新村Cafe 「PO TID」介紹
一間神秘得嚟又有英國風嘅新村Cafe 「PO TID」介紹，唔知喺度會唔會發現到寶藏呢？
Hello，大家好 ，我哋係由韓國人每日提供最新韓國旅行資訊嘅Creatrip。
大家應該對新村都幾熟識，因為附近有好幾間大學，所有呢度特別多年輕人行，同時亦都有唔少cafe，今日就同大家介紹最近大熱嘅「PO TID」cafe啦！😊
新村cafe「PO TID」介紹
PO TID(포티드)
地址：서울특별시 서대문구 신촌동 명물길 36-3
營業時間：每日 11:30 - 22:30
小Tip：坐地鐵去到新村站，3號出口出嚟之後沿住Nature Repulic嗰邊行，見到Dunkin冬甩之後轉右，再行走幾步就到啦！
新村街係首爾最大嘅大學區之一，周圍都係美食、靚嘅cafe同shopping嘅地方。 行入新村嘅巷仔度，可以好似發現寶藏一樣嘅地方。PO TID係位於新村一間好靚、好有特色嘅cafe，喺出面睇已經好吸引！睇吓石牆，係咪有種返去左以前嘅英國咁呢？
推開度掛住紅色窗簾嘅門，就好似入咗未知空間一樣。一眼望過去，深啡色嘅木傢私，暗暗黃黃嘅燈光，俾人一種好懷舊嘅感覺。
入口嘅左邊都係可以落order嘅counter。
呢度有好多種嘅飲品，包括咖啡、鮮奶咖啡、水果奶昔、沙冰、茶等等，甜品就淨係有曲奇同雪糕。如果係朝早好早就嚟到嘅話，仲可以睇到老闆焗曲奇添！叫完嘢食，行入去cafe入面參觀吓先！
PO TID大致分咗三個主要嘅空間，靠近入口嘅係間Cafe最光猛嘅空間，可能係因為要方便客人喺counter度落單，所以呢度比其他地方光啲。呢度嘅枱好闊落，梳化仲好舒服，同朋友聚吓嘅時候嚟呢度就最啱啦！
呢度掛咗好多畫，係咪好似有種英倫風呢？ 經過呢度之後，就會去到第二個空間。
第二個空間雖然冇咁大，但最有feel～
另一邊就擺咗好多張睇落似魔法師坐嘅櫈！喺度打卡都幾唔錯！
樓梯嗰面更加神祕，放咗好多唔同嘅飾物：一望就感覺到歲月流逝嘅舊書，同埋一啲充滿神祕感嘅小裝飾。要留意嘅係，呢條樓梯只係用嚟裝飾，唔可以行上去嘅。小編初時仲以為可以行上去，踏前一步之後先發現唔對路🤭
呢度最大嘅亮點都係樓梯底下嘅空間啦！呢度係一個打卡位，大家千祈唔好錯過啊！
呢度可以話係PO TID最hit嘅打卡位！小編都好鍾意呢度，趁人少即刻影返張相！
樓梯後面有一個好大嘅陳列櫃，擺放住好多裝飾品，連埋古英國風格嘅掛鐘，真係好型啊！
穿過酒紅色嘅窗簾之後，就係第三個區，係成間cafe最大嘅空間。
呢度有大約10張枱，可以容納到好多人，而且每張枱之間都有啲距離，唔會覺得逼。大家喺度飲吓咖啡，食吓甜品，傾吓偈。
呢度仲掛住啲用金色畫框鑲住嘅肖像畫，好有古樸風。
唔知係咪因為睇得戲多，雖然小編冇魔法粉末，亦都唔可以瞬間移動，但係喺個黑媽媽嘅地方望住紅色嘅燭光，突然覺得好舒服，好平靜。
最後介紹吓小編嚟到叫嘅嘢食啦！
Cube Dolce Latte (큐브 돌체 라떼) - 5,800won（約HKD40）
Dolce Latte係喺用espresso加牛奶同煉乳製成，味道甜甜哋嘅咖啡，呢度唔係一般嘅Dolce Latte唔同㗎，最大嘅特點就係個cube！
Cube Dolce Latte 係將部分嘅咖啡雪凍成方形嘅冰，再放入去本身杯咖啡度。大多數加咗冰嘅嘢飲，因為啲冰融咗而味道會變淡，但呢杯就唔會啦，仲越飲越濃！亦都因爲用煉乳代替糖漿，甜味唔會太強，好好味！
朱古力山核桃腰果曲奇(초코 피칸 캐슈넛 쿠키) - 3,900won（約HKD27），另加雪糕 1,000won（約HKD7）
呢個係cafe嘅招牌甜品曲奇同雪糕。曲奇有雙重朱古力、朱古力核桃、燕麥蔓越莓、朱古力山核桃腰果、白朱古力澳洲核桃，總共5種可以揀。
呢度嘅好處係你落完單之後會用焗爐焗一焗熱塊曲奇，所以可以食到暖立立嘅曲奇！因為焗過，特別外脆內軟，而小編點嘅係曲奇中間有腰果同山核桃，所以特別香😋或者可以𢳂少少雪糕落塊曲奇上面，暖暖嘅曲奇同凍冰冰嘅雪糕融埋一齊真係好正！
今日同大家一齊去咗位於新村嘅 「PO TID」cafe！ 大家係咪都覺得呢度好神秘，之後大家嚟韓國又會唔會想嚟呢度打卡呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk