弘大「Picniq」介紹
邊個話野餐一定要去公園㗎？去cafe都可以有野餐嘅feel！超推弘大「Picniq」！
Hello，大家好，我哋係由韓國人每日提供最新韓國旅行資訊嘅Creatrip。
小編放假嘅時候成日都會去新村附近嘅京義線林蔭大道嗰邊行吓，有一日發現咗一間好靚嘅cafe，好有野餐feel，今日就介紹俾大家啦😊
弘大野餐風cafe 「Picniq」
- 地址：서울특별시 마포구 창천동 서강로13길 22 1층 2층
- 營業時間：10:00 - 22:00
- IG：@picniq_hongdae
- 小Tips：地鐵2號線新村站（신촌역）7號出口出嚟之後直行，見到一間叫coffee story嘅cafe之後轉右，直行多100m就到啦。
京義線林蔭大道位於弘大附近，沿住已經唔再運行嘅鐵路，形成一條好靚嘅步行街，喺首爾好有代表性㗎！ 旁邊有好多好靚嘅cafe同餐廳、小飾物店，係拍拖勝地，同時係市民嘅休息空間。
喺一片綠油油嘅京義線林蔭大道度行，會發現呢間叫「picniq」嘅cafe！ 大自然嘅綠色，配上柔和色調嘅建築，感覺好和諧。
Picniq有1樓、2樓同花園。 1樓專係order，然後可以喺花園或者2樓度享用。 3樓同屋頂係其他嘅舖頭，唔好搞錯啊！
首先為大家介紹吓「picniq」最受歡迎嘅花園。小編去嘅時候係平日，啱啱開門，所以冇咩人。如果係星期六、日，就會有好多人帶住狗仔嚟，好熱鬧。小朋友同狗仔一齊玩嘅畫面，真係好溫馨😍
花園入面有5個位左右，可以一邊享受大自然，一邊飲咖啡。
叫嘢食之前，小編上咗去2樓參觀。
2樓嘅牆色同cafe外圍一樣，好柔和，有一種整齊乾淨嘅感覺。座位都比頭先花園多，連埋露台，有超過10張枱，可以俾好多人喺度享用食物同休息。
cafe周圍用畫同小飾物佈置，令到成間cafe嘅氣氛好溫暖，好有感覺。客人嚟到呢度之後，可以好悠閒咁享受自己嘅時間。
望向右邊，可以喺窄窄長長嘅窗度見到京義線林蔭大道嘅風景。 個景真係好靚，遠望嘅話就好似一幅用靚靚相架框住嘅畫一樣。
2樓有一個小小嘅露台，喺呢度可以望到花園，同埋京義線林蔭大道。 喺市中心，冇乜邊幾間cafe可以一邊享受大自然，一邊飲咖啡，呢個就係「picniq」最大嘅優點！
行咗一圈之後，就落返去1樓叫嘢食啦！1樓冇設座位，淨係得counter同甜品展示區！
小編真係好鍾意食甜品，見到呢個展示區又點忍得口呢😂
呢度有蛋撻同好多唔款嘅scone！全部都係手製㗎！日日都由工場新鮮整好再運過嚟。老闆仲話會不停創作嘅新menu添！
除咗甜品之外，喺counter前面有個menu可以叫其他嘢食。飲品方面，呢度有咖啡、鮮奶咖啡、梳打、水果茶、花茶可以揀。有綠色心心標誌係「picniq」嘅招牌，大家嚟嘅話都可以試吓！
右邊有「picniq」嘅招牌梳乎厘鬆餅，款式都好多，有士多啤梨、雞蛋牛油、朱古力tiramisu、香蕉脆脆、橙味等等，梗有一款啱大家嘅口味！
梳乎厘鬆餅係即叫即整，所以需要15分鐘！小編就去咗花園嘅長木櫈度坐住等。
1樓嘅角落頭放住好多個木製嘅托盤，係俾坐喺花園嘅人用嘅枱嚟嘅！
杏仁維也納咖啡（아몬드 슈페너）- ₩5,500
一般嘅維世納咖啡（Einspänner）係喺美式咖啡上加淡忌廉，而「picniq」嘅杏仁維也納咖啡就放滿咗杏仁忌廉！ 飲第一啖就感覺到好濃，帶啲甜嘅杏仁忌廉好好味，加埋上面嘅杏仁碎，又有咬口。 平時鍾意杏仁或者堅果嘅朋友一定會鍾意！
士多啤梨鮮奶（딸기 라떼）- ₩5,500
用酸酸甜甜嘅士多啤梨醬整成嘅士多啤梨鮮奶，底下嘅果醬仲係老闆親自整㗎添。 飲嘅時候用飲管攪勻，等啲cream同士多啤梨醬撈埋一起，會更加好飲。
但有一個小缺點就係啲cream有啲多，感覺唔係喺度飲緊士多啤梨鮮奶，而係飲緊cream😅 有啲太甜同太膩😥 推薦俾鍾意cream嘅朋友，但如果本身唔太鍾意cream嘅話，小編就建議叫其他飲品啦～
picniq招牌梳乎厘鬆餅（피크니크 수플레）- ₩16,000
兩塊軟腍腍嘅梳乎厘鬆餅，上面舖滿cream，再用香蕉、青提子、橙等等多種當造水果圍住，好睇又好食。
將梳乎厘鬆餅切成細細件，加少少cream，連埋水果一齊食，又軟又甜，好有口感。 如果淨係得cream嘅話，可能會覺得膩，所以加埋水果，清清哋，真係好夾，小編超推薦呢個甜品！
咁樣坐喺花園食住甜品，真係好似去咗野餐咁！ 小編去嘅時候因為太早，所以冇咩人，如果人多嘅時候去嘅話，會更加熱鬧！😉
想喺首爾中心享受到大自然同甜品，真係要嚟「picniq」啦！😊😊
如果有更多想知嘅內容，都可以隨時留言或者dm話俾我哋知：）
Instagram：creatrip.hk