Hello，大家好，我哋係由韓國人每日提供最新韓國旅行資訊嘅Creatrip。
韓國除咗出名化妝品之外，仲有出好多健康產品，就好似維他命。有睇開韓綜嘅話，都會見到韓星成日都食維他命。咁點解佢哋鍾意用呢啲保健品嚟攝取營養素，而唔係食物呢？
韓國人食維他命嘅原因
究竟韓國人有幾鍾意食維他命？據 SBS Special 報導，有一名受訪者表示：「雖然我唔算老，但係每日都食 26 種維他命！」根據2015年保健食品市場嘅數據，喺總市值4萬億韓元入面，保健品就達到2萬億。
2017年嘅一項針對韓國人消費保健品嘅調查發現，大多數人選擇食維他命（53.3%），其次係高麗參（38.5%）、Omega3（25.8%）、鈣（9.2%）、益生菌（8.0%）、葉黃素 (4.7%)。數據證明韓國人真係食好多保健品，而且韓國嘅維他命有液體、粉末、丸劑等多種形態，食起嚟更方便。點解韓國人食咁多維他命呢？
韓國人營養不均
 |  |
根據 National Health and Nutrition 嘅研究，韓國人最缺乏嘅營養素係鈣、維他命C、維他命A、核黃素同鐵（見上左圖）。原因係咩呢？主要係同飲食習慣有關。韓國人食得最多嘅係榖類，佔 47.9%，肉類佔10.5% ，酒類4.7%，水果類4.5%，蔬菜類4.1%（見上右圖）。睇到咁嘅結果，應該都估到點解佢哋會缺乏某部分嘅營養素
因為韓國人生活節奏急，咩都要快，所以影響咗佢地嘅飲食習慣，例如會多揀方便、平、好味嘅快餐或者即食麵。除咗上述嘅維他命之外，韓國人都好缺乏維他命D。維他命D主要由接觸陽光嚟攝取，但韓國人另外比起其他國家，防曬嘅使用率高好多，加上一般嘅打工仔、學生都係早出晚歸，長時間留喺室內，自自然然缺乏維他命D。
服用維他命簡單方便
就好似上面咁講，韓國人生活匆忙，飲食習慣又唔正確，導致營養不均，容易病，所以佢哋比起跟住唔同營養素嚟進食，佢哋會揀更簡單嘅方法，就係另外服用維他命。另外韓國嘅維他命唔係淨係得藥丸型，有水劑或啫喱，食落好似食緊糖咁，唔似食藥，所以更加吸引。
受廣告宣傳影響
傳統嘅維他命係藥丸型，俾人食藥嘅感覺，就好似食完會變得健康一樣，潛移默化咁令佢哋覺得食維他命就等於健康。另外，好多韓國維他命公司會用韓國嘅idol、名人嚟幫佢哋代言，增加可靠感。當然，見到自己嘅偶像食維他命，fans都會想跟住食。
根深蒂固嘅觀念
大多數韓國人都非常注重健康，認為服用維他命係維持健康嘅方法之一，呢種觀念深植韓國人嘅心，一代傳一代，就算有好多研究證明服用大量維他命並唔可能好似維他命公司宣傳一樣咁改善到健康，但大多數韓國人仍然會食用唔同種類嘅保健品。
以上就係韓國人習慣食各種維他命嘅原因！的確服用呢啲保健品真係好方便，可以補充返平時飲食上缺少嘅營養。大家有興趣買嘅話，都可以撳入以下嘅link度搵我哋代購㗎！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
