李昇基、李多寅承認交往中
李昇基啱啱先同經紀公司解約...就即刻被爆同李多寅戀愛中！女方經紀公司承認雙方戀情！
Hello，大家好，我哋係由韓國人每日提供最新韓國旅行資訊嘅Creatrip。
李昇基、李多寅承認戀情
韓國媒體《Sport京鄉（스포츠경향）》爆料，指年紀相差五歲嘅李昇基同李多寅，本身係關係密切嘅前後輩關係，一樣身為演員，加上大家都鍾意打golf，所以慢慢變熟，喺舊年年底開始拍拖，至今拍拖大約五、六個月。
2018年，李昇基喺綜藝節目度講過自己嘅理想型，希望雙方係心靈相通，理解對方講嘅嘢，除咗有心動嘅感覺之餘，仲希望有份安全感。而李多寅之前喺訪問中亦都講過自己特別鍾情嘅男性，性格方面希望係正直，會表達自己情感，唔會收埋收埋嘅人，仲希望大家對未來抱有相同嘅想法。而家咁睇，真係好似命中註定一樣。
私底下，其實大家一早都知道李昇基同李多寅嘅戀愛關係。
1987年出生嘅李昇基最近憑韓劇《Mouse》再次人氣急升，喺早排嘅第57屆百想藝術大賞中攞咗最佳藝能賞獎項，除咗歌手身份之後，演技同藝能方面嘅實力亦被肯定；1992年出生嘅李多寅，係演員甄美里嘅女兒，2014年出道之後，慢慢累積人氣，舊年就以《ALICE》嘅第二女主角被大家關注。
李多寅經紀公司9ato娛樂喺被爆戀情之後，火速發出聲明，指同演員本人確認，李多寅同李昇基確實係由前後輩關係，互相有好感受同了解之後開始相戀，希望大家支持佢地嘅戀情。
而李昇基早前同本來嘅經紀公司解約嘅新聞炒得好熱。Hook娛樂搶喺被爆戀情前發表聲明，指李昇基同公司同甘共苦17年，對彼此相當信任，而李昇基最近決定離開Hook娛樂，成立一人企劃公司，將會喺5月31號同Hook娛樂終止合約。
Hook娛樂喺聲明最後都話好多謝李昇基，希望大家繼續支持李昇基，Hook娛樂亦會繼續給予支持。但到目前為止，Hook娛樂仲未針對李昇基同李多寅嘅戀情發表任何立場。
如果有更多想知嘅內容，都可以隨時留言或者dm話俾我哋知：）
Instagram：creatrip.hk