Hello，大家好，我哋係由韓國人每日提供最新韓國旅行資訊嘅Creatrip。

大邱有「美食之都」嘅美譽，有超多好評嘅餐廳，好有feel嘅cafe，多到唔知點揀。小編就喺韓國10至20歲嘅年輕人嘅SNS度地顫式搜索，嚴選出而家最hit嘅美食，再親身去試食，保證唔會伏！今日就一一介紹俾大家啦！  

1. 餐廳

兩班排骨（양반갈비）

• 地址：대구광역시 수성구 무학로 101 
• 營業時間：每日 11:00 - 23:00
• 價錢： 兩班排骨 15,000won(1人份)/ 兩班五花肉 15,000won(1人份)/ 大醬湯 7,000won 等

第一個介紹俾大家嘅人氣熱點就係啱啱新開嘅「兩班排骨」！以前韓國嘅社會將人分唔同嘅階級，「兩班」就係貴族嘅意思。 就咁睇舖頭嘅外觀都覺得好豪華，似足有錢嘅貴族咁！  

因為疫情關係，而家韓國大部分啲餐廳都要登記QR code，小編入去之前都要先嘟一嘟！

入面空間超大，一入去就見到好華麗、好整潔嘅裝修！就好似行入咗200年前貴族嘅屋企一樣！

呢度仲有專為小朋友而設嘅玩樂區，方便一家大細嚟呢度享用美食。

坐低之後就打開個menu睇吓有咩食啦。呢度嘅招牌「兩班排骨」同「兩班五花肉」一人份都係 15,000won（約HKD104）。小編同埋幾個朋友一齊嚟，所以叫晒兩樣！聽講呢度嘅優點係用嘅食材都好新鮮，食落好味之餘，一啲都唔覺得膩，真係好想快啲試吓係咪真係傳說中咁正啊！

小編諗住叫工作人員嚟落單嘅時候，發現咗呢句「需要幫忙嘅話，請叫『來人啊』（i li o neo la ）！」（도움이 필요하시면, "이리오너라"라고 불러주세요.）

「來人啊」（이리오너라）係朝鮮時代貴族去其他人屋企嘅時候，叫僕人開門講嘅說話！小編照做之後...就有個著住韓服，戴住紗帽嘅工作人員由廚房走出嚟  

落完單之後，職員會即刻準備好多伴菜，有生菜、芝麻葉，沙律、醃洋蔥、豆腐等！望到成枱伴菜，已經開始流口水🤤

啲肉終於嚟啦！用鹹中帶甜嘅醬料醃好嘅排骨，睇吓燒到金金黃黃嘅樣... 

職員會將已經燒熟嘅肉剪好一塊塊，小編即刻夾起放入口！（職員話如果舖頭太忙嘅話，可能就要客人自己剪）

大家知唔知，呢種醃好嘅排骨最好食嘅就係呢舊骨呢？每個位都有一個夾仔俾你夾住舊骨，再咬旁邊痴住嘅肉，好食到唔知點形容啊！

燒完排骨之後就輪到五花肉啦！又厚又多汁嘅五花肉，係呢度嘅招牌菜！燒到金黃色，入面都熟嘅話，就食得啦！

小編就連埋伴菜一齊食，鹹鹹哋嘅五花肉，配上帶少少甜嘅菜，真係超夾！呢個都係點解五花肉會被韓國人選為最鍾意嘅食物嘅原因！

韓式燒肉通常都會配飯同大醬湯！呢度嘅大醬湯，係喺牛骨湯入面加入韓牛，顯得更加高級。

大家仲可以喺呢度親自體驗韓服同紗帽，著上韓服，戴埋紗帽，梗係要影返張相啦，似唔似貴族呢？   小編身爲韓國人都係第一次戴紗帽，好神奇，好好玩啊！

匾蜜蜜本店（편밀밀 본점）

• 地址： 대구 중구 봉산문화길 24 1층 편밀밀
• 營業時間：每日 11:30 - 21:00
• 價錢： 火箭菜炒年糕 6,500won/ 餃子闊條麵 11,000won/ 匾蜜蜜玉子壽司 5,500won 等

