年紀細但有成熟美嘅韓星排名
年紀細但有成熟美嘅韓星排名，忙內變大哥/大家姐？而家睇落仲比以前後生？
Hello，大家好，我哋係由韓國人每日提供最新旅行資訊嘅Creatrip。
上次同大家介紹完由韓國綜藝TMI NEWS選出嘅TOP7 童顏韓星之後，反應都幾唔錯！原來佢哋仲選出過雖然年紀輕輕，但就有種成熟美嘅代表人物，唔知大家會即刻諗到邊個呢？
年紀輕輕但有成熟美嘅韓星排名
TOP 7 - Super Junior 圭賢
當年圭賢加入Super Junior只得18歲，不過佢當時同成員比，俾人感覺成熟咗啲，唔單止係外表，就連佢獨特嘅唱功都令人覺得有種成熟穩重嘅味道，而家圭賢雖然已經33歲（韓國年齡34歲），但唔知點解俾人一種更後生嘅感覺，永遠嘅Super Junior忙內，唔知今個秋天佢又會唔會帶嚟咩新歌呢？
TOP 6 - John Park
當年John Park喺Mnet音樂選秀節目《Superstar K》第二季中拎亞軍，之後正式出道，當時只係21歲嘅佢，雖然俾人感覺好暖男，但就一直俾人取笑老顏，不過而家睇返，佢同10年前嘅樣，完全冇變，唔單止唱得，連綜藝一樣得！
TOP 5 - 泫雅
第五位就係性感女神泫雅啦！當年佢出道只係得16歲，但就比同隊前Wonder Girls成員宣美、昭熙睇落更成熟，不過而家29歲（韓國年齡：30）嘅佢反而越睇越後生，平時私底下唔化妝嘅佢，同舞台相比，感覺更清純，皮膚仲要超好！
TOP 4 - NU'EST 白虎
由出道已經俾人有種中年美（？），同成員企埋一齊睇落特別成熟，就連當時NU'EST一開始上韓國綜藝《Weekly Idol》都俾鄭亨敦同Defconn講笑咁問佢幾歲，當時只得18歲佢，Defconn即刻講過「未成年？講笑炸 ！」。平時喺舞台超有野性嘅佢，喺現實生活中其實係一個小朋友，反差好大，令人忍唔住陷入佢魅力當中。
TOP 3 - MAMAMOO 華莎
第三位就係超有魅力嘅華莎啦！外表同歌聲一出道已經大受關注，當時19歲（韓國年齡：20）出道，外表俾人感覺好成熟，但大家可能俾佢舞台上嘅佢呃咗！私底下嘅佢唔化妝睇落超細個，同中學時嘅佢一啲都冇變，就連fans都幫佢改名做혜기（안혜진 + 아기）＝ 本名加BB嘅意思。
TOP 2 - Apink 夏榮
夏榮出道時只得16歲，身高就已經169cm，一開始出道因為外表成熟俾人以為係隊長，但而家睇返舊時嘅相，只可以話佢一啲都冇變，連主持人都讚佢係「冷凍人間」。
TOP 1 - Somi
第一位就係Somi啦！01年出生嘅佢已經172cm高，只係睇外表可能比其他同齡朋友睇落成熟啲，當時19歲嘅佢上過一個節目，當時職員問的士司機Somi似幾歲，佢即答「25歲？」，但Somi喺後面忍唔住話「我最大聽過有人話我似29歲，但其實我只得19歲。」連司機都嚇親
講到成熟美，唔知大家仲會唔會諗到其他韓星呢？歡迎留言話俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk