Hello，大家好，我哋係由韓國人每日提供最新韓國旅行資訊嘅Creatrip。
炎炎夏日，係唔係都會想食返啲又甜又爽嘅甜品呢？不過釜山咁大揀邊間好？釜山朋友就推薦大家去呢一間「寶城綠茶」，味道唔差之餘，價錢仲要超平！鍾意食綠茶嘅你，之後就唔好錯過啦！
釜山南川「寶城綠茶」介紹
- 地址：부산 수영구 수영로394번길 28
- 營業時間：每日10:00 - 22:00 （新年及中秋休息）
- 小Tips：由南川站行去大約3分鐘左右。
其實南川同廣安站唔算好遠，搭地鐵只係差兩個站，如果大家咁啱喺廣安里食完飯，之後又想食甜品，想散步行30分鐘過去都可以！
只係睇外牆，已經有唔樹木包圍住，好似喺城市中突然一秒間去咗一個森林咁。
唔少人嚟到都會坐喺呢度打卡。
呢間舖頭主要裝修，用咗綠色同深啡色，俾人一種好傳統得嚟，又好有大自然嘅感覺。
呢度主要係食紅豆刨冰（如果想多紅豆，加1,000won）同埋紅豆粥，大家可以睇到價錢一啲都唔貴。飲品方面亦有（凍/熱）美式咖啡，同埋米水（甜米露）。
如果覺得唔夠，呢度仲有兩款餅乾俾大家買嚟試。
落完單之後，喺拎餐嘅時候記得拎埋餐具。
如果想食得濃味啲，可以加黃糖、綠茶粉或玉桂粉。
呢度比相像中大同闊落，每行前一步都會覺得真係好似去咗一個森林咁。
喺一樓已經有唔少客人喺度等緊或者食緊，小編仲見到有好多人都會自己一個人嚟食添！
之後小編上咗2樓睇吓，當時一個人都冇，趁呢個時候梗係要快啲打卡啦！
唔需要等好耐，小編叫嘅嘢食全部都到齊，三樣嘢加埋只係需要8,500won, 份量一啲都唔少，價格完全係超親民！
紅豆刨冰 (팥빙수) - 3,000won（約HKD21）
紅豆+綠茶+冰，呢個組合完全係冇得輸！冰嘅量多唔再講，紅豆嘅份量老闆完全冇偷工減料，一樣都係俾咁多！紅豆好甜，令人食得好滿足 
紅豆粥 (단팥죽) - 3,000won（約HKD21）
小編一開始怕會冇味，仲拎咗啲黃糖，點知食咗一啖之後，紅豆粥比想像中仲要甜… 
食食吓發現原來每一碗入面，都會有一粒麻薯，好煙韌好好味！
米水/甜米露 (식혜) - 2,500won（約HKD17.5）
如果話飲米水大家可能都會覺得只係去汗蒸幕嘅時候先會飲，但韓國人唔係咁㗎！平時經過地鐵站或喺街邊小食，大家可能都會見到佢嘅蹤影，夏天買番杯嚟飲，會覺得好涼爽同埋好解渴。
大家食完之後，記住要收拾好，之後拎返去一樓到還餐具。（喺落單往右邊行就會見到）
而喺走之前，小編仲見到呢度有唔少藝人都嚟過仲留底咗簽名，唔知大家又認唔認得係邊個呢？
如果大家都係鍾意食綠茶，想搵一間又平、又好食、又有feel嘅甜品店，不如就試吓韓國人都推嘅「寶城綠茶」啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
