Hello，大家好，我哋係由韓國人話你知每日最新韓國資訊嘅Creatrip。
今個月韓國便利店又出咗呢咩新嘢呢？等小編親自試食，同大家分享食後感啦！😁
韓國6月便利店人氣新商品
GS25便利店
1. 蛋沙律飛碟三文治（에그마요 포켓샌드）
價格：2200won（約HKD15）
最先想介紹嘅產品係蛋沙律飛碟三文治！ 佢係將兩片麵包夾滿啲餡，再將四邊壓扁嘅三文治。 咁樣整嘅話，入面嘅餡唔會漏出嚟，食嘅時候好方便，又唔好整污糟對手！
GS25呢次新嘅飛碟三文治有蛋沙律同和辣雞肉兩個口味。 小編平時鍾意食蛋黃醬，所以試咗蛋沙律。 夾住蛋沙律嘅麵包好鬆軟，又好香牛奶味。裏面嘅蛋黃醬就係平時食嘅味道，不過量就比較少，所以蛋黃醬嘅味道唔係好強，比起蛋黃醬，麵包嘅味道更濃 😥 但係幾飽肚！
2. 老虎堂黑糖忌廉卷蛋（타이거슈가 흑당크림롤）
價格：3500won（約HKD24）
GS25同奶茶名店老虎堂聯合推出嘅黑糖忌廉卷蛋！ GS25平時嘅忌廉卷蛋都好好食，可以話係GS25嘅代表性零食。小編都好鍾意GS25又甜又滑嘅卷蛋，今次同老虎堂一齊出，真係令人期待！
試食之後，冇辜負到小編嘅期待，仲比預期嘅好食好多添😍 外層嘅蛋糕真係好鬆軟！ 加上有陣黑糖香，入面嘅cream係用老虎堂招牌黑糖整，煙煙韌韌，又甜甜哋，真係超好味！鍾意黑糖甜品嘅朋友一定會鍾意！配埋杯美式咖啡簡直係無得彈啊！
3. 哈密瓜刨冰（레드멜론빙수）
價格：3000won（約HKD21）
為迎接夏天，GS25推出咗哈密瓜刨冰！ 哈密瓜係密瓜類之中數一數二又甜又清爽嘅一種，想食清新嘅水果刨冰嘅話，呢個就啱啦！
打開個刨冰就見到杏色嘅雲呢拿cream同紅色嘅哈密瓜糖漿。 花花形嘅cream，好可愛！糖漿同cream底下有混合住哈密瓜嘅刨冰，用匙羹𢳂嚟食就得啦！
清爽嘅糖漿同軟滑嘅cream，仲有咬落去好脆嘅刨冰，呢個組合真係好正！ 哈密瓜嘅香味好濃，味道同大家都好熟悉嘅Melona（메로나）好似！對於鍾意哈密瓜嘅朋友嚟講，呢個係最佳嘅夏天零食！
CU
CU今個月唔係好多特別嘅新產品可以介紹俾大家 😥 小編揀咗一款，同埋一個韓國零食品牌--Orion(오리온)嘅新品介紹俾大家！
1. 朱古力金莎蛋糕（초콜릿 로쉐 케이크）
價格：3300won（約HKD23）
呢款蛋糕係CU 6月自家新商品！ 見到個名有「金莎」兩個字，就諗起金莎朱古力，雖然唔係真係用一粒粒金莎朱古力嚟整，但佢用黑、白、榛子三種朱古力嘅 cream一齊整成，食落都幾似金莎。
蛋糕總共有6層，最上面係帶有金莎朱古力味嘅厚朱古力層，下面係軟淋淋嘅朱古力蛋糕，再有白朱古力同黑朱古力嘅cream相隔，食一啖就感受到多重濃度嘅朱古力味！超高質！推薦俾鍾意朱古力甜品嘅朋友😁
2. 薄荷朱古力批（민트 초코파이）
價格：2500원