第二間介紹俾大家嘅係豪華版小食店--「匾蜜蜜」。好多人一提到韓國嘅小食，都會諗起又平又方便嘅炒年糕、紫菜包飯等等。 「匾蜜蜜」就將西餐同小食融埋一齊嘅fushion餐廳。

行入舖頭入面，陽光穿過玻璃，非常光猛，超啱去影相打卡！專程嚟到試食，睇吓menu有咩食先！  

嚟到小食店，梗係要食炒年糕啦！煎餃係呢度嘅招牌菜，所以都叫咗一份！

樣樣都好吸引，好想試，結果就叫咗咁多樣啦  炒年糕（루꼴라 떡볶이）、乾烹餃子（깐풍 납작만두）、餃子闊條麵（만두라자냐），仲有匾蜜蜜玉子壽司（편밀밀 무스비）   因為呢度嘅menu得韓文，所以大家可以睇呢度嘅相，揀自己鍾意嘅嚟落單！

而家就逐樣試吓啦！第一樣係炒年糕！辣辣哋，又彈牙嘅年糕，加埋小小苦澀味嘅火箭菜，味道好夾，食落又唔膩，超推薦！

下一樣係乾烹餃子。扁型嘅餃子係大邱代表性啲食物，將餃子壓扁再炸到脆一脆，再淋上酸酸甜甜嘅醬，味道超特別！

下一樣就係餃子闊條麵！一食就上癮！軟腍腍嘅餃子上面，鋪上一層茄汁同芝士，同一般嘅闊條麵比更有韓式風味！

最後就係匾蜜蜜玉子壽司！厚厚嘅雞蛋，夾住飯，連埋炒年糕或者餃子一齊食，真係天衣無縫嘅組合。同日式玉子壽司有啲相似，本身鍾意玉子壽司嘅朋友一定要試！

A Secret Hideout（숨은집）

• 地址： 대구 중구 동성로1길 46-23 1층
• 營業時間：每日 11:00 - 21:00 (BREAK TIME 15:00 - 17:00)
• 價錢：戰斧豬扒 24,000won/ 蕃茄肉醬意粉 14,000won 等

另一間大邱人氣美食店就係呢間「A Secret Hideout」！就咁睇個名就已經覺得好特別！因為佢係隱身喺巷仔入面嘅一間小店，所以改咗呢個名！

雖然舖頭位於大邱最旺嘅東城路，但都好難先搵得到，好似尋寶一樣   入口嘅米色牆、木裝嘅裝飾品，一睇就feel到舖頭嘅神秘感！

入面唔係有好多張枱，枱同枱之間唔會好密，坐得好舒服。燈光同啲盆栽都好夾，氣氛好正！

呢間餐廳有提供pizza、pasta、闊條麵、沙律等等唔同類型嘅食物，小編今次就揀咗呢度嘅招牌菜嚟試！

先嚟一張大曬冷！就好似上面張圖咁，小編叫咗招牌pizza、蕃茄肉醬意粉、戰斧豬扒。

第一樣試食嘅係招牌pizza！大家知唔知中間白色嘅部分係啲咩嚟㗎呢？等小編開估啦～係乳酪嚟㗎！蕃茄醬撈埋乳酪，真係好特別！食過一啖就停唔到口，唔怪得係招牌啦！

第二樣就係蕃茄肉醬意粉啦！親自整嘅醬汁，加入紅酒嘅風味，雖然食落同其他一般嘅肉醬意粉差別唔大，但真係好好食！ 

最後就係呢個令人最期待嘅戰斧豬扒！用幼嫰嘅黑豬肉整成嘅豬扒，唔單只係呢度嘅招牌菜，仲係IG打卡必叫嘅menu！   

先用刀將比較嫩滑嘅部分切開嚟食，之後用手攞住嚟食淨低嘅部分  

再提吓大家！小編計啱佢開舖時間11點嚟到，所以唔使等位。因為呢間餐廳真係好多人去，一般都要等位，所以就啱開舖時間去嘅話，會比較方便！

2. CAFE

Naricomo本店（나리꼬모 본점）

• 地址：대구 수성구 달구벌대로 2683
• 營業時間：每日12:00 - 18:00
• 價錢：美式咖啡 4,000won/ 雪糕鮮奶咖啡 6,000won/ 手製冬甩 4000원~等

