弘大「Adult Grand Park」介紹
弘大「Adult Grand Park」介紹，一間好似坐時光車返去70、80年代嘅酒吧
Hello，大家好，我哋係由韓國人每日提供最新韓國旅行資訊嘅Creatrip。
大家又知唔知70-80年代嘅韓國係咩感覺呢？今日小編介紹一間位於弘大好有復古風嘅酒屋「Adult Grand Park」俾大家😊 一齊跟住小編坐時光機啦！
弘大「Adult Grand Park」介紹
弘大「Adult Grand Park」홍대 어른이대공원
地址：서울특별시 마포구 합정동 410-31
營業時間：平日 15:00 - 05:00，週末 14:00 - 05:00
小Tips：搭地鐵6號線到上水站，由1號出口出嚟之後直行，過咗斑馬線之後轉右，然後第一個街口度轉左，行前幾步就到啦！
位於弘大嘅「Adult Grand Park」係一間充滿復古風嘅酒吧，深受喺70、80年代出生嘅人，同鍾意復古風嘅20多、30多歲年輕人喜愛嘅地方。店名係由為兒童而設嘅遊樂場「兒童大公園」為概念而改成嘅（韓文店名直譯嘅話係「大人大公園」），如果話兒童大公園係為兒童而起嘅遊樂場，咁呢度就係專門為而大人建成嘅遊樂場同酒吧！
就咁睇舖頭嘅外觀就感受到復古風！用咗強烈原色嘅綠色、紅色、黃色，在人來人往嘅弘大街上好顯眼。 窗外用黃色嘅燈泡仔做裝飾，夜晚嚟到呢度嘅話，更加有氣氛。
行入舖頭，發現做緊韓國啤酒TERRA嘅event！ 叫TERRA飲嘅話，會送TERRA貼紙、TERRA開瓶器、TERRA露營套裝等贈品。 睇唔睇到宣傳TERRA活動後面嘅裝飾品呢？ 最右邊嘅係有返咁上歷史嘅日本動畫人物「小飛俠阿童木」！ 雖然貼咗COVID-19嘅防疫守則海報，遮住咗塊面，但睇到細個鍾意睇嘅小飛俠，仍然覺得好心動。
舖頭入面比想象中大，喺出面睇仲以為只係一個長型嘅酒吧，但原來入面嘅空間好大，有好多座位，所以週末或假日去都唔使等位。
起初仲以為係因為最近韓國流行復古風，所以跟上潮流將舖頭外觀都裝飾到好復古，但行到入面，先感覺到老闆係真心熱愛復古。暗色系嘅木製傢俬，白色油漆嘅柱同天花板嘅組合，就好似以前外國電影入面嘅酒吧一樣，再加上用黃色、紅色、藍色等多種顏色嘅燈泡仔裝飾，望落更加靚。
舖頭入面周圍都掛住招牌同海報，有70、80年代韓國小店嘅招牌，經典電影嘅海報，呢啲都唔係自己整出嚟，而係老闆自己20年嚟收集返嚟嘅物品！
老闆由高中時期開始行清溪川嘅跳蚤市場，收集各種包含住歲月嘅舊物，例如有以前嘅可口可樂樽，得意嘅公仔，甚至70年代用嘅公眾電話。聽講佢收集咗大約2萬件古物，慢慢咁填滿呢間舖。
舖頭最入面有個大櫥窗，擺滿咗各種復古小物！
睇到錄音帶同舊式唱片、幾十年前賣嘅可口可樂同首爾牛奶樽、的的式式嘅公仔，感覺好似坐咗時光機返去40年前一樣。
望住呢啲小物一件一件咁陳列出嚟，仲要係老闆一個人收集嘅，真係覺得好犀利！
另一面牆仲有另一個展台。 前面係而家賣緊嘅酒類，後面嘅貨架上就擺滿咗另一種感覺嘅復古小物。 之前嘅櫃係走可愛風，呢個就係同酒有關嘅小飾物。 舊酒杯、酒樽再連埋背面嘅舊錄音帶放埋一齊，真係好有氣氛！
令小編最印象深刻嘅係呢度！喺入口嗰度好隱蔽，啱啱行入嚟嘅時候都發現唔到，係行行吓先發現！呢度係一個音樂盒！ 聽講如果好多人，又有氣氛嘅話，呢度嘅DJ會喺呢度接受客人點歌。
pet paper
呢個音樂盒似乎係1980年代風靡一時嘅韓國音樂茶館文化中得到靈感而製作嘅。 而家只要有手機就可以輕鬆咁聽音樂，但係嗰時要有唱片機先可以聽到，所以好多人為咗聽音樂而去音樂茶館。 喺紙度寫上個人嘅故事同想點嘅歌，交俾音樂茶館嘅DJ，就會喺衆多嘅LP碟度搵出嚟播。
呢度嘅DJ會播80年代至2000年代初流行嘅歌，而唔係而家最新嘅流行歌。 有朋友話，只要一播出名嘅歌，大家就唔會飲酒，會一邊聽歌，一邊一齊唱，玩得好盡興！疫情之後嚟嘅話，應該會好開心！
好可惜小編去嗰日音樂盒冇開，不過都揀咗個靚位坐！
呢個位就係韓劇《黑道律師文森佐》，文森佐同洪車英瑛坐過嘅位置！ 小編係啱啱開舖嘅時候嚟，好好彩可以坐到呢個超人氣嘅位！
一收到好似細個玩嘅大富翁咁嘅餐牌，即刻笑咗出黎😆 真係覺得好可愛！諗返起細個同屋企人、朋友一齊玩嘅回憶！棋盤上寫住嘅係下酒菜，中間黃色字嘅部分係酒類。最右邊角落嘅格仔上寫住「出發LET'S GO」！ 如果有選擇困難症，可以掟骰子決定😉
小編揀咗呢度嘅招牌菜之一--玫瑰炸雞同「大人」生啤。
玫瑰炸雞（로제치킨）- 19,500won（約HKD134）
初時見到「玫瑰炸雞」呢個名，仲以為係喺炸雞上面淋一層玫瑰醬，原來唔係！係一半炸雞，一半玫瑰pasta！pasta係用長通心粉，食落好似玫瑰年糕咁！
攞起一塊炸雞，點玫瑰醬嚟食，炸到脆口，帶啲鹹味嘅炸雞，真係好好食。 小編平時都好鍾意玫瑰醬汁，所以成日食玫瑰醬炒年糕、玫瑰醬燉雞等等，呢個玫瑰炸雞可以列入玫瑰menu嘅TOP3 🥰
「大人」生啤（신선한 어른이 생맥주）- 4,000원（約HKD27）
啤酒一上枱，真係好驚豔！原本以為係會裝喺一個圓形嘅普通啤酒杯度，點知裝咗喺一個諗都諗唔到嘅樽度！呢個樽係韓國最出名嘅牛奶品牌「首爾牛奶」係在80年代以前使用嘅玻璃樽。 最近掀起復古風，呢款首爾牛奶玻璃樽都有人拎返出嚟賣，但價錢竟然要10萬韓元！ 小編之前都冇親眼見過，只係聽爸爸媽媽講起。今日親眼見到呢個樽，真係好神奇啊！
Adult Grand Park係一間同弘大附近好唔同嘅酒屋！大家想去一啲特別感覺嘅bar嘅話，小編推薦你嚟呢度，真係好有feel！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