薄荷朱古力批係Orion 2021年夏天限量推出嘅薄荷朱古力甜品。 薄荷朱古力嘅人氣越嚟越高，薄荷朱古力嘅產品越出越多樣化😋
薄荷朱古力批嘅主要材料係可可、薄荷、雲呢拿cream。 切開嚟睇，薄荷&雲呢拿cream包住棉花糖，再用可可朱古力麵包片夾住。 外層係薄荷，上面加咗啲薄荷朱古力、曲奇做裝飾！
麵包整體上好軟淋淋，朱古力味比較淡，但薄荷味十足，食落好清爽，如果鍾意薄荷朱古力嘅朋友應該會好鍾意呢個批😊
3. Dr. You 軟糖（닥터유 구미）
價錢：1500원
Orion Dr. You 係一個出名以健康為中心推出產品嘅韓國零食品牌，今年6月就推出咗軟糖啫喱！
Dr.You軟糖由鋅、維他命、膠原蛋白組成，食呢個軟糖可以滿足一日所需嘅鋅、維他命、膠原蛋白！控制飲食或者冇另外食營養補充品嘅話，呢隻軟糖可以幫到手！ 食落有石榴味，但唔會太甜，又唔會太酸，亦都冇人工製嘅味，所以好好食，好適合作為健康零食。
7-Eleven
1. 西瓜啫喱（수박젤리）
價格：1000won（約HKD7）
夏天唔少得嘅水果梗係西瓜啦！ 7-Eleven今個夏天推出咗西瓜啫喱。 同喺YouTube、SNS上大受歡迎嘅地球啫喱好似，只不過外形就係綠色嘅西瓜！ 打開個膠蓋，就會見到綠色嘅啫喱，西瓜嘅條紋原來只係畫喺個膠套上面😅
圓碌碌嘅啫喱有陣西瓜同哈密瓜混合嘅香甜氣味，裏面有好似西瓜肉一樣嘅紅色糖漿，但係味道就有啲失望😰原本以為會係甜甜嘅西瓜味，但係西瓜香只係輕輕飄過，淨係得人工製嘅甜味，而且好甜好酸，所以唔係好啱小編口味😥 不過如果想試吓個樣咁得意嘅啫喱，都可以買嚟一試嘅！
2. 濟州牛奶刨冰（제주우유 빙수설）
價格：3000원
唔知係咪因為夏天，便利店出咗好多刨冰嘅商品！ 7-Eleven都推出咗原汁原味嘅濟州牛奶刨冰。 比起水果刨冰，小編更鍾意有牛奶同紅豆嘅牛奶刨冰，所以非常期待呢個濟州牛奶刨冰。
打開杯蓋，入面有細細粒嘅牛奶刨冰、紅豆同糯米糍。 一羹𢳂起糯米糍、牛奶刨冰同紅豆咁食，口感好多層次，而且牛奶冰粒磨得好細，食起上嚟更加幼滑！
糯米糍好彈牙，紅豆都好甜，呢個刨冰真係好好食！ 大家都知平時刨冰店或者cafe嘅刨冰好大份，價錢都唔平，一個人食嘅話買呢個就啱啱好啦！
3. 魷魚片（꾸이 오잉칩）
價格：1500won（約HKD10）
呢隻魷魚片係樂天零食專為自己一個喺屋企飲酒嘅人新出嘅零食！ 用海鮮製成魚脯零食， 仲含有1隻雞蛋份量嘅蛋白質，係顧慮到健康嘅零食。
一打開個袋就有陣鹹鹹哋嘅魷魚味，好似真係魚脯咁。食落好脆，好有咬口，味道鹹鹹哋，好啱用嚟送酒！ 越咬，陣味就越香醇，好好味。 下次喺屋企飲啤酒嘅時候，一定要買嚟送酒！
以上就係6月便利店嘅新產品，好多都好好食😋 如果大家對邊個產品特別有興趣，可以留言同小編講㗎！😊
如果有更多想知嘅內容，都可以隨時留言或者dm話俾我哋知：）
Instagram：creatrip.hk