接住落嚟爲大家介紹大邱嘅熱門cafe！ 第一間就係Naricomo！最近因為超多餡嘅手製冬甩而喺IG大熱，甚至成日都好快賣晒。跟住小編入去睇睇啦！

一入到舖頭，就見到超多甜品！聞到一陣陣又香又甜嘅麵包味，真係口水都流埋  

裝修好精緻，啲冬甩又好可愛！上面鋪住唔同味嘅餡，就咁睇都覺得好好食！

除咗冬甩之外，呢度嘅嘢飲都好特別，絕對要嗌返杯嚟試吓！樣樣睇落都好好味咁，為咗有選擇困難症嘅你哋，嗰度寫住推薦嘅menu小編都全部叫咗嚟試  

以下就係小編挑選嘅menu啦！由甜品開始介紹啦！

麻糬冬甩（4,200won，約HKD29）

小編叫咗兩款冬甩，一款係麻糬冬甩，加咗好多麻糬味嘅餡，食落唔會膩，仲好香！ 推薦大家試吓！

焦糖奶油冬甩（4,200won，約HKD29）

另一款就係焦糖奶油冬甩！ 入面有超多cream，甜甜哋，食完心情都變好！冬甩外層係有一層硬硬哋嘅糖，牙唔係咁好嘅朋友可能要小心  

蘋果果醬曲奇（3,500won，約HKD24）

除咗冬甩之外，小編仲叫咗「烤蘋果醬曲奇」！蘋果醬好味，曲奇又好食，加埋一齊又點會唔好食呢？職員仲會加熱，食落又香又軟。

左：西柚梳打（5,500won，約HKD38）；右：松鼠雪糕鮮奶咖啡（6,000won，約HKD42）

本來杯松鼠雪糕鮮奶咖啡會有一塊松鼠曲奇插喺雪糕上面嘅，但係因為無晒曲奇，所以淨係得雪糕 。希望大家點嘅時候有曲奇，可以影到更靚嘅相啦！

呢度都有好多嗌外賣嘅客人，個包裝真係超靚啊！頭先點過嘅麻糬冬甩真係太好食，所以小編都再買多一個外賣帶走！

Monolic （모노릭）

• 地址：대구 동구 아양로10길 22
• 營業時間：每日 12:00 - 21:00 (목요일 휴무)
• 價錢：美式咖啡 4,500won/ 西柚紅茶 6,000won/ 蛋糕 7,000won~

另一間介紹俾大家嘅係叫「Monolic」嘅cafe！呢度嘅keyword就係「魚缸cafe」。 但如果照字面咁諗，以為係一個平凡嘅魚缸，咁就錯啦！快點一齊入去睇吓啦！

入口開始已經好潮好有時尚感！好期待入面係咩樣啊！！

舖頭入面走簡潔風。

一入到去，最搶眼嘅係呢個位置！

就係魚缸啦！個魚缸係喺天花板上面，可以一邊望住啲魚自由自在咁游，一邊飲住咖啡，感覺特別舒服！  

二樓嘅天台都好靚！可惜小編去嘅時候落雨，無得過去，不過睇落都感覺到，可以一邊吹住風一邊欣賞靚景嗰種優閒！

小編揀咗個好型嘅座之後，就去落單啦！呢度有咖啡、茶、梳打等等多款嘢飲。

放喺度嘅蛋糕同麵包都好靚！特別係巴斯克芝士蛋糕同scone睇落都好好食   

小編今次點咗巴斯克芝士蛋糕（6,500won，約HKD45）、朱古力鮮奶咖啡（6,500won，約HKD45），同埋西柚紅茶（6,000won，約HKD42）

喺魚缸底下影相，因為好夠光，顯得更加吸引！

呢度嘅氣氛好舒服，望住啲魚，更加有治癒感！加上呢幾款人氣超高嘅飲品同甜品，樣樣都好好味！

呢杯朱古力鮮奶咖啡同西柚紅茶，真心力推俾大家！朱古力唔會好甜，但味道好濃。而杯西柚紅茶加咗迷迭香，令人好放鬆  

呢件巴斯克芝士蛋糕係必食！最近韓國好hit呢款上面稍微燒燶嘅巴斯克芝士蛋糕，小編都食過唔少。呢度嘅巴斯克芝士蛋糕真係好正！ 大家相信小編，呢度嘅嘢飲同甜品真係好值得一試！

