Hello，大家好，我哋係由韓國人每日提供最新韓國旅行資訊嘅Creatrip。
喺疫情之前，除咗多人鍾意去首爾之外，唔少人都慢慢鍾意咗釜山呢個地方，除咗多嘢行同睇景之外，更加唔可以錯過嘅就一定係去睇海景，不過就咁睇可能會悶咗啲，咁不如就邊嘆咖啡邊望海景啦！
廣安里「CUP&CUP」介紹
- 地址：부산 수영구 광안해변로 177 4층, 5층
- 營業時間：每日 11:00 - 21:00（ 天台只開放到20:00、Last Order 20:30）
- 小Tips：由金蓮山站1號出口行過去大約11分鐘左右。
今次小編去咗呢一間Cafe「CUP&CUP」最近喺韓國大熱，喺Naver評價亦都係超高，佢之會人氣咁高係因為出名睇景靚，4樓5樓都係，但如果要落單就一定要先去4樓！
一入到去，已經見到唔少人喺度落緊單，雖然見到有好多位，但係靚位可以望到海景嘅已經俾人坐哂 （後面兩個剩低嘅空位因為疫情關係要隔開）
而甜品方面，唔知係唔係因為小編太遲去，只係得番檸檬瑪德蓮，同埋香蕉布甸。
喺等緊期間小編先上一層，呢度同樣都有窗邊位可以俾大家邊嘆咖啡，邊望海景。
呢一層有多條樓梯俾大家通上去天台！
一上到天台真係令人忍唔住「嘩！」一聲！邊吹住風邊望海景，再嘆住杯咖啡真係超爽！
喺天台嘅後一面，呢度有一個好似桑拿房？嘅設計，大家亦都可以坐喺度嘆咖啡、打下卡。
因為天台位唔多，所以小編都只係打完一張卡就即刻落返去。
好好彩地，小編竟然落到去有一個窗邊位，望住廣安大橋呢個景真係好舒服。
凍柚子桃茶 (아이스 유자송아) - 7,000won（約HKD49）
只係睇顏色係咪都覺得好靚呢？呢一杯柚子桃茶，小編覺得唔會太甜味道啱啱好，因為有柚子果肉，飲嘅時候會更加有口感。
百白果梳打 (패션후르츠에이드) - 6,500won（約HKD45.5）
一個字嚟形容「爽」，好香百香果味，因為加咗梳打所以更加爽，夏天嚟飲超正！
檸檬瑪德蓮 (레몬후리앙) - 3,900won（約HKD28）
雖然係有檸檬味，但唔會好重，如果有得揀，可能下次會試其他甜品或其他口味。
整體嚟講，小編覺得呢間Cafe都俾人一種好舒服嘅感覺，但建議可能要早少少去，先可以坐到靚位或者食到更多甜品。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
