海雲台「海雲台元祖奶奶湯飯」介紹
去釜山除咗要食豬肉湯飯同生魚片之外，不如試吓當地人推薦嘅「海雲台元祖奶奶湯飯」牛肉湯飯！
Hello，大家好，我哋係由韓國人每日話你知最新韓國旅行資訊嘅Creatrip。
每次去釜山除咗要食豬肉湯飯，同埋生魚片之外，今次小編想同大家介紹一間牛肉湯飯，佢喺海雲台超出名，如果大家之後去開嗰邊，就千祈唔好錯過啦！
釜山「海雲台元祖奶奶湯飯」介紹
해운대 원조 할매 국밥
- 地址：부산 해운대구 중동1로 40
- 營業時間：07:00 - 20:00
- 小Tips：海雲台站3號出口出到嚟之後直行，見到CU之後，喺下一個十字路口轉左，一路直行再見到第二個十字路口再轉右就會見到「海雲台元祖奶奶湯飯」。
如果有去過海雲台一帶，都知嗰度有好多美食等住大家，而當中小編想同大家介紹嘅，係呢一間有48年歷史嘅「海雲台元祖奶奶湯飯」！佢喺釜山當地超出名，唔少電視節目都有介紹過，牆上仲會見到好多韓星都嚟過打卡！
因為最近鋪頭搬咗新地方，所以睇外觀唔會覺得似係有48年嘅感覺，但味道依然係冇變，大家可以放心。
鋪頭入面都有好多位，而且夠闊落，大家可以揀好位之後坐低再落單。
大家都知韓國每年都會喺海雲台一帶舉辦國際電影節，唔少藝人都會慕名而來，牆上除咗有多藝人簽名之外，仲有唔少相，大家又認唔認得有邊個呢？
| Menu | 價錢 |
| 소고기국밥 牛肉湯飯 | ₩6,500 |
| 선지국밥 牛血湯飯 | |
| 소고기따로국밥 牛肉湯飯（湯、飯分開上） | ₩7,000 |
| 선지따로국밥 牛血分離湯飯 | |
| 소고기국수 牛肉湯麵 | ₩6,500 |
| 선지국수 牛血湯麵 |
Menu好簡單，有牛肉/牛血湯飯、牛肉/牛血分離湯飯、牛肉/牛血湯麵等等。如果大家覺得唔夠可以額外加₩1,000叫白飯（공기밥）、麵（국수사리），或者加大（곱배기）等。
呢度每日提供嘅小菜都唔一樣，所以每次嚟到都會有驚喜。大家食完覺得唔夠都可以再去自助吧拎（食幾多拎幾多，唔好做大曬鬼啊）。
牛肉湯飯 （소고기국밥） ₩6,500（約HKD 40）
呢度出餐超快，基本上落完單唔使一分鐘就會送到，牛肉湯飯入面有好多牛肉、大豆芽、蘿蔔等蔬菜，而飯就會喺底。
牛肉超嫩滑，而且湯底超入味，好好味，令人忍唔住食完一啖又一啖。
呢度嘅牛肉湯一啲都唔油膩，大家亦都可以根據個人口味加胡椒粉，會再惹味啲。
牛肉湯飯（湯、飯分開上）（소고기따로국밥） ₩7,000（約HKD 42）
如果鍾意一邊飲湯一邊食飯，可以叫呢款。
牛血湯飯（선지국밥） ₩6,500（約HKD 40）
鍾意食內臟嘅朋友可以試吓食牛血湯飯，對韓國人嚟講，牛血湯飯對宿醉好有效，所以唔少人都會喺朝早食牛血湯飯當早餐。
呢間「海雲台元祖奶奶湯飯」嘅牛肉湯飯真係太好味！！小編都忍唔住食哂成碗
下次去釜山除咗食豬肉湯飯之外，不如都試吓呢間牛肉湯飯，話唔定大家都會鍾意！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