Factory 09（북성로 공구빵）

• 地址： 대구 중구 서성로14길 79
• 營業時間：每日 12:00 - 20:00 (星期一休息)
• 價錢： 工具麵包 1set 4,500won

下一間要介紹嘅cafe叫「Factory 09」。

呢個諗法真係好特別，背後仲包含住咁有意義嘅動機，真係好型啊！  

要去Factory 09，就要經過「慶尚監營公園」 。喺呢個公園行咗一圈之後，就向住北城路手工鞋街嘅方向行，好易就搵到！

穿過公園嘅巷仔，就會見到Factory 09啦！喺外面睇，又似一間工廠，又似cafe，裝修好特別，非常搶眼。

入到去裏面，真係分唔清呢度究竟係cafe定五金舖  

今次點左一份工具set（4,500won，約HKD31）工具型麵包細細哋，係咪好得意呢？

個set有士巴拿、螺絲等形狀嘅madeleine！

一手就可以將個士巴拿分為一半，你我都可以成為大力士！   

味道係好基本madeleine嘅味，唔會好油，搭杯美式咖啡或者牛奶都唔錯！

咁得意嘅工具madeleine set，外賣裝都唔錯！真係好似工具箱咁！

走嘅時候咁啱睇到整工具麵包嘅模，細問之下，原來係一個大邱好出名嘅匠人親自整嘅模嚟嘅～  

香村（카페 향촌）

• 地址：대구 중구 서성로14길 74 
• 營業時間：每日 11:00 - 20:00 (星期一休息)
• 價錢：美式咖啡 3,500원/ Dutch Cube鮮奶咖啡 5,500won/ 黃菊花茶 5,500won 等

入口就感覺到呢間cafe嘅氣場！「香村」（향촌）嘅意思係瀰漫住香氣嘅村落，真係一個好有格調嘅名啊！

呢度有好多好靚嘅衫可以租，距離之前介紹嘅Factory 09，只需要行1分鐘左右，推薦大家可以一次過嚟晒2間cafe  

1樓係專門落單嘅地方，2樓先有位坐。呢度有唔同類型嘅咖啡，美式咖啡、手沖咖啡、Dutch咖啡等等；茶方面就有普洱茶、黃菊花茶、檸檬紅茶等等。

小編落完order就上去2樓度睇吓啦～跟住一齊嚟啦！

 2樓嘅裝修，同1樓西洋嘅風格好唔同，2樓係一種好溫暖舒服嘅韓屋風格！舊式韓屋入面一樣嘅用品同木柱，感覺好夾。

左：黃色菊花茶（5,500won，約HKD38）；右：Dutch cube 鮮奶咖啡（5,500won，約HKD38）

喺2樓行咗一陣，嘢飲搞掂啦了。但總係覺得淨減啲嘢咁？後嚟先知，呢度嘅茶可以自己直接隔走啲茶葉嚟飲，咖啡就可以加牛奶，所以我哋就將啲又大又靚嘅過菊花隔走，而喺Dutch cube咖啡度加入牛奶，真係好特別啊！

咁樣唔只可以享受到飲品嘅味道，仲可以親自體驗同影相，感覺真係好正。

以上就係今日爲大家介紹喺有「美食之都」之稱嘅大邱，7間而家最hit嘅餐廳同cafe。親自去過一次先知道點解呢啲地方喺SNS會咁紅！大家係咪都好想即刻飛嚟呢！快點save底，下次嚟嘅時候再統統食一轉啦！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購