白淺灘文化村Cafe「白淺灘Beach」介紹
仿如置身東南亞海島嘅「白險灘Beach」，度假打卡樣樣得！
Hello，大家好，我哋係由韓國人每日提供最新韓國旅行資訊嘅Creatrip。
白淺灘文化村嘅海邊有好多好可愛嘅cafe、好多顏色鮮豔色彩嘅小屋，有韓國版「聖托里尼島」之稱。今日小編就帶大家去擁有超美海景、充滿可愛氣息嘅白淺灘Beach粉色cafe啦！
白淺灘文化村「白淺灘Beach」介紹
白淺灘Beach（흰여울비치）
- 地址：부산 영도구 절영로 236
- 營業時間：星期一至五 11:00 - 20:00（Last Order 19:00）、星期六至日 11:00 - 21:00（Last Order 20:00）
- 小Tips：由永善公寓(영선아파트)巴士站行大約2分鐘。
白淺灘Beach成間cafe嘅外牆都係粉紅色，好容易就搵到佢。
一入到去，見到佢啲佈置，彷彿置身於度假勝地！
周圍都擺咗啲花花草草，好有度假feel嘅枱櫈，仲望到超靚海景，唔怪得呢間cafe喺韓國SNS咁紅！小編係星期五晏晝去嘅，所以都幾多人。
入到舖頭嘅右手邊就係落單嘅counter。
呢度嘅咖啡大致係4,000 - 5,000won（約HKD28 - 35），其他飲品就大約 7,000 won（約HKD49），好多款揀，價格唔算平，但係可以坐喺個咁靚嘅環境度休息吓，都抵嘅！
呢度仲有個甜品展示櫃，menu全部都係手寫，再加埋人手畫嘅圖，超可愛！ 白險灘Beach最主要賣嘅係海綿蛋糕！
餐點預備好就可以喺counter度攞。
呢度嘅構造好特別，落單係1樓，落去地下室有好多位可以坐。
行落去嘅樓梯都佈置得好靚，好多小植物，望到都好舒服。
木製加透明玻璃嘅小餐枱、藤椅，仲有竹造嘅吊燈，感覺相當舒適，好似去咗東南亞海島上度假一樣！
呢度仲放咗一張擺咗小裝飾嘅床！幻想吓自己瞓喺床上面，望住窗外嘅景色，係咪好寫意呢？
呢度仲有一個戶外露台，喺呢度一邊望住海景，一邊飲咖啡，真係好嘆！
每個室外嘅位都有一把模仿用樹葉造嘅遮，仲有白色嘅小帳蓬，簡直係一個小型嘅度假村！
帳蓬入面有小竹枱同幾個cushion，坐喺度應該更加有野餐嘅感覺。
呢個角落仲唔係設計俾大家嚟打卡嘅？
竹造嘅擺設，有野餐feel之餘，仲有去咗東南亞海島嘅感覺。
雖然呢度好多位，但想坐喺呢個對正個海嘅位就要等吓啦
隨便咁影一影，都係一張構圖完美嘅靚相
白淺灘 Blossom ₩7,200
呢杯飲品睇起嚟好可愛！ 酸酸甜甜嘅櫻桃味，係夏天最佳消暑嘅飲品！
Real Lemon ₩7,200
酸酸地嘅檸檬，飲落好清爽。 夏天咁熱，最啱飲返杯酸嘅嘢飲，開吓胃，又降溫！
當然梗係唔少得嘅係影返張人生靚相，打卡呃like啦！
呢度每個角度影出嚟都好靚！嚟到釜山，除咗去沙灘之外，仲可以嚟呢間超有度假feel嘅「白淺灘Beach」，小心影到冇晒memory啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
