甘川文化村「CAFE AVANT GARDE」介紹
想一邊嘆咖啡一邊望到哂甘川文化村整個景？小編推薦大家去CAFE AVANT GARDE！
Hello，大家好，我哋係由韓國人每日提供最新韓國旅行資訊嘅Creatrip。
釜山係韓國第二大城市，大家去到除咗會睇海之外仲有邊度地方一定會去呢？相信甘川文化村一定走唔甩！唔同顏色嘅小屋拼埋一齊，真係好似一幅畫咁，小編今日想同大家介紹位於甘川文化村嘅其中一間cafe 「AVANT GARDE」，保證大家嚟到一定唔會失望。
甘川文化村「CAFE AVANT GARDE」介紹
- 地址：부산 사하구 옥천로 121
- 時間：每日 10:30 - 20:00 （根據Google顯示，如果想知道正確營業時間，可以打電話去問）
- 電話：032-727-2300
- 小Tips：搭巴士搭到去甘川小學.甘川文化村（감정초등학교. 감천문화마을）落車，行前少少望2樓就會見到。
CAFE AVANT GARDE 地理位置非常之好，佢就係喺甘川文化村入口左邊，而且喺2樓，望嘅景色係超靚！不過當日小編去嘅時候天氣唔係咁好，可能睇落會有啲暗，但如果天氣好去打卡，真係超推！
一入到去，已經可以睇得出呢度好闊落，呢度有分室內同室外兩個區，大家可以揀自己鍾意坐嘅位。
鋪頭入面仲擺滿好多公仔同模型，每款都好可愛，好適合打卡。
呢度有個區應該係可以俾大家買，有興趣嘅朋友，都可以問吓老闆點賣。
Cafe入面竟然仲有一隻長頸鹿，令人即刻會諗起李光洙
室內每一個位都隔一段距離，同朋友可以舒舒服服咁傾偈。
揀好位之後，大家就可以買飲品同甜品，呢度有咖啡、茶、梳打、啤酒、cocktail等多種飲品等你揀，令人最驚訝嘅係，呢度價錢一啲都唔貴！
而呢度嘅甜品就只有達克瓦茲賣，一共有6款口味。
如果大家揀坐室內，小編超推薦大家可以揀坐窗邊，一邊望住呢個景，一邊嘆咖啡，完全係超正啊！
因為室內有窗隔住，如果想睇得更清，咁小編更加推薦大家坐室外，一眼望哂甘川文化村嘅景，真係令人忍唔住「嘩！」一聲。
室外好通風，而且有瓦遮頭，大家唔需要怕曬黑。
望住呢個景，就好似去咗一個些高級度假村，望住村莊嘅感覺
打咗一陣卡，小編叫嘅飲品同甜品都出嚟啦！
摩卡星冰樂 （모카 프라페노）￦6,000（約HKD42）
行完甘川文化村當然最好飲一杯咖啡去提吓神！加上炎炎夏日真係好適合飲番一杯摩卡星冰樂！咖啡唔會太苦，不過小編覺得有啲可惜嘅係上面冇加cream。
抹茶鮮奶 (녹차라떼) ￦5,000（約HKD35）
抹茶唔會好濃味，相對上有少少甜，如果大家本身係鍾意飲偏甜嘅抹茶鮮奶，可以試吓。
芝士達克瓦茲（치즈 다쿠아즈）￦2,500（約HKD17.5）
小編食之前，將佢哋分開咗一半，大家可以見到有超大舊芝士，食嘅時候超濃芝士味！
雙重朱古力達克瓦茲（더블초코 다쿠아즈）￦2,500（約HKD17.5）
雖然佢好濃朱古力味，但如果同芝士味相比，佢會冇咁突出，不過如果係鍾意食朱古力嘅朋友，都可以試吓。
雖然小編當日去嘅時候天氣有啲暗，但如果之後大家去係好天嘅話，真係好推薦大家去呢一間Cafe！價錢一啲都唔貴而且仲可以睇到咁靚嘅景，完全係超抵！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
