Hello，大家好，我哋係由韓國人每日提供最新韓國旅行資訊嘅Creatrip。
每年五、六月，好多韓國人就會湧去位於江華島（강화도）一間叫 Dore Dore 嘅cafe（도레도레 카페）。 雖然呢間cafe喺首爾有好多分店，但啲人都係鍾意去江華島嘅分店，因為嗰度有一個超靚嘅雛菊花園，今日小編就帶大家一齊去睇吓呢間人氣爆登嘅cafe啦！
江華島 Dore Dore cafe介紹（도레도레 카페）
- 地址：인천 강화군 화도면 흥왕리 355-21
- 營業時間：平日 11:00 - 18:00，星期六、日或假期： 10:00 - 19:00
- 小Tips：喺首爾站搭M6117號巴士到구래역 -> 轉坐700-1巴士到온수리 -> 再搭3號巴士車到마니산상회站 -> 行大約600m就到 Dore Dore。 （總共需要大約2個半鐘）
呢度地方超大，睇起嚟似一個小型植物園，而唔係cafe。入口嗰度兩邊都有種雛菊，好靚。
Dore Dore 分為2個主要咖啡區，由入口行到花道嘅盡頭，左邊就會見到1號咖啡館，嗰度有好多戶外嘅枱同櫈，俾你可以坐喺度吹吓風。
不過呢度得好少雛菊，所以就行去另一邊，沿途會見到一個噴泉同好多樹。
再行入少少，真係忍唔住要「嘩」一聲！一個超級靚嘅雛菊花園就出現喺眼前！陽光照落嚟顯得更加有活力，相信呢個就係江華島最靚嘅地方啦！
需要注意嘅係呢個花園區唔准13歲以下嘅兒童進入。
天氣超好，可以由唔同嘅角度拍千千萬萬張靚相。 因為小編好鍾意雛菊，就算咁遠先嚟到都好開心！
週末呢度真係人山人海，影相嘅時候想影個靚啲嘅角度可能就要排隊。 不過佢咁靚，排吓都抵啦！
影完相之後，就入去叫嘢食啦！cafe 嘅休息區分咗戶外同室內。 戶外嘅座位比較少同好熱，所以小編都係留返室內度搵位坐啦！室內嘅空間非常闊落，配有簡單嘅木檯設計。
如果大家想靜啲，亦都可以揀喺2樓座。
落單就要去返1樓，呢度有唔同種類嘅甜品，麵包、蛋糕，應有盡有。 樣樣睇起嚟都好靚，好想試，可惜小編同朋友得4個人，食唔晒全部，諗咗好耐，最後叫咗 4 杯飲品同 2 件蛋糕。
呢度嘅蛋糕同其他cafe比真係貴幾多，一開始都會擔心得個樣，點知食完又真係幾好食，而且都夠大件，呢款蛋糕有陣淡淡嘅甜味同清清哋嘅忌廉味。 食落好軟熟，裏面仲有超好味嘅士多啤梨。
濟州柑橘汁好清爽，一啲都唔酸。 夏天咁熱嚟呢度飲返杯，超消暑！至於青橘梳打，個底有少少濟州橘子醬，頂部係一層梳打水， 攪勻之後飲，甜甜哋又好清爽，唔錯！
彩虹忌廉蛋糕超級吸睛！忌廉好柔軟好滑，一啲都唔甜。 蛋糕嘅大小同之前件草莓忌廉蛋糕差唔多，不過裏面就冇水果。如果大家唔鍾意水果，可以揀呢款彩虹蛋糕，都係呢間cafe嘅招牌之一！
無咩比美式咖啡更加適合配蛋糕啦，梗係要叫返一杯啦。 而杯士多啤梨鮮奶，士多啤梨醬放喺杯底，鋪上一層cream。飲嘅時候記得要攪勻，而啲士多啤梨仲好甜，一啲都唔酸。
食飽飽之後，小編同朋友喺呢度行咗一陣。 呢度真係好大，所以有張地圖等你唔好咁易盪失路！
仲有一條通去野生花園嘅小路，呢條小路綠油油一片，影出嚟嘅相超迷人。 大家都可以喺呢度影好多靚相。
行到盡頭就會見到左邊有一棟起緊嘅建築物，睇嚟似係一個新嘅 Dore Dore Cafe，證明呢度真係超多人超逼，老闆要加建！
呢度就係野生花園（야생정원），行落去一樣都有雛菊，但小編覺得冇上面花園規劃得咁靚，不過仍然值得嚟欣賞吓！
提提大家，如果大家係揸車去嘅話，記得要留返張收據，因為可以免費泊車。 如果冇收據，就要俾5,000won（約HKD35）嘅泊車費啦。
以上就係今次江華島超人氣Dore Dore Cafe嘅介紹。 大家覺得點呢？值唔值得去一轉？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
