川文化村之外，大家又知唔知嗰度有一個叫做白淺灘文化村呢？今日小編想同大家介紹呢度其中一間餐廳，係呢度必去打卡點之一！如果之後有計劃去，咁就一定要Mark低啦！
白淺灘文化村「白淺灘超市（흰여울점빵）」介紹
- 地址：부산 영도구 흰여울길 121
- 營業時間：每日 12:00 - 賣哂所有材料為止
白淺灘文化村有韓國版「聖托里尼島」之稱，之前韓國電影《逆權大狀》亦喺度取過景，如果已經去厭甘川文化村，小編推薦大家下次可以嚟呢度。
呢度除咗出名睇海景靚，同多打卡位之外，呢度仲有一間好出名嘅小店餐廳「흰여울점빵」，大家可以坐喺度邊望海邊食公仔麵！雖然細細間，但係每一個人嚟到都會喺度打卡
大家可以認住呢個門口No.121，如果到時唔知點去都可以問吓當地人。
呢度細細間，望入去就會見到一個開放式廚房，之前小編都嚟過一次，同朋友等足一個鐘先有得食
如果大家決定要喺度食，就一定要記住以下呢幾點：
1. 等位需要先入嚟拎號碼牌。
2. 唔可以帶外來食物入去，如果有，請先食哂再入去等位。
3. 請一定要帶好口罩先入嚟。
等嘅期間老闆會俾號碼牌，大家只要乖乖地等就可以。
每個人嚟到都會想坐呢個露天座位，天氣好嘅話邊望海邊食公仔麵真係好舒服，可惜當日個天係有啲似想落雨，所以老闆就唔俾客人坐出面
喺等緊嘅期間，小編發現呢度有一個白淺灘文化村地圖，大家可以睇吓食完之後再去邊度行。
等咗一陣就到小編啦！入到去會見到有個牌寫住話，如果叫公仔麵嘅話要按人頭叫，，落完單之後就上樓坐低食。
呢度除咗有公仔麵之外，仲有多士、咖啡，同梳打等。
樓上座位唔多，最多都只可以坐到6個人。
啲枱係2人座位，對住個海，大家可以坐喺度邊食公仔麵邊望海景。
而呢度嘅3樓都只係最多容納4個人，鋪頭可以坐嘅位唔算多，所以只要一到週末，就會有好多人嚟等位，建議大家可以早啲去。但如果大家覺得要等好耐，都建議可以試吓食其他鋪頭。
小編同朋友最後叫咗兩碗麵同兩個多士。
公仔麵（라면） ￦5,000（約HKD35）
呢度會連埋韓國傳統嘅黃銅煲一齊上，所以大家食嘅時候仲會感覺到熱辣辣~ 而呢度公仔麵仲會加半隻蛋、魚糕、菇同蔥一齊煮。
味道唔會好辣，相信大家都會鍾意！
雖然只係普通公仔麵，但可以邊望住海邊食都係另一番風味。
多士（토스트） ￦3,500（約HKD24.5）
呢個多士入面有蛋、菜，同一塊煙肉，裏面加咗蕃茄醬同芥末，比起平時食嘅可能有少少唔同，小編都覺得值得一試！但如果怕漏，兩人食一個亦都得。
如果大家之後都去釜山，想搵一間可以邊食公仔麵邊睇海嘅餐廳，可以試吓去呢間。
如果有更多想知嘅內容，都可以隨時留言或者dm話俾我哋知：）
Instagram：creatrip.hk