狎鷗亭「CAFE CAMPTONG」介紹
原來《Run BTS》之前都係嚟呢度拍攝？ 好多位都係原封不動咁擺喺度！A.R.M.Y又點可以錯過？
Hello，大家好，我哋係由韓國人每日提供最新韓國旅行資訊嘅Creatrip。
有追開Run BTS就應該對CAFE CAMPTONG有啲印象，呢間係118-119集BTS去拍攝嘅CAFE！唔好等啦～一齊跟住BTS去影靚相啦！
狎鷗亭 「CAFE CAMPTONG 」介紹
營業時間： 11:30 - 19:00（Last Order 18:30）
地址：서울 강남구 압구정로42길 27
小Tips：由狎鷗亭1號出口行大約11分鐘左右，或者由狎鷗亭羅德奧站5號出口行8分鐘左右。
Run BTS 第118-119集出現過嘅CAFE CAMPTONG，位於狎鷗亭羅德奧（압구정로데오역），係一間5層高，空間超大，如果你係A.R.M.Y之後嚟韓國就一定要跟實BTS去影相啦！
行入鋪頭就會見到播住BTS嘅大熒幕，就算唔係A.R.M.Y，一睇就知道BTS嚟過呢度！
唔單只咁，隔離仲有幾塊黑板，貼滿fans嘅留言，唔知之後BTS成員會唔會再嚟睇返呢？
黑板上貼滿嘅都係BTS之前嚟拍Run BTS執行任務嗰陣嘅相，同埋一啲嚟旅行嘅朋友或者fans寫嘅memo。如果之後嚟旅行嘅朋友千祈唔好錯過機會，寫返張memo留低你嘅腳印啦！
行入呢一道門，就見到呢塊鏡啦！Jimin、RM同其他成員都喺度自拍過，小編同朋友就梗係跟實，影返張相啦！ 行過去counter度買嘢飲之前，趁冇人影多幾張相先！哈哈
喺counter前面，可以見到呢間店最特別嘅裝飾，就係呢棵由天花板倒掛嘅聖誕樹。
呢度有好多嘢飲可以揀，仲有寫住邊啲係招牌推薦、或者係新出嘅產品。另外仲有好多唔同款嘅咖啡豆可以揀，鍾意飲咖啡嘅朋友一定鍾意呢度。
想食甜品嘅話，揀好咗放喺碟度，就可以連埋嘢飲一次過俾錢。甜品都一樣，有寫住邊啲係best seller，選擇困難症嘅朋友唔怕唔知揀咩好！
買完嘢飲同嘢食之後，我哋周圍行下，睇到間店賣好多精品，全部都係BTS fans整，有杯、notebook、卡片等等。
呢度唔單只有賣BTS嘅周邊，仲有一個專for fans影相嘅photo zone，紫色背景，掛住 I PURPLE U 字樣嘅波波。嚟呢度嘅A.R.M.Y，千祈唔好錯過啊！
之前都有講，呢間CAFE真係超大，有好多層，每一層都好闊落，有好多位，可以容納到好多人。
見到呢個粉紅色嘅簾，就諗起V喺度影過相，我哋都唔執輸，學V咁擺pose咁影返張先！
一路行一路等會發現店入面有好多BTS嘅雜誌，又有跟住BTS學韓文嘅書，仲有佢哋嘅專輯，唔通店主都係A.R.M.Y嚟嘅？
呢度嘅裝修好簡單，好有工業風嘅牆，加埋木製嘅枱，簡約得嚟又有特色。
呢間CAFE係自助形式嘅，喺pickup嗰度攞個盤拎自己嘅order，食完之後，唔好唔記得要放返去return度啊。
小編最後叫咗呢間店嘅招牌，朱古力鮮奶，同埋佢嘅新menu，抹茶朱古力鮮奶，仲叫咗一個蛋撻同mini earl grey cube。
朱古力鮮奶（6500won，約HKD45）
味道好濃，但唔會太甜，果然係招牌啊！
抹茶朱古力鮮奶（6,500won，約HKD45）
望落去好似怪怪哋咁，但飲落又幾好味喎，抹茶同朱古力原來好夾！
mini earl grey cube（4,200won，約HKD30）
雖然麵包唔熱，但係好軟熟，表層又有少少韌度，口感好正！仲有上面舖住嘅earl grey，真係超香啊！入面有好香好濃嘅cream，但係唔使擔心，唔會太甜同太漏！就算你唔係麵包控，都一定會鍾意！真係超好食啊！
蛋撻 (4,600won，約HKD32)
又香又脆，唔怪得係best seller！不過蛋漿有啲難切，食落好soft好滑，又唔會太甜！
食飽之後就落去下一層啦，呢度真係好啱影相，樓梯個轉角位全部都係鏡，可以影到全身照，係另一個photo zone。
落到2樓，差啲就錯過咗呢個位，好彩老闆有放BTS嘅相，先認得呢個背景，當然又要跟住影返張啦！
2樓嘅空間大，有好多位坐，呢度比較多韓國人坐喺度做嘢，或者溫書。大家有無留意到呢棵聖誕樹上面有齊7隻BT21呢，真係超可愛啊！
想靜靜哋咁做嘢或者溫書嘅話，可以用呢啲房。細間嘅可以直接用，大間嘅話就要預先book定。
呢度7張櫈，一望就知係BTS 7位成員拍Run BTS時坐嘅櫈，老闆照樣咁放喺度，就算BTS唔喺呢度，都覺得自己好似Run BTS嘅工作人員咁啊！
如果唔記得邊個坐邊張櫈，唔緊要，好似小編咁張張都坐一次啦！哈哈哈
呢個景有無啲熟口面呢？
呢度就係柾國扮花花影相嘅景啦，大家都唔好錯過啊！
悶悶哋，可以同朋友仔嚟呢度丟下飛鏢！J-Hope、Jimin、Suga都喺呢度影過相。
行咗成日，對腳又攰，想放鬆吓嘅話，呢度有按摩室提供俾大家。嚟呢度又可以跟住BTS影相，又可以按摩（1,000won，約HKD7/10分鐘）
呢度locker區應該好多人都經過過，BTS佢哋都喺度影過相！大家都記得呢個locker位，影返張相啊！
行完2樓，我哋就去3樓啦！呢度只有會員先可以進入，所以我哋就上去4樓啦。
4樓係天台，天氣好嘅話，超推薦大家上嚟呢度坐吓，真係超級舒服，成個人都好relax！
韓國嘅天空好藍，影出嚟嘅相唔使再執已經好靚，所以大家一定要上去天台睇吓啊！好可惜小編去嘅時候5樓close咗。如果大家嚟嘅話，可以上去欣賞吓首爾嘅景色！
老闆喺每一層都有呢個floor plan，路痴都唔使驚自己盪失路。大家亦都可以望住呢個floor plan，揀想坐嘅枱，或者想去嘅地方。身為A.R.M.Y嘅你，呢間CAFE必去啊！跟住BTS嚟打卡啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
