釜山「The Bay 101」 介紹
有「小香港」之稱嘅釜山「The Bay 101」 ，到底點先可以喺嗰度影到靚相呢？
Hello，大家好，我哋係由韓國人每日提供最新韓國旅行資訊嘅Creatrip。
如果問釜山嘅年青人鍾意去邊度睇夜景，唔少人可能都會答你係去The Bay 101，喺嗰度仲有「小香港」之稱，到底點解呢？有興趣嘅朋友就繼續睇落去啦！
釜山「The Bay 101」 介紹
地址： 부산 해운대구 동백로 52 더베이101
營業時間： 9:00 - 24:00
小Tips：由海雲台行過去The Bay 101， 大概11分鐘左右。
只要喺IG打「The Bay 101」，就會見到有唔少人喺度打過卡，每一張相都影得好靚，小編之前都嚟過釜山好幾次，之前夜晚嚟到因為太多人（疫情前），所以好可惜冇影到相就返咗去，今次特登揀平日時間，少啲人會去打卡嘅時間。
小編建議黃昏嘅時候去係最好，因為只要等多陣就到夜晚，一次過可以睇到兩個景色。
入到一樓大家會見到售票處，喺呢度大家可以體驗遊艇服務，有興趣嘅朋友都可以問吓職員了解更多。
喺另一邊就會見到有餐廳，如果大家嚟到肚餓都可以喺度買啲嘢食。
餐廳主要係喺一樓同二樓，可以俾大家參考吓。
呢間Cafe SIDE有室內同室外嘅位置，大家可以揀想坐嘅位，如果天氣好，當然會想揀坐出面啦！
Cafe SIDE除咗有咖啡賣之外，仲係一間麵包店，小編當日大約係7點左右去到，咁啱就有做特價，所有麵包七折！
喺Cafe SIDE隔離有一間叫做FINGERS & CHAT，主要係咪炸薯條、炸雞、炸蝦，同啤酒等。喺度買嚟食同飲番杯，真係幾嘆㗎！
另外呢度仲有啲紀念品俾大家買添！價錢都唔算好貴。
出面有好多位，天氣好時，一邊食炸雞一邊飲番杯啤酒，爽啊！
嚟度除咗欣賞到風景之外，坐吓遊艇都係一個唔錯嘅體驗！
之後上到2樓會見到呢一間대도식당（大都食堂？），呢度主要係食牛肉，想食靚牛，可以試吓呢間！
喺大都食堂對面仲有一間The Grand Cafe，呢度好多甜品等住大家嚟試。
喺出面仲有好多戶外座位，好闊落，喺度同朋友坐喺度傾偈都好開心同好舒服。
影影吓相，天都開始慢慢變黑，望住呢個景大家有冇覺得都有啲似香港呢？
而家就等小編教大家點影靚相啦！記得要跟住圖片上有嘅箭嘴行。
要影靚相，其實要先落返一樓出去The Bay 101出面。
沿住箭嘴方面行，右邊會見到停車場。
經過停車場之後會見到有一個入口。
平時喺IG會見到有人影到The Bay 101嘅倒影原來就係呢度！去到大家經常會見到有一攤水喺地下，如果當日去到冇，可能就要問釣緊魚嘅朋友借桶去裝水倒喺地下....
之後重點係大家要將手機靠近水面，同較好角度，咁就一定可以影到超靚嘅倒影圖。
配合每一間住宿嘅燈光，閃閃發光嘅背景，影出嚟嘅相真係好靚。
唔知大家喺香港又有冇影過類似嘅相呢？喺呢度真係好似瞬間返咗一轉香港咁，望住呢個景色，直到而家小編都仲係好掛住..
大家之後去The Bay 101，不妨都去小編推介嘅神秘打卡點，一定都可以影到靚嘅相，呃到好多Like！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
